Müsavat Gənclər Təşkilatı

Human Rights Watch Azərbaycanda insan haqlarının daha da pisləşdiyini bildirir

2012-01-22T06:41:00.000-08:00

-

2011-ci ildə Azərbaycanda insan haqları sahəsində vəziyyət pisləşib. Hökumət bütün etiraz aksiyalarının qarşısını alıb, onlarla gənc saxta hökmlərlə həbs edilib.

Böhtana görə jurnalistlərə qarşı qaldırılan cinayət və mülki məhkəmə işlərinin sayı azalsa da, jurnalistlərə və başqa digər tənqidçilərə münasibət dəyişməyib.

Hökumətin paytaxt Bakının mərkəzində şəhərin gözəlləşdirilməsi adı altında apardığı abadlaşma nəticəsində insanlar evlərindən məcburi köçürülüb, evləri qanunsuz sökülüb.

DİN AZADLIĞINA MƏHDUDİYYƏTLƏR, HƏBSXANALARDA İŞGƏNCƏ VƏ PİS RƏFTAR DAVAM EDİB

Bu haqda beynəlxalq hüquq-müdafiə təşkilatı Human Rights Watchun dünyada insan haqlarının vəziyyəti ilə bağlı yaydığı illik hesabatın Azərbaycana aid olan hissəsində deyilir.

Hesabatın Mətbuat Azadlığı hissəsində deyilir ki, mart ayında müxalif yönlü «Azadlıq» qəzetinin jurnalisti Seymur Həziyevi 6 maskalı şəxs oğurlayaraq döyüb. Ona hökumət məmurlarını tənqid edən yazılar yazmamaq haqda xəbərdarlıq olunub. Apreldə isə «Azadlıq» qəzetinin müxbiri Ramin Dekonu 3 naməlum şəxs oğurlayıb. Onu 8 saat saxlayıblar, hökuməti tənqid edən yazılar yazmamaqla bağlı ona da xəbərdarlıq ediblər.

Oktyabr ayında «Xural» qəzetinin baş redaktoru Əvəz Zeynallı haqqında 3 aylıq həbs-qəti imkan tədbiri seçilib. 2011-ci ildə məhkəmənin qərarı ilə «Xural» qəzetinin avadanlıqları müsadirə edilib.

Aprel ayında İsveç televiziyasının jurnalistləri Bakıdakı mitinqi çəkərkən polis onların kameralarını alıb, çəkdiklərinin hamısını silib. İyul ayında Bloomberg Markets jurnalının fotoqrafı Diana Markosian Bakı aeroportundan deportasiya olunub. İyun ayında amerikalı jurnalist Amanda Erickson və britaniyalı hüquq müdafiəçisi Celia Davies 4 nəfərin hücumuna məruz qalıb. Hücum edənlərdən ikisinə cinayət işi qaldırılıb.

2011-ci ilin birinci yarısında məmurlar jurnalistlərə qarşı böhtanla bağlı 7 məhkəmə iddiası qaldırıb. May ayında tənqidçi redaktor Eynulla Fətullayev azadlığa buraxılıb.

HESABATIN TOPLAŞMA AZADLIĞI HİSSƏSİNDƏ BİLDİRİLİR Kİ, HÖKUMƏT TOPLAŞMA AZADLIĞINI MƏHDUDLAŞDIRIB

Bakının mərkəzində heç bir etiraz aksiyasının keçirilməsinə icazə verilməyib. Polis icazəsiz aksiyaları dağıdarkən 50-dən çox fəalı saxlayıb. Gecə vaxtı keçirilən məhkəmə proseslərində onlar 10 gün azadlıqdan məhrum ediliblər.

Aprelin 2-də keçirilən aksiya zamanı polis fiziki gücdən istifadə edib. 200-dən çox adamı, o cümlədən jurnalistləri, müxalifət fəallarını saxlayıb. Saxlananlardan 14-ü ədalətsiz məhkəmə qərarları nəticəsində 3 ilə qədər azadlıqdan məhrum edilib.

Hesabatın Siyasi Məhbuslar hissəsində deyilir ki, yerli hüquq müdafiəçilərinin məlumatına görə, mart-aprel aylarında keçirilən aksiyalarda həbs olunanlar da daxil olmaqla 2011-ci ilin 6 ayında siyasi məhbusların sayı 23-45 arasında olub.

29 yaşlı gənc fəal Bəxtiyar Hacıyev martın 11-də keçirilməsi planlaşdırılan etiraz aksiyasını dəstəkləyib. O, ordudan yayınmaqda ittiham olunaraq 2 il azadlıqdan məhrum edilib. AXCP fəalı, 20 yaşlı Cabbar Savalan narkotik saxlama ittihamı ilə 2 il yarım azadlıqdan məhrum edilib.

Avropa Şurası Parlament Assambleyasının Azərbaycanda siyasi məhbuslar üzrə məruzəçisinin Azərbaycana gəlməsi üçün viza verilməməsi davam edib.

Hesabatın Pis Rəftar və Saxlanma yerlərində Ölüm bölməsində göstərilir ki, işgəncə və pis rəftar davam edir. İşgəncələrə Qarşı Azərbaycan Komitəsinin məlumatına görə, həbsxanalarda pis rəftarla bağlı 89 nəfər müraciət edib.

Yanvar ayında polis 31 yaşlı Elvin Əsgərovu saxlayandan sonra o ölüb. Avqustun 24-də 31 yaşlı Turac Zeynalov Naxçıvan Muxtar Respublikası Milli Təhlükəsizlik Nazirliyinin saxlama kamerasında ölüb. Sentyabrda Turac Zeynalovun ölümü ilə bağlı araşdırma aparan AzadlıqRadiosunun Azərbaycan xidmətinin əməkdaşını təhlükəsizlik nazirliyinin əməkdaşları saxlayaraq deportasiya ediblər.

ŞƏHƏRİN «GÖZƏLLƏŞDİRİLMƏSİ»

Hesabatda Evlərdən Məcburi Köçürülmə və Qanunsuz Söküntülər haqqında deyilir ki, 2009-cu ildən Bakının «gözəlləşdirilməsi» adı altında yüzlərlə sakin evindən məcburi çıxarılıb. Onlara qarşı bəzən fiziki gücdən də istifadə olunub.

Məcburi köçürülməyə hüquq müdafiəçisi Leyla Yunus da məruz qalıb.

Hesabatın Din Azadlığı bölməsində bildirilir ki, 2010-cu ilin iyununda qanunvericiliyə dəyişiklik edilib. Bu dəyişikliklərə görə, icazəsiz dini fəaliyyətin qarşısını almaq üçün cərimələr qaldırılıb. Dini qruplardan toplantı keçirmək üçün hökumətdən icazə almaq tələb olunur.

İyun ayında Yehova Şahidləri dini icmasının 40 üzvünün iştirak etdiyi yığıncağın qarşısını polis alıb. Polis onları 10 saat sorğu-sual edib. Polis Sumqayıtdakı baptistlərə də icazəsiz toplaşmayla bağlı xəbərdarlı edib.

2010-cu ilin dekabr ayından orta və ali məktəblərə hicabla getmək qadağan olunub. Hicab qadağasına etiraz edənlərdən 5 nəfəri polisə müqavimət göstərməkdə ittiham olunaraq 2 il yarım azadlıqdan məhrum edilib.

2011-ci ilin yanvarında qeydə alınmamış İslam Partiyasının sədri Mövsüm Səmədov həbs olunub. O, prezident İlham Əliyevi tənqid edəndən sonra həbs edilib. 12 il azadlıqdan məhrum edilib.

Hesabatın Hüquq Müdafiəçiləri bölməsində deyilir ki, yerli hüquq müdafiə təşkilatının rəhbəri Vidadi İsgəndərov həbs olunub. O, parlament seçkilərinə müdaxilədə ittiham olunaraq 3 il azadlıqdan məhrum edilib. Vidadi İsgəndərov apreldə icazəsiz aksiyada iştirak etdiyi üçün iki dəfə qısa müddətli həbs olunub. Vəkil Xalid Bağırov Vəkillilər Kollegiyasının üzvlüyündən çıxarılıb. Vəkil Elçin Namazov isə həm vəkillikdən çıxarılıb, həm də onun haqqında cinayət işi açılıb.

Mart Azərbaycan İnsan Hüquqları Evinin fəaliyyəti dayandırılıb. Həmin ay Ədliyyə Nazirliyi Milli Demokratiya İnstitunun fəaliyyətini dayandırıb.

Hesabatda o da bildirilir ki, Avropa Birliyi, ATƏT və ABŞ-ın Bakıdakı səfirliyi gənc fəalların həbsi, mülki hüquqların pozulması ilə bağlı narahatlıqlarını bildiriblər. Avropa Şurasının insan haqları üzrə komissarı Thomas Hammarberg ifadə, birləşmə və sərbəst toplaşma azadlıqlarını təmin etmədiyi üçün Azərbaycan hökumətini tənqid edib.

http://www.azadliq.org/content/article/24459321.html

AXCP ÜZVÜNÜN TƏHDİDİ İLƏ BAĞLI DİN-ə MÜRACİƏT EDİLDİ

2012-01-13T01:34:00.001-08:00

Son xəbər

AXCP ÜZVÜNÜN TƏHDİDİ İLƏ BAĞLI DİN-ə MÜRACİƏT EDİLDİ

2012-01-13

Siyasi Azadlıqları Müdafiə Alyansının (SAMA) müxalifətçi xanımın təhdid edilməsi ilə bağlı daxili işlər naziri Ramil Usubova və İnsan Hüquqları üzrə Müvəkkili Elmira Süleymanovaya müraciət edib. Müraciətdə bildirilir: “Narahatlıqla bildiririk ki, son günlər Azərbaycan Xalq Cəbhəsi Partiyasının fəalı, təşkilatın Nizami rayon Qadınlar Şurasının sədri və həmin rayon ərazisində yaşayan Xəlilova Kəmalə Kamal qızına naməlum şəxslər tərəfindən təhdidlər edilib. Belə ki, tanımadığı iki nəfər şəxs ona yaxınlaşaraq ictimai fəaliyyətinə son qoymağı, əks halda çətinliklərlə üzləşəcəyini söyləyib.

Xəlilova AXCP-nin fəaliyyətində iştirak etdiyi üçün anonim zənglərlə hədələnib. Kəmalə Xəlilova İnsan Hüquqlarının və Əsas Azadlıqların Müdafiəsi Haqqında Avropa Konvensiyada nəzərdə tutulan yığıncaqlar və birləşmək azadlığı hüququndan istifadə etdiyinə görə təqib olunur. Bu proses son günlər ardıcıl xarakter alıb. Biz baş vermiş hadisənin Xəlilovanın siyasi fəaliyyət imkanlarının məhdudlaşdıırlmasına yönəldiyini qeyd edərək, bunu Azərbaycan Respublikası Konstitusiyasında təsbit olunmuş - hər kəs istənilən birlik, o cümlədən siyasi partiya, həmkarlar ittifaqı və digər ictimai birlik yaratmaq və ya mövcud birliyə daxil olmaq hüququna qarşı yönəldiyini bildiririk. Eyni zamanda bu hadisənin Azərbaycan Respublikası Cinayət Məcəlləsinin tələblərinin (siyasi, irqi, milli, etnik, mədəni, dini, cinsi və ya beynəlxalq hüquq normaları ilə qadağan edilmiş digər əsaslara görə müəyyən edilmiş hər hansı bir qrupu və ya təşkilatı təqib etmə, yəni qrupa və ya təşkilata mənsub olduqlarına görə insanları əsas hüquqlardan kobudcasına məhrum etmə) pozulmasına yönəldiyini, bununla da cinayət məsuliyyəti yaratdığını qeyd edirik”. SAMA K.Xəlilovaya qarşı təhdidləri siyasi xarakterli hesab edərək, onun Konstitusiya və müvafiq qanunları əsasında hüquqi müdafiəsinin təşkil olunmasını vacib sayır: “Biz bu hadisəni kobud qanun pozuntusu hesab edərək, ağır nəticələr verəcəyini bildirir və xahiş edirik ki, öz səlahiyyətinizə uyğun olaraq, Xəlilovaya yönələn təhdidlərin qarşısının alınması və bu əməlləri törədən şəxslərin qanun qarşısında cavab verməsi üçün tədbirlər görəsiniz” - deyə müraciətdə bildirilir.

MÜSAVAT QURULTAYININ VAXTI

2012-01-08T01:46:00.003-08:00

Siyasət

MÜSAVAT QURULTAYININ VAXTI VƏ İSA QƏMBƏRİN BAŞQANLIQDAN GEDƏCƏYİ TARİX...

2012-01-08

Partiya Məclisinin toplantısında 2011-ci ilin yekunları dəyərləndirildi; gərgin keçən toplantıda başqanlığa namizəd məsələsi müzakirə olundu
İsa Qəmbərin prezidentliyə vahid namizəd olması təklif edildi

Dünən Müsavat Məclisinin toplantısı keçirildi. İclasın gündəliyinə yeni seçilmiş rayon təşkilatları sədrlərinin səlahiyyətlərinin təsdiqi, ictimai-siyasi vəziyyət, qarşıda duran vəzifələr, partiyanın VIII qurultayının keçirilməsi, qurumun 2012-ci ildəki fəaliyyət istiqamətləri daxil idi. İclas Müsavatın himinin oxunması ilə bağladı. Sonra konfrans zamanı seçilən 36 rayon təşkilat sədrlərinin səlahiyyətləri təsdiq olundu.

Mehralı İsmayılov Abşeron, Rüfət Əliyev Zəngilan, Yusif Namazoğlu Goranboy, Namiq Hacıbəyli Göyçay, Zahidağa Səmədbəyli Hacıqabul, Yasəf Ağazadə Şamaxı, Razim Əmiraslanov Səbayel, Akif Şahbazlı Şabran, Ramiz Xəlilov Laçın, Niyazi Nəsibov Xəzər, Xeyrulla Balaxanılı Nəsimi, Ağahüseyn Mahmudbəyli Mingəçevir, Ayvazalı Oruclu Ağstafa, Tarif Əliyev Astara, Oruc Novruzov Qax, Subatay Quluzadə Göygöl, Əli Babayev Neftçala, Fəxrəddin Abbas Sumqayıt, İltizam Əkbərli İmişli, Vilayət Abuşov Kürdəmir, Rəşid Nəcəfli Ağcabədi, Rufulla Yolçuyev Ağsu, Akif Məmmədli Balakən, Vahid Rəhimli Qobustan, Nazim Əliyev Qubadlı, Həqiqət Mikayıllı Oğuz, Həbibulla Manaflı Şəki, Nizami Əliyev Şəmkir, Hacı İzzət Məmmədli Cəbrayıl, Hacıbaba Həmzəyev Füzuli, Sahib Məlikzadə Qəbələ, Yavər Babazadə Siyəzən, Heybət Əmrah Xaçmaz, Tahir Cəlilov Ağdaş, Yusif Mehdixanlı Biləsuvar, Aydın Ələkbərov Yevlax və Rövşən Atakişiyev Şuşa təşkilatının sədri seçiliblər. Neftçala və Ağdaş sədrlərinin səlahiyyətləri təsdiqlənməmiş saxlanıldı.

Sonra Müsavat başqanı İsa Qəmbər hesabat xarakterli çıxış edərək dedi ki, 2012-ci ildə partiyanın hədəflərindən biri də səylərin artırılması, gücün bu istiqamətdə birləşdirilməsidir. İ.Qəmbər İctimai Palatanın (İP) ötən il üçün fəaliyyətini irəliləyiş kimi dəyərləndirdi: “Ölkədə azadlıqları bərpa etmək üçün müxtəlif aksiya və mitinqlər keçirilib. 2 aprel aksiyası 2011-ci ilin ən güclü aksiyası oldu. Bu aksiya hakimiyyəti ciddi şəkildə narahat etdi, beynəlxalq aləmin diqqətini çəkdi. Mitinqə görə saxlanılan Arif Hacılı, Tural Abbaslı, Əhəd Məmmədli, Rüfət Hacıbəyli, Elşən Həsənov, cəbhəçi dostlarımız, müstəqil gənclər hələ də azadlığa buraxılmayıb. Onların həbsdə saxlanması isə iqtidarın ciddi səhvidir. Hakimiyyət 2012-ci ilə siyasi məhbussuz girmək şansını itirdi”.
İ.Qəmbər baş verən proseslər fonunda gənclərin atdığı addımların əhəmiyyətini vurğuladı. Ə.Məmmədli ilə R.Hacıbəylini müşavir təyin etdiyini deyən İ.Qəmbər vaxtilə YAP üzvü olmuş Ülvi Quliyevin məhkəmələrə meydan oxuyaraq Müsavat sıralarına qoşulduğunu xatırlatdı: “Ülvi bəy bu addımı ilə Müsavatın ümid yeri olduğunu xalqa nişan verdi”.
İ.Qəmbər fevralın 19-da “Təbriz” kinoteatrında, oktyabrın 7 və 8-də partiyanın qərargahında “Müsavat-100" silsiləsindən olan tədbirləri xatırlatdı. Müsavat başqanı bildirdi ki, yubiley münasibətilə qərargahda keçirilən Beynəlxalq Liberal Forumu müstəqillik dönəminin ən önəmli tədbirlərindən idi.

İ.Qəmbər yazıçı Rafiq Tağının qətli ətrafındakı mübahisələrə də toxundu: “Bir Azərbaycan yazıçısı, publisisti, jurnalisti xaincəsinə qətlə yetirildi. Ölümünə nail ola bilməyənlər onu xəstəxanada qətlə yetirdilər. Müsavat Partiyası olaraq buna münasibət bildirdik. Qətlin üçüncü günü Müsavat Partiyası bəyanat verərək qatillərin tapılmasını tələb etdi. O zaman bildirdik ki, bu qətl cəmiyyəti parçalamağa yönəlib. Qətldən 40 gün keçib. Amma qatillər hələ də tapılmayıb. Noyabrın 24-ü İP yazıçının xatirəsini yad etdi. Ondan sonra baş verən narazılığa münasibətimizi bildirdik. Hər şey aydınlaşmış kimi görünürdü. Amma Rafiq Tağının qırxı ərəfəsi müzakirələr yenidən başladı. Bu mübahisələrin fonunda hakimiyyətlə mübarizə ikinci plana düşür. 1989-90-cı illərdə Sovet İttifaqına qarşı ateist, millətçi, inanclı hamı birləşib birgə mübarizə aparırdı. Məqsədimiz Azərbaycanı onun ateistini də inanclısını da alçaldan hakimiyyətin əlindən almaqdır. Yanaşmamız budur. Fikir, söz azadlığına qarşı deyilik. Amma dostlarımızın da bu kimi müzakirələrə məsuliyyətlə yanaşmasını xahiş edirəm”.
Müsavat başqanı dünyada və Azərbaycanda başlayan proseslərin davam edəcəyini dedi: “İranın demokratikləşməsi məsələsi dünyanın gündəmindədir. Rusiya cəmiyyəti ayağa qalxıb. Orta Asiya xalqları haqlarını tələb edir. Azərbaycan da bu proseslərdən kənarda qalmayacaq”.

“Müxalifətin vahid namizədi İsa Qəmbər olmalıdır”

Qeyd edək ki, iclasın önəmli hissəsi yanvarın 8-də İP Koordinasiya Şurasına keçiriləcək seçkilərə həsr olundu. Müsavat başqanı İP üzvü olan müsavatçıları Koordinasiya Şurasında (KŞ) təmsil olunan 13 nəfərə, eyni zamanda politoloq Leyla Əliyevaya və Vaqif Hacıbəyliyə səs verməyə çağırdı. Partiya sədri dedi ki, cəbhəçi cəbhəçiyə, müsavatçı isə ancaq müsavatçıya səs versə, bu qurumun adı İP olmayacaq.
Məclis üzvü Elşad Paşasoy bildirdi ki, 2012-ci ilin fəaliyyət proqramında yer alan məsələlərin həyata keçməsi üçün iqtidarla dialoqun reallaşmasına çalışmaq lazımdır: “Çünki mövcud şərtlər daxilində bu müddəaların həyata keçirilməsi birtərəfli qaydada mümkün deyil. Odur ki, fəaliyyət proqramına dialoq mövzusunu da əlavə etməyə ehtiyac var”.
Müsavat Məclisinin sədri Arzu Səmədbəyli dedi ki, müxalifət, o cümlədən Müsavat Partiyası mütəmadi olaraq dialoqla bağlı mövqeyini açıqlayıb, hətta iqtidara müvafiq sənəd də təqdim edilib.
Məclis üzvü Rafiq İsmayıl partiya rəhbərliyindən soruşdu ki, Arif Hacılı başqan seçiləcəyi təqdirdə müavinlərini necə seçəcək. A.Səmədbəyli öncə Müsavat başqanlığına namizədliyini irəli sürməyəcəyini dedi: “Arif Hacılı başqanlığa namizədliyini irəli sürməkdə qərarlıdır. Mən Arif Hacılı həbsdə ola-ola namizədliyimi irəli sürməyəcəyəm”.

Müsavat başqanının müşaviri, Məclis üzvü Mustafa Hacıbəyli isə bildirdi ki, partiyada rəqabət mühiti, başqanlığa namizədlər olmalıdır. O, kütləvi aksiyaların tərəfdarı olduğunu da bildirdi. Dedi ki, partiya icazəli aksiyaların keçirilməsindən imtina etməməlidir: “Bəzən hətta razılaşdırılmış yerdə mitinqin keçirilməsinə etiraz edirlər. Məncə, bu barədə müzakirə aparılmalıdır”.
M.Hacıbəyli qurultayın tez bir zamanda keçirilməsi və İ.Qəmbərin prezidentliyə namizədliyinin irəli sürülməsi təklifi ilə də çıxış etdi: “Bu, onun cəmiyyətdə tanınması, imici ilə də bağlıdır. Rəsul Quliyevin, Əli Kərimlinin prezidentliyə namizədliyi ilə bağlı da cəmiyyətdə fikirlər dövriyyəyə buraxılıb. Hesab edirəm ki, müxalifətin vahid namizədi İsa Qəmbər olmalıdır. Qurultayda bu məsələyə aydınlıq gətirilməli, mübahisələrə son qoyulmalıdır”.
Məclis üzvü Sabir Məmmədli isə çıxışını tənqidi fikirlər üzərində qurdu: “Heç bir ölkədə hakimiyyət kiməsə boşqabda verilmir. İqtidarın cızdığı xətdən kənara çıxa bilmirik. Biz bundan qaçmalıyıq. Bizim müxalifətçiliyimiz ”Yeni Müsavat" qəzetinin müxalifətçiliyi qədərdir. Nə çox, nə az... İnternetdə, sosial şəbəkələrdə də fəallaşmaq lazımdır".

Divan üzvü Qubad İbadoğlu ölkədəki iqtisadi durum, sosial vəziyyəti barədə danışıb iqtidarın iqtisadi islahatlarını, təqaüdçülərə münasibətini tənqid etdi.
Müsavat Partiyası Gənclər Təşkilatının təmsilçisi Səxavət Soltanlı isə bu il Müsavatçı Gənclər Forumunun keçirilməsi, bununla bağlı Təşkilat Komitəsinin yaradılması təklifini irəli sürdü.

E.Paşasoy çıxışında “Yeni Müsavat”a olan ittihamlara münasibət bildirdi. O, fikir müəlliflərini ədalətli olmağa çağırdı: “Mən Sabir bəyin bu ittihamlarını ”Yeni Müsavat"ın 22 yaşına və 5000-ci sayına “təbrik”i kimi qiymətləndirirəm. Amma unutmaq olmaz ki, bu təbrikdən uzun illər qəzetin təsisçisi olmuş Müsavat başqanına da “pay düşür”. “Yeni Müsavat”ın uzun illər ərzində demokratik düşərgənin həyatında oynadığı rolu, azad fikrin tribunasına çevrildiyini heç kim unutmamalıdır".
E.Paşasoy dedi ki, mitinqlər məsələsi gündəmə gələndə Bibiheybət də təklif olunsa, ora getmək lazımdır.
Məclis üzvü Tarif Əliyev isə partiyanın və İctimai Palatanın dəstəyi ilə xaricdən yayımlanan müstəqil televiziya kanalının açılması istiqamətində işlərin görülməsini təklif etdi.

Çıxışlardan sonra qurultayın vaxtı müəyyənləşdirildi. Müsavat Məclisi qurultayın bu il martın 3-4-də keçirilməsi barədə qərar qəbul etdi. Məclis üzvləri partiyanın 2012-ci ilə dair fəaliyyət proqramına əlavə və təkliflər də etdilər. Sənəd səs çoxluğu ilə qəbul olundu. Sənəddə cəmiyyətdə bərabərhüquqlu rəqabət şəraitinin yaradılması, söz və mətbuat azadlığının təmin olunması, sərbəst toplaşmaq azadlığı hüququnun bərpası, seçki komissiyalarının paritet əsasda formalaşdırılması, proporsional seçki sisteminin bərpası, siyasi partiyaların dövlət büdcəsindən maliyyələşdirilməsi, seçkiqabağı demokratik şəraitin yaradılması üçün mübarizənin aparılması, kütləvi aksiyaların keçirilməsi, siyasi və vicdan məhbuslarının azad edilməsi istiqamətində fəaliyyət, növbədənkənar parlament seçkilərinin keçirilməsi uğrunda mübarizənin gücləndirilməsi, mülkiyyət hüququnun qorunması, neft və digər təbii sərvətlərdən gələn gəlirlərin ədalətli bölüşdürülməsi, İTV-də müxalifətə efir vaxtının ayrılması məsələləri daxil edilib.
Sənədin partiya quruculuğuna dair hissəsində qurultayın keçirilməsi partiyanın rəsmi internet səhifəsinin hazırlanması, islahat proqramlarının təkmilləşdirilməsi, demokratik düşərgənin toparlanması istiqamətində vətəndaş cəmiyyəti institutları ilə, ayrı-ayrı sosial təbəqələrin nümayəndələri əlaqələrin genişləndirilməsi, İP-in strukturunun möhkəmləndirilməsi, Rəsulzadə-Elçibəy yolunda olan partiyaların vahid mərkəzdə birləşdirilməsi, AXCP ilə müttəfiqlik münasibətlərinin yeni siyasi şəraitə uyğun davam etdirilməsi qeyd olunub. Fəaliyyət planında beynəlxalq əlaqələrin genişləndirilməsi istiqamətdə də məqamlar qeyd olunub.
Qurultayın yerinin müəyyənləşdirilməsi və hazırlıq işləri Divana və Qurultaya Hazırlıq üzrə Təşkilat Komitəsinə həvalə olundu. Ötən il aprelin 2-də keçirilmiş etiraz aksiyasında saxlanılanların azadlığa buraxılması tələbi ilə bəyanat qəbul edildi. Sonda İ.Qəmbər bəzi partiya üzvlərini təşkilatın işində fəal iştiraka görə Müsavatın 100 illiyi diplomu ilə təltif edib. Tədbir himnimizin oxunması ilə yekunlaşdı.

ZİYA MƏMMƏDOVUN VİLLASINDA DÖYÜLƏN JURNALİSTİN GÖZLƏRİ TUTULUR

2012-01-08T01:46:00.001-08:00

Media

ZİYA MƏMMƏDOVUN VİLLASINDA DÖYÜLƏN JURNALİSTİN GÖZLƏRİ TUTULUR

2012-01-08

Elmin Bədəlov: “Döyülən zaman başımı üç dəfə asfalta vurmuşdular”

2010-cu ilin iyulunda nəqliyyat naziri Ziya Məmmədovun villasının fotosunu çəkən zaman vəhşicəsinə döyülən “Yeni Müsavat” qəzetinin əməkdaşı Elmin Bədəlovun gözlərində ciddi problemlər yaranıb.

Nazirin Şüvəlandakı villasında döyüləndən sonra jurnalistin səhhətində problemlər olsa da o, bunu ciddiyə almayıb. Nəticədə E.Bədəlovun gözləri zəifləyib. Jurnalist deyir ki, gözlərinin zəifləməsi ilə bağlı həkim rəyi də var: “Döyülən zaman başımı üç dəfə asfalta vurmuşdular. Həmin vaxt ekspertiza sənədlərində də başımdan travma aldığım yazılmışdı. Əvvəllər bunu o qədər də ciddiyə almadım. Ancaq zaman keçdikcə bunun fəsadları əmələ gəldi. Artıq gözlərim uzağı görmür. Bu günlərdə həkim müayinəsinə getdim. Sağ gözüm 30, sol gözüm 40 faiz görür. Həkimlər deyir ki, müalicə olunmasam, gözlərim tamamilə tutula bilər. Gözlərimdəki zəifləməni travma ilə əlaqələndirirlər. Artıq beş gündür ki, gözlərimə şüa verirlər”.
Qeyd edək ki, 2010-cu il, iyulun 28-də “Milli yol” qəzetinin redaktor müavini Anar Gəraylı və “Yeni Müsavat” qəzetinin reportyoru Elmin Bədəlov Şüvəlanda məmurların dəniz kənarındakı villalarının şəklini çəkərkən döyülüblər. Nəqliyyat naziri Ziya Məmmədovun qoçuları jurnalistlərə 3 saat müddətində işgəncə veriblər, E.Bədəlovun başını bir neçə dəfə asfalta vurublar. Xəzər Rayon Polis İdarəsi faktla bağlı cinayət işinin başlanmasını rədd edib. Jurnalistlər bundan rayon məhkəməsinə şikayət ediblər. Yerli məhkəmələr şikayəti təmin etmədiyindən jurnalistlər işi Avropa Məhkəməsinə göndəriblər.

Tapdaqıstan. Laplandiya

2012-01-05T13:53:00.001-08:00

Tapdaqıstan. Laplandiya

05/01/2012 at 02:39

Rafiq Tağı məhz bu yazıya görə öldürüldü!

Rafiq Tağının ölümüylə bağlı mübahisələr davam edərkən, çoxdandır adını eşitdiyim “Tapdaqıstan. Laplandiya” yazısı qarşıma çıxdı, daha doğrusu skaner edilmiş variantını bir dostumuzdan əldə etdim.

Yazı-hekayəni sona qədər oxuduqdan sonra qəribə hisslər keçirdim, hər nə qədər hekayədəki obrazlar real adlarıyla təsvir olunmasalar da hekayənin qəhramanlarını və baş verdiyi yeri təxmin etmək o qədər də çətin deyildi.

İnternetdə hekayəni axtarışa versəm də 6 il əvvəl yayınlanmış bu hekayə ilə bağlı heç bir onlayn qaynağa rast gəlmək mümkün olmadı, hətta yazıçının ölümündən əvvəl və sonra hekayələrini, əsərlərini yayınlayan saytlarda da bu hekayəyə rast gəlmədim.

Doğrudan da qəribədir, əgər sosial şəbəkələrdə mübahisələr olmasaydı bəlkə də bu yazı əsla xatırlanmayacaqdı.

Bu hekayənin 6 il əvvəl yayınlandığı ilk və son yer olan Alatoran jurnalı da həmin hekayənin yayınlandığı 6-cı nömrənin pdf versiyasını ümumiyyətlə öz saytından çıxarıb.

Qətllə bağlı bir çox şübhələr və qaranlıq məqamlar var təbii, o öz yerində.

Ancaq hazırkı mənfur və qatil hakimiyyəti tənqid etməkdən çəkinib (təbii ki bu hamıya aid deyil), işin asanına qaçaraq qətlə tipik islam terroru demək yumşaq dillə desək çox böyük zəiflikdi.

Bu hekayə Rafiq Tağının hakimiyyət tərəfindən qətli üçün kifayət idi, hakimiyyət bu qətli məharətlə həyata keçirdi.

Tapdaqıstan. Laplandiya

Əvvəlcə əgər oxumamısınızsa, bəhs etdiyim bu hekayəni buradan oxuya bilərsiniz.

Hekayə vahid sujet xəttiylə yazılsa da fikir dağınıqlığı sezilir.

Hekayədə Tapdaqıstan prezidentinin öz arvadıyla olan münasibəti, qonşu dövlətdə 5 ulduzlu oteldə qumarda uduzduqdan sonra məşhur qumarbazı öldürtməsi, bir jurnalisti öldürmə əmri verməsi və başqa bir ölkənin qadın prezidentiylə eşq macərasından bəhs edir.

Hekayədə adı keçənlər, haqqında bəhs edilənlər:

Tapdaqıstan – Azərbaycan

Tapdaqıstanın prezidenti – İlham Əliyev

Tapdaqıstanın prezidentinin arvadı – Mehriban Əliyeva

Qonşu dövlət – Türkiyə

Öldürülən qumarbaz Mehmet Topçu – Türkiyədə vaxtıyla böyük qumarxanaların sahibi olan, daha sonra qətlə yetirilən Ömer Lütfi Topal

Öldürülən jurnalist – Elmar Hüseynov

Öldürülən jurnalistin atası – Sabir Hüseynov

Laplandiya – Latviya və ya Finlandiya

Laplandiyanın qadın prezidenti Maqda Erle – Latviyanın qadın prezidenti Vayra Vike Freyberqa (Vaira Vike Freiberga) və ya Finlandiyanın qadın prezidenti Tarya Halonen (Tarja Halonen)

Son xəbər proqramı – ANS-in İç Xəbər proqramı

Xronoloji ardıcıllığa diqqət yetirək.

26 iyul 1996-cı ildə Türkiyənin məşhur qumarbazı Ömer Lütfi Topal öldürüldü. Həmin vaxtlar İlham Əliyevin tez-tez Türkiyəyə getdiyi və orada yaşadığı dövr idi. Məhz qumar aludəçiliyidə bu dövrə təsadüf edir.

İlham Əliyevin təşəbbüsüylə Ömer Lütfi Topalın Bakıda da qumarxana açdığı və daha sonra Heydər Əliyevin oğlunun qumar sevdasına əsəbləşərək ümumiyyətlə ölkədə qumara qadağa qoyduğu hər kəs tərəfindən bilinməkdədir.

Türkiyədə Susurluk cinayətinin ictimaiyyətə açıqlanmayan hissələrində o dövrdə Azərbaycan prezidenti Heydər Əliyevin oğlu İlham Əliyevin Ömer Lütfi Topala qumar borcu olduğu qeyd olunub.

Hekayədə, Mehmet Topçunun (Ömer Lütfi Topalın) ona olan qumar borcu üstündə öldürüldüyü bildirilir və həmin illər lotuluq illəri adlandırılır.

Hekayədə Mehriban Əliyevanın qısqanclığı və İlham Əliyevin şorgöz olmasıyla bağlı fikirlər öz əksini tapıb.

Digər maraqlı məqam Tapdaqıstan prezidentinin onu ifşa edən jurnalisti öldürməsiylə bağlıdır.

Hekayədə haqqında bəhs edilən jurnalist 2 Mart 2005-ci ildə qətlə yetirilən Elmar Hüseynovdu.

Hekayədə prezidentin “ağzına bir şey atarlar” deyə düşündüyü jurnalistin atası isə Sabir Hüseynovdur.

Hekayənin ən maraqlı yeri isə sonuna doğru iki prezident arasında baş verən eşq macərasıdır.

Digər hissələrdən fərqli olaraq hekayənin bu hissəsi bir qədər geniş təsəvvür olunur. Hər iki prezidentin təkbətək görüş adıyla intim əlaqədə olma səhnəsi yazıda əks olunub.

Hekayədə Laplandiya prezidentinin qadın olması, Tapdaqıstana səfər etməsi və qadın prezidentin yaşlı olması bu prezidentin real həyatda Latviyanın hekayənin yazıldığı tarixdə prezidenti olan xanım Vayra Vike Freyberqa olduğunu deməyə əsas verir.

Bu hekayə yazılmadan 1 ay öncə Latviyanın qadın prezidenti xanım Freyberqa 3-4 oktyabr 2005 tarixində Azərbaycanda rəsmi səfərdə olmuşdu. 3 Oktyabr 2005-ci ildə isə hekayədə göstərildiyi kimi hər iki prezidentin təkbətək görüşü olub.

Dünəndən içimdə qalan bir şübhəni də gərək sizlə bölüşüm.

Laplandiya həmçinin Finlandiyada yer adıdır. Yazıçının bu adı seçməklə Finlandiya

prezidenti xanım Tarya Halonenə də işarə etmə ehtimalı var.

Finlandiyanın qadın prezidenti Tarya Halonen də bu hekayə yazılmadan qabaq, Latviya prezidentinin Azərbaycana səfərindən 4 gün əvvəl, yəni 29 sentyabr 2005-ci ildə Bakıda rəsmi olaraq qarşılanmışdı və onun da İlham Əliyevlə təkbətək görüşü olmuşdu.

Hekayədə adı keçən Son Xəbər proqramı, çox gümanki ANS-in o dövrdə yayınlanan İç Xəbər verilişini əks etdirir. Hekayədə olduğu kimi ANS telekanalı 2005-ci ilin oktyabr ayında Elmar Hüseynovun qətliylə bağlı video-süjet yayınlayıb.

Rafiq Tağı bu hekayəni 8-30 noyabr 2005 tarixində qələmə alıb.

Bu hekayə Alatoran jurnalında 6 mart 2006-cı ildə çap olunub.

Çox gümanki, bu hekayədən Əliyevlər bir qədər gec xəbər tutub, Elmar Hüseynovun qətl hadisəsi soyumadığı üçün Rafiq Tağını öldürməkdən çəkiniblər, daha doğrusu onun qətlini ertələyiblər və başqa bir ittihamla həbslə əvəz ediblər.

2006-cı ilin noyabr ayında Rafiq Tağı həbs olunub.

Rafiq Tağının bir yazısına görə üzərinə dindarları göndərərək həbs etdirmək və Eynulla Fətullayevin üzərinə xocalıları göndərərək həbs etdirmək eyni mətbəxdən planlanıb.

Bənzər variantlar və bənzər ssenarilər…

Hər iki ittihamda bir qrupun şərəf və ləyaqətinin təhqiri söhbəti gedirdi…

Halbuki hər iki jurnalistin həbsi bir başa bu hakimiyyəti ifşa etdikləri yazılarla bağlı idi.

Hər iki jurnalist həbsdən əvvəlki son yazılarında Elmar Hüseynovun qatilini ifşa etmək istəmişdilər…

2011-ci ilin yenə noyabr ayında Rafiq Tağı bıçaqlanaraq xəstəxanaya gətirilib, səhhəti yaxşılaşmağa doğru gedərkən müəmmalı şəkildə həyatını dəyişib.

2006-cı ildə noyabr ayında Rafiq Tağını öldürə bilməsə də həbs edən hakimiyyət, düz 5 il sonra eyni ayda onun qətlinə fərman verdi…

ps. Yuxarıdakı şəkil 3 oktyabr 2005 tarixində İlham Əliyevlə xanım Frayberqanın təkbətək görüşündən sonra çəkilib.

Yazı içindəki şəkil isə İlham Əliyevin Finlandiya prezidenti xanım Halonenlə görüşündə çəkilmişdir.

GƏNC SİYASİ MÜHACİRLƏR “DİKTATURAYA YOX!” DEDİLƏR

2012-01-04T11:22:00.001-08:00

Gündəm

GƏNC SİYASİ MÜHACİRLƏR “DİKTATURAYA YOX!” DEDİLƏR

2012-01-04

Haaqada

Ötən ilin son günlərində Avropada yaşayan gənc siyasi mühacirlər Hollandiyanın Haaqa şəhərində yerləşən Azərbaycan səfirliyi önündə etiraz aksiyası keçiriblər. Aksiya Azərbaycandakı hakimiyyətə etiraz etmək və həbsdə olan siyasi məhbuslara və ümumilikdə ölkədə demokratiya uğrunda mübarizə aparanlara mənəvi dəstək məqsədi daşıyıb.

Piketdə “ Siyasi məhbuslara azadlıq!”, “ Biz Əliyevlər rejiminə yox deyirik!”, “Avropa Birliyi Əliyevlər rejiminə dəstək verməsin” kimi şüarlar səsləndirilib. Aksiyanı giriş sözü ilə açan təşkilatçı İsa Yusifli çıxışına soyuq hava şəraitinə baxmayaraq aksiyada iştirak edərək vicdan borcunu yerinə yetirən gənclərə, xüsusilə 5 aylıq Həvvaya təşəkkürlə başlayıb. Natiq səfirliyin hər il may ayında büdcəni göyə sovraraq, zanbaqların Bakıya ixracına canfəşanlıqla yardımçı olduğunu, amma səfirliyin binasında Azərbaycanın adının yanlış yazılmasının hakimiyyətin ölkəni hansı mahiyyətlə idarə etdiyini bariz şəkildə göstərdiyini deyib.

Daha sonra 2011-ci ildə dünya miqyasında baş verən xalq hərəkatları və bu hadisələrin fonunda Azərbaycanda da vəziyyətin əvvəlki kimi olmadığını vurğulayan İsa Yusifli ölkədə xalqın bu rejimə qarşı mübarizəsinin yaxın vaxtlarda nəticə verəcəyinə əminliyini vurğulayıb. Ölkədə ötən il ərzində vətəndaşların düşüncə və sərbəst toplaşmaq kimi fundamental hüquq və azadlıqlarının avtoritar rejim tərəfindən daha da boğulduğunu bildirən İsa bəy bu siyahıya vətəndaşların mülkiyyət hüququnun pozulmasını da əlavə edib.

Sonda siyasi məhbusların hamısına dərhal azadlıq tələb edən İsa Yusifli müstəqilliyin lehinə səs verən Arif Hacılının müstəqilliyin 20-ci ilini məhbəsdə qarşılamasını hakimiyyətin ayağına yazılan utanc hadisəsi olduğunu deyib. Ardınca söz alan Həbib Müntəzir aksiya ilə eyni vaxtda İsveçdə hakimiyyətin konsert, gənclərin isə boykot aksiyası keçirdiyini iştirakçılara bəyan edib. Tanınmış fəal öz çıxışında hakimiyyətin ölkə büdcəsini həm ölkə içində, həm də onun xaricində taladığını deyərək rejimi istefaya səsləyib və siyasi məhbusları azad etməyə çağırıb.

Tədbirdə iştirak edən Müsavat Gənclər təşkilatının üzvü Tural Sultan ilk növbədə dostu Rüfət Hacıbəylinin doğum gününü təbrik edib və gənclərə qarşı repressiya siyasətinin hakimiyyətin qorxaqlığı və müstəqil, mütərəqqi düşüncə tərzindən çəkinməsi ilə əlaqələndirib.
Tədbirdə iştirak edən Hollandiyalı gənc siyasətçi Ben Burgers Azərbaycan iqtidarının əməllərinə beynəlxalq ictimaiyyətdə əvvəlki kimi laqeyd yanaşılmadığını deyib. B.Burgers beynəlxalq qurumları Avropanın hüdudları içərisində olan diktatura rejiminə qarşı daha qətiyyətli olmağa çağırıb.

Aksiyanın sonunda Azərbaycanda məruz qaldığı təhdidlər ucbatından Hollandiyaya pənah gətirən məşhur gənc musiqiçi Azər Cırtdanın ifasında etiraz mahnıları səsləndirilib və aksiya uğurla başa çatdırılıb.

http://www.musavat.com/new/Gündəm/115262-GƏNC_SİYASİ_MÜHACİRLƏR_“DİKTATURAYA_YOX!”_DEDİLƏR

Bayrag

2012-01-01T13:53:00.001-08:00

AKSİYA BAŞLADI VƏ BİTDİ

2011-12-30T15:48:00.001-08:00

Son xəbər

AKSİYA BAŞLADI VƏ BİTDİ

2011-12-30

Həmişə olduğu kimi, polis vətəndaşların dinc aksiyasına müdaxilə etdi; 6 nəfər saxlanıldı

Naxçıvanda qondarma ittihamla həbs edilən və işgəncələrə məruz qalan AXCP üzvü Zeynal Bağırzadə ilə bağlı bu gün Naxçıvanın Bakı nümayəndəliyi qarşısına təyin edilmiş etiraz aksiyası başlayıb. "Yeni Müsavat"ın əməkdaşı Elmin Bədəlovun hadisə yerindən verdiyi xəbərə görə, artıq aksiya iştirakçıları nümayəndəliyin yaxınlığındakı parkda toplaşıb, hərəkəət keçiblər. Nümayəndəliyi mühasirəyə alan polis əməkdaşları onlara qarşı zorakılıq tətbiq edib, aksiyanın keçirilməsinə mane olublar. Saxlanılanlar olub.

Reportyorumuzun sözlərinə görə, əsasən AXCP üzvlərindən və Naxçıvandan gələn insanlardan ibarət olan aksiya iştirakçıları "Vasif Talıbova istefa", "Biz azadlıq istəyirik" şüarları səsləndiriblər.

***

E.Bədəlovun verdiyi xəbərə görə, aksiyada 6 nəfər saxlanılıb. Polislər bildiriblər ki, onlar yarım saata qədər azad olunacaqlar. Bununla belə, polis əməkdaşları aksiya iştirakçılarının öz tələblərinin səsləndirmsinə, qətnamə oxumasına imkan verməyiblər.

***

Xatırladaq ki, Zeynal Bağırzadə barəsində CM-nin 310 (Vəzifəli şəxsin səlahiyyətlərini mənimsəmə), 320.2 (bilə-bilə saxta sənədlərdən istifadə etmə), 178.3.2 (dələduzluq külli miqdarda ziyan vurma) maddələri ilə cinayət işi qaldırılıb. Dekabrın 26-da isə Naxçıvan şəhər Məhkəməsi Zeynal Bağırzadə haqqında 3 aylıq həbs qərarı verib. Həbsindən sonra Z.Bağırzadəyə ölümcül işgəncə verilib.

Bəs Tural Abbaslını universitetdən niyə qovurdunuz?

2011-12-28T13:43:00.001-08:00

Ilham Əliyevin ad günü münasibətilə “Rossiya” telekanalında Mixail Qusmanın “Hakimiyyət formulu” adlı müəllif proqramı göstərilib, mən rəsmi divar qəzetlərində həmin proqramın mətninə rastladım, səbrimi basıb oxudum.

Orada Ilham Əliyevlə söhbətinin bir yerində Qusman əlahəzrətə onun şəxsi işini göstərir, deyir: “Düşünürəm ki, siz bunu heç vaxt görməmisiniz”.
Əliyev təsdiqləyir, məlum olur ki, bu, məxfi sənəddir, orada kral həzrətinin Moskva Dövlət Beynəlxalq Münasibətlər Universitetində oxuduğu dövrlə bağlı maraqlı məlumatlar var. Qusman onların bəzilərini açıqladı, biri diqqətimi xüsusi çəkdi. Sən demə, Ilham Əliyev birinci kursda oxuyarkən müəllimlər onun tez-tez dərs buraxmasından şikayətlənirmişlər. Qusman əlahəzrətdən soruşur ki, Moskva Dövlət Beynəlxalq Münasibətlər Institutunun o vaxtkı binasından hara gedirmiş?
Ilham Əliyev isə cavab verir ki, Moskva kimi yeni mühitə düşərkən görməli yerlərlə tanış olmaq üçün vaxtını səmərəli keçirmək vacibdir, ona görə də o, dərsdən institutun yaxınlığındakı mədəniyyət və istirahət parkına qaçırmış.
Əvvəla, biz ilk dəfə eşidirik ki, bir tələbə üçün dərsdən qaçmaq “vaxtını səmərəli” keçirmək deməkdir, həm də qaçdığın yer hansısa istirahət parkıdır. Şəxsən mən tələbə üçün ən vacib, səmərəli yerin ali məktəbin auditoriyası olduğunu fikirləşirdim. Amma gəl gör ki, səmərəlilik məktəbdən qıraqda imiş. Indi sizə aydın oldumu ki, ölkədə təhsilin durumu niyə bu vəziyyətdədir?
Ikincisi, bunlar bu ilin əvvəllərində hazırkı siyasi məhbus Tural Abbaslını “qayıblarının çoxluğunu” bəhanə gətirib Bakı Dövlət Universitetindən xaric etmişdilər. Universitet rəhbərliyi onu bərpa etməmək üçün dirəşmişdi, əsas da onu gətirirdilər ki, dərsə gəlmir, əvəzində vaxtını mitinqlərdə boş-boşuna keçirir. Əlbəttə, bunun ağ yalan olduğunu söyləmək artıqdır, çünki ölkədə mitinqlər bir qayda olaraq şənbə-bazar günlərinə təyin edilir, həmin günlər isə həftəsonu tətilidir, məktəblərdə heç bir dərs-filan keçirilmir.
Amma lap deyək ki, universitet rəhbərliyinin dedikləri doğrudur. Ortada heç bir siyasi sifariş-filan yoxdur, Tural Abbaslını da məhz mitinqlərə gedib dərs buraxdığı üçün qovublar. O zaman sual çıxır ortaya: niyə Ilham Əliyev üçün dərsdən qaçıb parka getmək vaxtını səmərəli istifadə etmək sayılır, amma Turalın bir neçə dəfə dərs əvəzinə mitinqə getməsi onun oxuduğu ali məktəbdən qovulması ilə nəticələnir? Necə ola bilər ki, söhbət Ilham Əliyevdən gedəndə, dərsə girmək əvəzinə hansısa parkda gəzib-dolaşmaq vaxtını sərfəli keçirmək anlamına gəlir, amma başqa birisi korrupsiyaya qarşı, hüquqsuzluğa qarşı, ədalətsizliyə, sümürücülüyə, məmur harınlığına qarşı, Azərbaycanı cənginə alıb aparan bu quldarlıq və quldurluq quruluşuna qarşı etiraz mitinqinə getdiyi üçün universitetdən qovulur?
Və nəhayət: Ilham Əliyevin o dediklərindən sonra ölkədəki bu hakim zehniyyətin hansısa tələbəni mitinqə getdi, siyasi aksiyaya çıxdı, ictimai fəallıq etdi deyə, dərs buraxmaq bəhanəsilə universitetdən uzaqlaşdırmağa hansı mənəvi haqqı qalır? Adama qayıdıb deməzlərmi, siz bu ölkənin mübariz, ləyaqətli, məmləkətin dərdlərinə sahib çıxmaq, onun ağrılarına, acılarına ortaq olmaq istəyən gənclərini saxta, sifarişli qayıblarınızla ləkələməyə çalışıb universitetlərinizdən qovacağınıza dönün vaxtını səmərəli keçirmək üçün az qala, hər gün dərsdən qaçıb istirahət parklarına üz tutan liderinizə baxın?!
Ad gününə 12 tonluq tort bişirənlərdən nə gözləyəsən?
“Azadlıq”ın ad gününün qeyd edildiyi restoranın işıqlarının siyasi səbəblərlə söndürülməsi bir utancdır, rejimin alnında növbəti qara ləkədir. Amma rəzalət yalnız “Azadlıq”ın ad günündə baş vermədi ki...
Elə Ilham Əliyevin ad günündə yaşananlar da bir utancdır. Bütün dünyada artıq sürətlə arxaikləşən, arxivə gömülən şəxsiyyətə pərəstiş, bütpərəstlik kimi zərərli, iyrənc vərdişlərə ikinci nəfəs vermək cəhdidir. Nə olsun, həmin gün bütün şadlıq evlərində işıqlar yanırdı, amma 50 metr uzunluğundakı 12 tonluq tort Azərbaycanın feodalizmə, şahlıqlar dövrünə necə təslim edildiyini ortaya çıxardı, bizi hansı zehniyyətin, təfəkkürün yönəltdiyini göstərdi.
Belə ağılda adamların heç bir hərəkəti bizi təəccübləndirməməlidir. Onlar bundan artığına qadir deyillər. Qabında olan budur onların.
Yazıq Azərbaycana. Yüz kərə yazıq, min kərə yazıq!

TURAL ABBASLİNİN EVİNİ YERLƏ YEKSAN ETDİLƏR-FOTO

2011-12-19T02:39:00.000-08:00

TURAL ABBASLİNİN EVİNİ YERLƏ YEKSAN ETDİLƏR-FOTO

Bu gun Tural Abbaslının evində söküntü işlərinə yenidən davam etdilər.

Söküntü zamanı mənzillərini tərk etməmiş sakinlər, o cüməldən Tural Abbaslının ailə üzvlərini zorla evdən cıxarıblar. Sakinlərə qarşı polislər tərəfindən sərt və kobud zorakılıq əməlləri törədilib. Polislər qadınları sürüyərək döyüblər. Hətta bir qadının barmağını belə sındırıblar.

Polis insanlara qarşı vəhşılik göstərdi. Münaqişə zamanı polislər jurnalistlərə və vətəndaşlara zor tətbiq ediblər. Hadisə yerinə çevik polis alayi da gətirilib. Münaqişə zamanı Tural Abbaslının anası Başxanım Abbaslı, qardaşı Teymur Abbaslı və Müsavat və AXCP partiyasının üzvləri olan gənclər həbs ediliblər.

Rauf Məmmədov, Tural Hacıbəyli. Amid Süleymanov, Dəyanət Babayev, bəstəkar Əlirza Muxtarlı, Başxanım Abbaslı, qardaşı Teymur Abbaslı 21-ci polis bölməsinə aparılıb.
Aldığımız məlumatlara polis bölməsində saxlananların hamısı azad edilib.

Adları çəkilən şəxslər həbsdə olduğu müddətdə binanın söküntüsü davam etdirilib. Sakinlərin isə ev ləvazimatlarını çıxarmağa belə icazə verilməyib. Hüquq müdafiəçilərinin Ağasif Şakiroğlunun BŞİH-nin əməkdaşları ilə apardığı danışıq nəticəsində, binanın söküntüsü 30 dəqiqəlik dayandırılıb. Bu 30 dəqiqə ərzində isə sakinlər yalnız bir sıra götürülməsi mümkün olan ləvazimatları götürüblər. Böyük əşyaları isə xilas etmək mümkün olmayıb.

Qeyd edək ki, hadisə zamanı ölkəyə turist kimi gəlmiş 2 Rusiya vətəndaşıda həbs edilib. Hüquq müdafiəçisi Ağasif Şakiroğlu isə bu hallın Eurovision müsabiqəsi öncəsi ölkədə xarici vətəndaşların taleyinin sual altında qaldığının açıq nümayişi olduğunu bildirib.

Vicdan məhbusu Tural Abbaslinin anası həbs olundu, evi söküldü

2011-12-19T02:16:00.000-08:00

Başxanım Abbaslını zorla polis maşınına mindirirlər

Bu gecə vicdan məhbusu Tural Abbasılının ailəsi polis gücünə evlərindən çıxarılıb. Nəsimi rayon polis idarəsinin rəis müavini Süleyman Nemətovun başçılığı ilə mülki geyimlilərdən ibarət polis dəstəsi vicdan məhbusunun anası Baxşıxanım, qardaşları Teymur və Toğrul Abbaslının həbs edərək 21-ci polis bölməsinə aparıblar.

Həbs olunanlar arasında müsavatçılar Tural Hacıbəyli, Abid Süleymanlını, AXCP üzvləri Dəyanət Babayev və Əliriza Muxtar da olub. Polis Tural Abbaslının yaşadığı binanı mühasirəyə alıb. Az sonra isə binanın sökülməsinə başlanılıb.

Başxanım Abbasova musavat.com-a telefonla bildirib ki, polis ona qarşı xüsusi amansızlıq edib: "Süleyman Nemətov məni zorla, kobudluqla maşına mindirdi. İmkan vermədilər ki, evimin əşyalarını toplayım". B.Abbasova deyib ki, bu işi belə qoymayacaq. Aidiyyatı qurumlara müraciət edəcək: "Ramil Usubovun bu məsələyə münasibət bildirməsini tələb edirəm".

AŞ PA MƏRUZƏÇİLƏRİ 2 APREL MƏHBUSLARINA AZADLIQ İSTƏDİ

2011-12-18T07:16:00.001-08:00

Siyasət

AŞ PA MƏRUZƏÇİLƏRİ 2 APREL MƏHBUSLARINA AZADLIQ İSTƏDİ

2011-12-18

Onlar prezidentdən tutulanların ilin sonunadək azadlığa buraxılmasını xahiş edir

Avropa Şurası Parlament Assambleyasının (AŞ PA) Azərbaycan üzrə məruzəçiləri ölkə prezidentinə müraciət edərək Bakıda mart və aprel aylarında keçirilmiş nümayişlərdən sonra siyasi baxışlarına görə həbs olunmuş 17 nəfərin azadlığa buraxılmasına çağırıblar. Müraciətdə prezident İlham Əliyev bu ilin mart-aprel aylarından keçirilmiş aksiyalara görə tutulan 17 siyasi məhbusun ilin sonunadək azadlığa buraxılması xahiş edilir.

Məruzəçilər - ispaniyalı senator Pedro Agramunt Font de Mora və Malta parlamentinin üzvü Josef Debono Qrex, AŞ Monitorinq Komitəsinin Parisdə cümə axşamı keçirilən Azərbaycana dair müzakirələrindən sonra İ.Əliyevə ünvanladıqları məktubu imzalayıblar.
“Məlumdur ki, 17 adam yazda nümayişlərdən sonra siyasi səbəblərdən həbs olunublar və biz prezidentdən onları ilin sonunadək azad etməyi xahiş edirik” - deyə Agramaunt BBC-nin Azərbaycan xidmətinə müsahibəsində bildirib.
Bəs Azərbaycan hakimiyyəti siyasi məhbusları azad etməzsə, Avropa Şurası ölkəyə qarşı hansı tədbirlər görəcək? İspaniyalı senator bu suala cavab verməkdən boyun qaçırıb. Və o, əlavə edib ki, Azərbaycanda insan haqlarının pozulması halları Rusiya, Ukrayna, Ermənistan və Gürcüstan kimi keçmiş sovet ölkələrində olduğundan daha pis deyil. Parisdə bağlı qapılar arxasında keçirilən müzakirələr “Amnesty İnternational” insan haqları qrupunun son hesabatı üzərində aparılıb. Hesabatda Azərbaycan hökuməti dinc nümayişləri kriminallaşdırmaqda və “ərəb baharı”ndan ilhamlanan nümayişçilərə qarşı mart-aprel aylarında aşırı gücdən istifadə etməkdə ittiham olunur.
Agramunt deyib ki, iclas iştirakçılarının bəziləri Azərbaycana qarşı tənqidlərlə razılaşıb, digərləri isə ölkəni müdafiə edib. Məruzəçi bildirib ki, o, “Amnesty İnternational”ın anti-hökumət nümayişlərindən sonra həbs olunmuş 17 adamı siyasi məhbus hesab etməsini dəstəkləyir və onların dərhal azadlığa buraxılması tələbi ilə razılaşır.
Amma Agramunt Azərbaycan hakimiyyətini tənqid etməyib. “Məlumdur ki, Azərbaycan demokratiyasında problemlər var, amma eyni problemlər Rusiya, Ukrayna, Gürcüstan, Ermənistan və Moldovada da var. Şərqi Avropanın demək olar ki, bütün ölkələrində eyni problemlər var. Demək olmaz ki, Azərbaycanda insan haqları bu ölkələrdən daha pisdir” - deyə ispaniyalı senator bildirib.
O, Avropadan 47 dövlətin üzv olduğu Avropa Şurasının, 17 məhbus azadlığa buraxılmazsa, Azərbaycana qarşı hansı tədbirlər görəcəyini şərh etməyib: “Biz prezidentdən onları azad etməsini istəyirik. Gözləyək, ümid edirəm ki, nəticə yaxşı olacaq”.
Bu arada məlum olub ki, AŞ PA bürosunun Parisdə keçirilmiş iclasında 23-27 yanvar tarixlərində keçiriləcək AŞ PA qış sessiyasının ilkin gündəliyi açıqlanıb. 5 gün davam edəcək sessiyada Azərbaycanla bağlı hər hansı məsələ gündəliyə salınmayıb.
Yanvarın 23-ü üçün iclas gündəliyinə salınan əsas məsələ AŞ PA sədrinin, onun müavinlərinin və komitə üzvlərinin seçilməsidir. Eləcə də AŞ PA-nın qış sessiyasının gündəliyi də yanvarın 23-də təsdiqlənəcək. Sessiyanın sonuncu günündə isə demoqrafik vəziyyət diqqət mərkəzində olacaq. Çağırışların imkanlara çevrilməsi istiqamətində müzakirələr aparılacaq, hesabat dinlənəcək. Sonda Daimi Komitənin konstitusiyasına nəzər salınacaq və sessiya öz işini sona çatdıracaq.

Sulutəpədə evlər sökülür, qarşıdurma olub (VİDEO)

2011-12-14T13:02:00.000-08:00

Dekabrın 14-də Binəqədi rayonu, Xocasənin Sulutəpə yaşayış massivində əməlli-başlı küçə döyüşləri gedirdi desək yanılmarıq.

Dövlət Neft Şirkəti Sulutəpədə söküntü işləri aparılması üçün yaşayış massivinə az qala əməlli-başlı ordu yeritmişdi. Küçələr Neft Şirkətininin təhlükəsizlik xidmətinin əli dəyənəkli, hərbi geyimli əməkdaşları, həmçinin dəbilqəli, əli dəyənəkli-qalxanlı polislərlə doldurulmuşdu. Sakinlərsə evlərinin sökülməsinin qarşısını almaq üçün onlara daş atıb ərazidən uzaqlaşdırmağa çalışırdılar.

Dövlət Neft Şirkətinin prezidenti Rövnəq Abdullayev

Neft şirkətinin işçiləri də dinc durmurdular, sakinləri daşlayır, söyüşlər yağdırırdılar. Polis hər iki tərəfi sakitləşdirməyə çalışsa da müvəffəq olmurdu.

«DƏYƏNƏKLƏ, TƏPİKLƏ DÖYÜRDÜLƏR»

- Burda yaşayansınız?
- Bəli.
- Sizi kim bu günə qoyub?
- SOCAR-ın işçiləri.
- Nə ilə vurdular?
- Dəyənəklə, təpiklə.
- Polis sizi bu vəziyyətdə gördü?
- Polisin özünü də döydülər.

Xəsarətlərdən üzündə-gözündə salamat yer qalmayan Sulutəpə sakini Rəhman Tağıyev deyir ki, Dövlət Neft Şirkətinin təhlükəsizlik işçiləri tərəfindən döyülməyi bir tərəfə, evi də bir anın içərisində yerlə-yeksan edilib.

«ADAMIN EVİNİ BELƏ YIXARLAR?»

- Adamın evini belə yıxarlar? Prezidentin o boyda qərarı var ki, üstüörtülü evi sökmək olmaz. Prezidentin qərarına belə hörmətlə yanaşırlar?

Bu, damını bir gün əvvəl örtüb getdiyini, ikimərtəbəli evinin sökülməsi xəbərini yolda eşidib gəldiyini deyən Şakir Hüseynovdur. Hadisə yerinə gələndə evinin uçurulduğunu görən ev sahibi gözyaşlarını saxlaya bilmədi:

- Evi bələdiyyə sənədi ilə tikmişəm. Heç bir bildiriş, məhkəmə qərarı yoxdur. Bir adam gəlib deməyib ki, bunu tikmək olmaz. Özbaşınalıqdır.

ƏŞYALARI İLƏ BİRLİKDƏ UÇURULAN EVLƏR

Ərazidə bəzi uçurulmuş evlər də vardı ki, sahibləri bundan axşam işdən qayıdandan sonra xəbər tutacaqdılar. Belə evlər əşyaları içərisində ola-ola uçurulmuşdu.

Təqribən saat 5-ə qədər ərazidə evləri uçurmaq üçün fürsət gəzən neft şirkəti işçiləri özləri ilə gətirdikləri ağır texnikayla küçələri dolaşsalar da sakinlərin kütləvi etirazları onlara söküntü işlərini davam etdirməyə imkan vermədi. Sakinlər dedilər ki, «belə hallar tez-tez baş verir. SOCAR işçiləri əraziyə bir də ara sakitləşəndən sonra qəflətən gələcəklər və bir neçə ev də söküb etirazlar altında çıxıb gedəcəklər».

MƏHKƏMƏ QƏRARI OLMADAN...

Dövlət Neft Şirkətinin mətbuat xidmətinin rəhbəri Nizaməddin Quliyevə müraciət etdik:

- Sakinlər deyirlər ki, heç bir bildiriş, məhkəmə qərarı almayıblar.

- Məhkəmə qərarı olmadan heç bir yerdə ev sökmək olmaz. Oralar Binəqədi Oil şirkətinin əraziləridir. Bizim təhlükəsizlik idarəsi onların obyektlərini də qoruyur.

- SOCAR işçiləri evi sökülən sakinləri döyürdülər. Hətta xəstəxanaya aparılanlar da oldu.

- Mən orda olmamışam. Heç nə deyə bilmərəm, yalnız onu deyə bilərəm ki, məhkəmə qərarı olmadan belə şey mümkün deyil.

İCRA MƏMURLARI VƏ POLİS

Hüquqşünas Namizəd Səfərov deyir ki, mülk məhkəmə qərarı olmadan sökülə bilməz. Hətta məhkəmə qərarı olsa belə, ərazidəki söküntü işlərində yalnız icra məmurları iştirak edə bilərlər. Məhkəmə qərarının icrası çətinləşsə, icra məmurları icra yerinə polis də dəvət edə bilərlər ki, icra prosesində asayişi qorusun.

Bu ilin mart ayında prezident İlham Əliyev keçirdiyi müşavirədə sənədsiz evlərin sənədləşdirilməsi ilə bağlı göstəriş verib. Belə evlərin sənədləşdirilməsinə dair ilkin layihə hazırlanaraq Milli Məclisə təqdim olunub.

http://www.azadliq.org/content/article/24421583.html

Azerbaycan polisleri ucun yeni el cantasi

2011-12-13T10:46:00.001-08:00

VİCDAN MƏHBUSLARININ MƏHKƏMƏSİNDƏ DAVA DÜŞDÜ

2011-12-11T14:44:00.001-08:00

Siyasət

VİCDAN MƏHBUSLARININ MƏHKƏMƏSİNDƏ DAVA DÜŞDÜ

2011-12-10

Mülki geyimli şəxslər dəmir barmaqlıqlar arxasındakı siyasətçilərə və əməkdaşımıza hücum etdi; “Yeni Müsavat”ın kamerası sındırıldı

Dünən Bakı Apelyasiya Məhkəməsində İctimai Palatanın keçirdiyi 2 aprel aksiyasında iştirak etdiyi üçün ağır cəzalara məruz qalan 4 vicdan məhbusunun apelyasiya məhkəməsi keçirildi. Prosesdə Müsavat Partiyası Mərkəzi İcra Aparatının rəhbəri Arif Hacılı, partiyanın Gənclər Təşkilatının sədri Tural Abbaslı, AXCP sədrinin müavini Fuad Qəhrəmanlı və AXCP təşkilat şöbəsinin müdiri Məhəmməd Məcidlinin apelyasiya şikayətinə baxılırdı. Məhkəmə prosesi qalmaqalla müşayiət olundu.

Dünənki məhkəmə iclasına İctimai Palata rəhbərliyində təmsil olunan Müsavat başqanı İsa Qəmbər və AXCP sədri Əli Kərimli də qatılmışdılar. Prosesin sonuncu olacağı ehtimalı məhkəməyə gələn müxalifət fəallarının sayını xeyli artırmışdı. Əraziyə cəlb olunan təhlükəsizlik qüvvələrinin sayı da həmişəkindən çox idi.
Vicdan məhbuslarının zala girişi alqışlarla qarşılandı. Onlar yaxşı əhval-ruhiyyədə idi. Məhkəmə nəzarətçilərinin müqavimətinə baxmayaraq siyasi liderlər vicdan məhbusları ilə dəmir barmaqlıqlar arxasından da olsa əl tutub görüşə bildilər.
Məhkəmə iclasının açılışından dərhal sonra Arif Hacılı hakimə ötən prosesdə verdiyi vədi xatırlatdı. Keçən prosesdə hakim zalda çəkiliş aparmağa icazə verəcəyini demişdi. Hakim Vaqif Mursaqulov da A.Hacılının sözlərinə “çəkiliş azaddır” cavabını verdi. Hər şey də elə bundan sonra başladı.

Hakim müsavatçı gənc fəal Səxavət Soltanlının fotoçəkiliş aparmasına etiraz edərək onun çölə çıxarılmasını əmr etdi. Hakim onun zaldan çıxarılmasına dair göstəriş verdi. Bu zaman zala idmançı görkəmli 4-5 mülki geyimli şəxs girdi. Onlar S.Soltanlını zorla uzaqlaşdırmaq istəyəndə Tural Abbaslı buna etiraz etdi. Mülki geyimlilər bu etirazlara məhəl qoymadılar. Onlardan biri dəmir barmaqlıqlar arxasındakı T.Abbaslıya yumruq atanda isə vəziyyət böhran həddinə çatdı. Mülki geyimlilərdən daha 3-ü məhbuslara yumruq atmağa başlayanda zaldakıların hamısı ayağa qalxdı. Zalda “Azadlıq” şüarları səsləndi. Hər kəs hakimdən prosesi tənzimləməyi, sakitlik yaratmağı tələb etdikdə hakim fasilə elan edib zaldan qaçdı.
Fasilə zamanı dustaqları müşayiət edən konvoylar mülki geyimliləri zaldan uzaqlaşdırdı. Qarşıdurma zamanı redaksiyamızın əməkdaşı Leyla İlqarın fotoaparatı təxribat və qarışıqlıq salan mülki geyimlilərdən biri tərəfindən sındırıldı. Şəklinin çəkildiyini görən həmin şəxs zor tətbiq edərək fotoaparatı əməkdaşımızın əlindən alıb məhkəmə zalının döşəməsinə çırpdı. Daha sonra həmin şəxsin məhkəmə işçisi olduğu məlum oldu.

Hakim 40 dəqiqədən sonra geri döndü. Bu zaman Tural Abbaslı ayağa qalxıb söz istədi. Hakim izn vermədi, amma T.Abbaslı çıxışını kəsmədi. Belə olanda hakim növbəti dəfə fasilə elan edib zalı tərk etdi. Onun bu hərəkətinə “nə yaman küsəyən hakimmiş” kimi reaksiyalar gəldi.
Vicdan məhbuslarını müdafiə edən vəkil Əsabəli Mustafayevin zaldakılardan xahiş etdi ki, hakim heyətinin əlinə bəhanə verməmək üçün bir az təmkin göstərsinlər. Bundan sonra o, hakimləri geri döndərə bildi. Hakim V.Mursaqulov geriyə xəbərdarlıqla döndü: “Bir də səs-küy olsa, zalı da boşaldacağam, məhkumları da çıxarıb prosesi keçirəcəyəm”.
Hakim çəkiliş məsələsinə dair izahat verərək dedi ki, guya prosesdə fotoçəkilişə yox, videoçəkilişə icazə verib.
Dövlət ittihamçısı çıxış edərək dedi ki, məhbusların ancaq iki vəkili prosesə qatılıb. O, bunu əsas gətirərək məhkəmənin təxirə salınmasını istədi. Hakim də bunu bəhanə edib prosesi təxirə saldı. Qeyd edək ki, prosesdə iştirak edən vəkillər və məhbuslar iclasın keçirilməsinin tərəfdarı idi. Hakim məhkəmə prosesinin dekabrın 16-da davam edəcəyini bildirdi.
Xatırladaq ki, liderlərin iştirak etdiyi məhkəmə proseslərində hakimiyyət həmişə xüsusi təxribatlar təşkil edir. Sonuncu dəfə belə hal Səbayel Rayon Məhkəməsində keçirilmiş prosesdə qeydə alınmışdı.

Dünənki məhkəmə prosesində baş verən skandala İsa Qəmbər və Əli Kərimli də münasibət bildirib. Müsavat başqanı məhkəmədə baş verənləri siyasi sifariş və qərəz adlandırdı. Dedi ki, hazırda həbsdə saxlanan əqidədaşları “Şərəf”, “İstiqlal” ordenlərinə layiq insanlardır. İ.Qəmbər məhkəmədə baş verənləri Azərbaycan reallığına bənzətdi: “Zalda şərə xidmət edən bir neçə dövlət məmuru, onların buyruğunda duranlar vardı, bir də vardı haqqı-ədaləti müdafiə edən çoxluq. Əgər bizim səyimiz olmasaydı, o çoxluq bir neçə ara qarışdıranı iki dəqiqəyə süpürüb atardı. Bu, eynən ölkədəki vəziyyətdir, xalq hələ səbir edir, hakimiyyəti ağıla, məntiqə, hüquq dəvət edir, bunlara əhəmiyyət verilməsə, onları da süpürüb atacaqlar. 2012-ci il gərgin və maraqlı il olacaq. Bugünkü məhkəmədən çıxardığım nəticə budur”.
Ə.Kərimli baş verənləri məhkəmənin ifşası adlandırdı: “Bu skandal göstərdi ki, hakimlər prosesi qanunauyğun formada aparmaq iqtidarında deyil. Hakimiyyət ictimaiyyətin, medianın diqqətindən narahatdır. Bilirlər vicdan məhbusları kəskin çıxışlar edəcək. Ona görə də süni gərginlik yaradırlar”.
Ə.Kərimli dedi ki, hakimiyyətin məhkəmədəki son təxribatı nə məqsədlə törətməyindən asılı olmayaraq bu, əks-effekt yaratdı: “Növbəti dəfə bəlli oldu ki, mülki geyimli şəxslər hətta Apelyasiya Məhkəməsinin zalına da gəlib müxalifətə qarşı zorakılıq edə, xuliqanlıq törədə bilərmiş. Yaxşı oldu ki, cəmiyyət bu adamların layiqli cavabını verib yerində oturtdu. O da bəlli oldu ki, cəmiyyətin müqavimət gücü o dərəcədədir ki, birilərini hətta məhkəmə zalında da xuliqanlıqdan, qanunsuzluqdan çəkindirə bilir”.

“Yeni Müsavat”ın reportyor qrupu

HƏBSDƏKİ MÜSAVATÇI HƏLƏ DƏ MÜAYİNƏ EDİLMƏYİB

2011-12-08T12:36:00.001-08:00

Ölkə

HƏBSDƏKİ MÜSAVATÇI HƏLƏ DƏ MÜAYİNƏ EDİLMƏYİB

2011-12-08

Rafiq İsmayıl: “Onun müalicəsinə başlansa da problemlər hələ də ciddi olaraq qalır”

Müsavat Partiyası Sabunçu rayon təşkilatının sədri Rafiq İsmayıl həbsdə olan müsavatçı ilə görüşüb. Partiyanın rayon təşkilatının üzvü Elşən Həsənovun səhhətindəki problemlərlə maraqlanan R.İsmayıl “Yeni Müsavat”a bildirdi ki, onun səhhətindəki problemlər hələ də ciddi olaraq qalır.

“Elşən Həsənovu Penitensiar Xidmətin müalicə müəssisəsinə köçürüblər. Bir neçə gün idi ki, müalicə edilmirdi. Ancaq artıq müalicəsi başlanıb. Onun səhhətində çoxlu problemlər var” - deyə R.İsmayıl bildirib.
Bununla belə, E.Həsənovun müalicəsi təsirsizdir. R.İsmayılın sözlərinə görə, E.Həsənov ayaqlarındakı problemlərlə bağlı rentgen müayinəsindən keçirilməli olsa da hələ müayinə edilməyib: “Müayinə üçün başqa xəstəxanaya aparılmalıdır, ya da şəhərdən həkim gəlməlidir. Ancaq hələ müayinə edilməyib. Onun səhhətindəki problemlər bu müayinədən sonra daha dəqiq bilinəcək”.
Amma R.İsmayıl E.Həsənovun ruhdan düşmədiyini söylədi. Qeyd edək ki, E.Həsənovun səhhətində ciddi problemlər yarandığından o, müalicə müəssisəsinə köçürülüb. Yaxınları ona normal tibbi yardım göstərilməməsindən şikayətlənirdilər. E.Həsənov 2 aprel aksiyasına görə həbs olunub. O, iki dəfə mədə əməliyyatı olunub, eşitmə qüsuru var, həm də hepatit C xəstəliyindən əziyyət çəkir. Qeyd edək ki, E.Həsənov mətbuata açıqlamasında dövlət başçısı İlham Əliyevin sinif yoldaşı olduğunu bildirmişdi.

http://www.musavat.com/new/Ölkə/113676-HƏBSDƏKİ_MÜSAVATÇI_HƏLƏ_DƏ_MÜAYİNƏ_EDİLMƏYİB

MTN-dəki işgəncələrlə bağlı videogörüntü yayıldı

2011-12-05T11:24:00.000-08:00

Font Ölçüsü

Oxunub

1339

12Share

PwdByEddie

Turac Zeynalovun doğmaları onun dəhşətli işgəncələrdən öldüyünü sübut etdi

Bu ilin avqustunda Naxçıvan Muxtar Respublikası MTN-in İstintaq Təcridxanasında vəfat etmiş Turac Zeynalovun doğmaları onun işgəncələr nəticəsində öldüyü qənaətindədirlər və obyektiv araşdırma aparılmasında, təqsirkarların cəzalandırılmasında israr edirlər. Onlar həmçinin Azərbaycan hakimiyyətindən təhlükəsizliklərinin təmin edilməsini xahiş edirlər, belə ki, MTN işçiləri şikayətlərini geri almaları tələbi ilə onlara təzyiq göstərirlər.
Təzyiqlərə son qoyulmadığı üçün mərhumun atası Şuriyə Zeynalov və Turac Zeynalovun dul qalmış həyat yoldaşı Gülnar Ağayeva Bakıya gəlmək məcburiyyətində qalıblar. Reportyorların Azadlıq və Təhlükəsizlik İnstitutunda keçirdikləri mətbuat konfransında onlar ailələrinin başına gələn fəlakətlərdən danışıblar.
Ş.Zeynalov qeyd edib ki, oğlu Turac Naxçıvan aeroportunda sürücü işləyirdi. Avqustun 24-də onu saxlayaraq, MR MTN-ə aparıblar. Növbəti gün doğmalarını MTN-ə çağırıblar və Turacın dövlətə xəyanətdə ittiham olunduğunu deyiblər. Onlara Turacı günahını boynuna almağa və ifadə etməyə razılaşdırmaq təklif olunub. T.Zeynalovun atasına və həyat yoldaşına onunla bir neçə dəqiqəlik görüş veriblər.
Həyat yoldaşının sözlərinə görə, Turac hər hansı sənədi imzalamaqdan imtina edərək, heç bir təqsiri olmadığını deyib. “Açıq-aşkar görünürdü ki, Turacı döyürdülər. O, hərəkət edə bilmirdi. Başında yaralar var idi. Müstəntiqdən Turacın bu vəziyyətdə olmasının səbəbini soruşduqda o dedi ki, “onu tərbiyə etmək məqsədilə iki şillə vurublar”. “Amma şillədən insan hərəkət etmək qabiliyyətini itirə bilməz”, deyə Ağayeva bildirib.
Avqustun 28-də məlum olub ki, Turac ölüb. Ş.Zeynalovun sözlərinə görə, yalnız yerli jurnalistlərin və hüquq müdafiəçilərinin səyləri sayəsində oğlunun cəsədini MTN-dən almağa müvəffəq olub. Verilmiş rəyə əsasən, T.Zeynalov “ağ ciyər arteriyalarının trombundan” dünyasını dəyişib.
Lakin jurnalistlərə mərhumun cəsədinin videokadrları nümayiş olunub. Bu görüntülərə baxarkən sarsılmamaq mümkün deyil. Mərhumun cəsədində zorakılıq izləri açıq-aşkar görünür. Boynunun ətrafında ip izləri görünür. Doğmaları hesab edir ki, Turacın başına sellofan torba keçirib boynunda bağlayaraq işgəncə verirdilər.
Bundan başqa, mərhumun bütün cəsədi qançır-qançır idi. Bədəninin müxtəlif hissələrində səthi dəliklər – elektrik cərəyanı ilə işgəncənin izləri var.
T.Zeynalovun ölümündən dərhal sonra doğmalarına təzyiqlər başlayıb. Atasını və həyat yoldaşını narazılıqlarının olmadığı və guya T.Zeynalovun onkoloji xəstəliyi olduğu barədə sənədlər imzalamağa məcbur ediblər.
Doğmalarına həmçinin sentyabrda Naxçıvana gələn hüquq müdafiəçiləri ilə görüşdən imtina etmələri üçün təzyiq göstərilib. Lakin bir müddət sonra özlərinə gələn qohumlar ədalətə nail olmağa başlayıblar.
Buna cavab olaraq Turac Zeynalovun qardaşlarını həbs etmək, 6 yaşlı oğluna təzyiq göstərmək, digər qohumlarını işdən qovmaqla hədələyirlər.
Doğmaları bildiriblər ki, T.Zeynalovun MR MTN-in rəsmi məlumatında deyildiyi kimi onkoloji xəstəliyi olmayıb. Bundan başqa, ölümündən bir ay əvvəl o, tibbi müayinədən keçib və onun heç bir problemi yox idi.
Mərhumun atası və həyat yoldaşı prezident İlham Əliyevə, Heydər Əliyev Fondunun rəhbəri Mehriban Əliyevaya ailənin təhlükəsizliyini təmin etmək və T.Zeynalovun ölümündə təqsirli olanları cəzalandırmaq çağırışı ilə müraciət ediblər.
Ailənin hüquqlarını vəkil Əsabəli Mustafayev müdafiə edəcək. Ailə mərhumun cəsədinin müstəqil tibbi ekspertizasının keçirilməsini tələb edir.
T.Zeynalovanın atası və həyat yoldaşı həmçinin Naxçıvan jurnalistlərinin və hüquq müdafiəçilərinin təhlükəsizliyini təmin etməyə çağırıblar. Onların sayəsində MTN bu işi ört-basdır edə bilməyib.
Xatırladaq ki, T.Zeynalovla birlikdə aeroportun daha 4 sürücüsü həbs edilmişdi. Onların hamısı İranın xeyrinə casusluq etməkdə ittiham olunurdular. Sonradan 3 nəfər azad edilib, bir nəfər isə 10 il müddətinə azadlıqdan məhrum edilib (“Turan”).

"YENİ MÜSAVAT"ın ƏMƏKDAŞI HƏBS OLUNDU (FOTOLAR)

2011-12-03T06:31:00.001-08:00

Son xəbər

"YENİ MÜSAVAT"ın ƏMƏKDAŞI HƏBS OLUNDU (FOTOLAR)

2011-12-03

Emil Salamoğlu peşə borcunu yerinə yetirərkən polis tərəfindən saxlanılıb

Bu gün gənclərin Fəvvarələr meydanında keçirdiyi aksiya zamanı peşə borcunu yerinə yetirən "Yeni Müsavat" qəzetinin əməkdaşı Emil Salamoğlu polis tərəfindən saxlanılaraq həbs olunub.

Əməkdaşımızı naməlum istiqamətə aparıblar.

P.S Polis tərəfindən saxlanılan əmədaşımız Emil Salamoğlu qəzet rəhbərliyinin müdaxiləsi ilə sərbəst buraxılıb. E.Salamoğlu musavat.com-a açıqlamasında bildirib ki, o bir qrup polis tərəfindən təzyiqə məruz qalıb: "Ayağıma vurub, boğazımı sıxdılar. Vəsiqəmi göstərib jurnalist olduğumu desəm də buna məhəl qoymadılar".

HƏBSDƏ OLAN MÜSAVATÇININ VƏZİYYƏTİ PİSLƏŞİB

2011-12-03T06:30:00.001-08:00

Ölkə

HƏBSDƏ OLAN MÜSAVATÇININ VƏZİYYƏTİ PİSLƏŞİB

2011-12-03

Yaxınları onun müalicə olunmadığını bildirirlər

Həbsdə olan müsavatçı Elşən Həsənovun vəziyyəti pisləşib. Müsavat partiyasının Sabunçu rayon təşkilatının üzvü E.Həsənovun səhhətində ciddi problemlər yarandığından, o, müalicə müəssisəsinə köçürülüb. Yaxınları ona normal tibbi yardım göstərilməməsindən şikayətlənirlər.

Onun yaxınlarından Samir Tağıyevin sözlərinə görə, E.Həsənovun yanına üç gün əvvəl gedib və görüş zamanı onun vəziyyətinin yaxşı olmadığını görüb: “Elşəni on günlük Penitensiar Xidmətin müalicə müəssisəsinə köçürüblər. ancaq normal müalicə etmirlər. Deyirlər ki, şəhərdən həkim gələcək, ancaq hələ həkim gəlib müayinə etməyib”.
S.Tağıyev bildirir ki, E.Həsənovun səhhəti gün-gündən pisləşir: “Qaraciyərində, mədəsində problem var. Ayaqları şişib. Ayaqlarında uşaqlıqdan xəstəlik olub, deyir ki, ona görə heç əsgər də aparmayıblar. İndi də ayaqları şişib və özünü yaxşı hiss etmir, rəngi qaralıb. Yayına getdiyimdə heç yaxşı deyildi. Noyabrın əvvəlində də onun yanına getmişdim, vəziyyəti bu qədər çox deyildi".
E.Həsənovun həyat yoldaşı Rəna Həsənova isə qeyd edir ki, bir həftə əvvəl görüşə getdiyi zaman onun vəziyyətinin yaxşı olmadığının şahidi olub: “İki gün idi ki, müalicə müəssisəsinə köçürmüşdülər, ancaq demək olar ki, müalicə etmirdilər. Deyirdilər ki, burada onu müayinə edəcək həkim yoxdur, şəhərdən həkim gəlməlidir”.
Qeyd edək ki, E.Həsənov 2 aprel aksiyasına görə həbs olunub. O, iki dəfə mədə əməliyyatı olunub, eşitmə qüsuru var, həm də Hepatit C xəstəliyindən əziyyət çəkir. Qeyd edək ki, E.Həsənov mətbuata açıqlamasında dövlət başçısı İlham Əliyevin sinif yoldaşı olduğunu bildirmişdi.

R.RƏFİYEVA

Rafiq Tağı xəstəxanada vəfat etdi (yenilənib/FOTOLAR)

2011-11-23T13:49:00.001-08:00

Rafiq Tağını noyabrın 19-da əməliyyat etmiş həkimlərdən biri Nizaməddin Əsgərov "Azadlıq" radiosuna deyib ki, hadisə baş verən vaxt o, Rafiq Tağının yanında olmayıb, amma həkimlərin ona dediyinə görə, yazıçı qusuntu kütləsinin nəfəs yolunu tutmasından ölüb: “Ağır xəstəydi, amma öləsi xəstə deyildi. Ölümündən beş-on dəqiqə əvvəl onun vəziyyəti normal idi. Həkimlər qan təzyiqini ölçmüşdülər. Deyib-gülürmüş. Qəfildən halı pisləşib, yanında olanlar həkimləri çağırıblar. Bizim təxmini fikirləşdyimizə görə, öz qusuntu kütləsindən boğulub ölüb. Dəqiq bilmirəm, ola bilsin ona çay-su veriblər. Nəsə içib, ürəkbulanması olub, kütlə nəfəs yoluna gedib, boğulub, ölüb. Biz başqa səbəb tapa bilmirik. Yenə dəqiq deyə bilmərəm, məhkəmə orqanları öz sözlərini deyərlər”.
***
“Qanun” nəşriyyatınını rəhbəri Şahbaz Xuduoğlu “Media forum” saytına bildirib ki, Rafiq Tağının harada dəfn olunacağı hələ dəqiqləşməyib: “Qardaşları cənazəni rayona aparıb dəfn etmək istəyirlər”.
***
Rafiq Tağının meyiti Səhiyyə Nazirliyinin Məhkəmə Tibbi Ekspertiza və Patoloji Anatomiya Bürosuna aparılıb.
Lent.az-ın məlumatına görə, binanın qarşısında hüquq-mühafizə orqanlarının xeyli sayda nümayəndəsi, jurnalistlər, yazıçılar, həmçinin mərhumun qohumları yığışıb. Bürodan bildirilib ki, ekspertizanın nəticəsi məlum olan kimi bu barədə ictimaiyyətə məlumat veriləcək. ***
Noyabrın 19-da naməlum şəxs(lər)in basqınına məruz qalıb 6 bıçaq zərbəsi ilə bıçaqlanan tanınmış yazıçı, jurnalist Rafiq Tağı Kliniki Tibbi Mərkəzdə dünyasını dəyişib. Hadisə noyabrın 23-də saat 15:30 radələrində baş verib.
Klinik Tibbi Mərkəzin baş həkimi Tərlan Bəbirov mətbuata bildirib ki, R.Tağının vəziyyəti normal olub. Lakin qəfildən vəziyyəti pisləşib.
Xatırladaq ki, noyabrın 19-da axşam saatlarında tanınmış yazıçı Rafiq Tağı evinə gedərkən hücuma məruz qalıb. O, yaralı halda evinə gəlib və sonradan təcili yardım xidməti vasitəsi ilə xəstəxanaya aparılıb.

Faktla əlaqədar Xətai rayon Polis İdarəsinin İstintaq şöbəsində Azərbaycan Respublikası Cinayət Məcəlləsinin 126.1-ci (qəsdən sağlamlığa ağır zərər vurma) maddəsi ilə cinayət işi başlanıb. İş üzrə polis və prokurorluq orqanlarının təcrübəli əməkdaşlarından ibarət əməliyyat-istintaq qrupu yaradılıb.
Cinayət işi istintaqın davam etdirilməsi üçün Baş Prokurorluğun Ağır cinayətlərə dair işlər üzrə istintaq idarəsinə göndərilmişdi. İşin istintaqı Daxili İşlər Nazirliyi və Baş Prokurorluğun rəhbərliyi tərəfindən xüsusi nəzarətə götürülməklə hazırda hadisəni törədən şəxsin müəyyən edilərək məsuliyyətə cəlb edilməsi istiqamətində təxirəsalınmaz istintaq və əməliyyat-axtarış tədbirləri davam etdirilir.
Palataya köçürülən Rafiq Tağı dünən ANS-ə müsahibəsində bildirmişdi ki, ona qarşı baş vermiş hücumun yazıları ilə bağlı olduğunu hesab edir. Yazıçı ehtimal edirdi ki, məhz İran və qloballaşma ilə bağlı yazısına görə bıçaqlana bilər.
Rafiq Tağı 2006-cı ildə isə işlədiyi “Sənət” qəzetində çap etdirdiyi “Avropa və biz” məqaləsinə görə həbs edilib. Dindarlar onun bu məqalədə Məhəmməd peyğəmbərin (S. Ə. S.) ünvanına xoşagəlməz ifadələr işlətməkdə günahlandırmışdı. Nəticədə Rafiq Tağı milli və dini düşmənçilik salma ittihamı ilə 3 il azadlıqdan məhrum edilib və 8 aydan sonra əfv olunub.
Allah rəhmət eləsin!

YAZIÇININ MEYİTİ MÜAYİNƏ OLUNUB

2011-11-23T13:48:00.001-08:00

Son xəbər

YAZIÇININ MEYİTİ MÜAYİNƏ OLUNUB

2011-11-23

Noyabrın 23-də yazıçı Rafiq Tağı Bakıda, müalicə olunduğu 1 saylı xəstəxanada (Klinik Tibb Mərkəzi) vəfat edib. “Media forum” saytı xəbər verir ki, hazırda yazıçının meyiti müayinə olunmaq üçün həmin xəstəxananın morquna götürülüb.

“Qanun” nəşriyyatınını rəhbəri Şahbaz Xuduoğlu “Media forum” saytına bildirib ki, Rafiq Tağının harada dəfn olunacağı hələ dəqiqləşməyib: “Qardaşları cənazəni rayona aparıb dəfn etmək istəyirlər”.

Rafiq Tağı 1950-ci il avqustun 5-də Masallı rayonunun Xoççobanlı kəndində anadan olub.

2011-ci il noyabrın 19-da naməlum adamların bışaqladığı yazıçı 1 saylı xəstəxanada əməliyyat olunmuşdu və burada müalicə alırdı.

Xəstəxananın baş həkiminin müavini Adil Salahov “Trend”ə bildirb ki, noyabrın 23-də qusuntu nəticəsində Rafiq Tağının vəziyyəti pisləşib. Həmin anda qusuntu nəfəs borusuna düşüb. Xəstənin yanında olan şəxslər kömək üçün tibb işçilərini çağırsalar da, yazıçının həyatını xilas etmək mümkün olmayıb. Rafiq Tağı saat 15:40 radələrində dünyasını dəyişib.

Qaytarmaq isətdiyini deyib və... gözləri bərəlib

2011-11-23T13:44:00.001-08:00

Rafiq Tağının son anda yanında olan qardaşı danışdı

Yazıçı Rafiq Tağı vəfat etməzdən az əvvəl onun səhhəti normal olub, lakin vəziyyəti birdən-birə pisləşdiyi üçün palatadan reanimasiya şöbəsinə aparılıb. Həmin vaxt yanında olan kiçik qardaşı İlqar Tağıyev “Azadlıq” radiosuna deyib ki, şöbəyə çatanda artıq Rafiq Tağı vəfat edibmiş: «Həkimləri çağırdıq, süni nəfəs verdilər. Həkim dedi ki, ürəyi dayanıb. Süni nəfəs verə-verə reanimasiyaya apardılar. Artıq ora çatanda keçinmişdi».
İlqar Tağıyev bildirib ki, noyabrın 23-də qardaşı ilə bir saata yaxın söhbət edib, ona xəstəxanadan çıxandan sonra Azərbaycandan getməyi məsləhət görüb: «Dedim Rafiq, bu sonuncudur, xəstəxanadan çıxandan sonra getmək lazımdır xaricə. Dedim bu, sənin təhlükəsizliyin üçün, yazılarını yazmaq üçün, ailəmizin təhlükəsizliyi üçün lazımdır. Amma heç bir söz demədi, reaksiya vermədi dediklərimə. Birdən dedi ki, qaytarmaq istəyirəm. Yanında mən idim, bacım oğlu, bir də mühafizə edən polis».
Yazıçının diğər qardaşı Rəfael Tağıyev isə “ANS”ə açıqlamasında deyib ki, qardaşının yanında olanda tibb bacısı gəlib və Rafiq Tağıya iynə vurub. Daha sonra Rafiq Tağı qatıq istəyib. “Qatıq istədi, alıb gətirdim. Bir az sonra qaytarmaq isətdiyini dedi. Qaytarmasına şərait yaratdım. Qaytarandan sonra isə gözləri bərəldi...”, - deyə İlqar Tağıyev bildirib. Yazçının qardaşı ona kömək edə bilmədiyi üçün özünü günhakar saydığını ifadə edib.
Mərhum yazıçının özü isə ölümündən saat yarım əvvəl “Azadlıq” radiosuna qısa müsahibə verib. Yazıçı özünü yaxşı hiss etdiyini bildirsə də, həkim kimi vəziyyətini “ağır-stabil” deyə qiymətləndirib.
http://azadliq.az/index.php?option=com_content&view=article&id=10682:qaytarmaq-istdiyini-deyib-v-goezlri-brlib&catid=358:ust-manset

Rafiq Tağı narkozdan ayılıb və danışıb

2011-11-20T02:02:00.000-08:00

Rafiq Tağı "Puşkini oxuyan bomj" (Şeir)

Video

Rafiq Tağıya 6 bıçaq yarası vurublar

Video

Rafiq Tağı əməliyyat olundu

Şriftin ölçüsünü dəyiş - +

YENİLƏNİB: 20.11.2011 23:59

Rafiq Tağının həyat yoldaşı və oğlu yazıçının bıçaqlanmasıyla bağlı polisə ifadə verirlər. Bu barədə AzadlıqRadiosuna yazıçının evindən məlumat veriblər.

***
Rafiq Tağının qardaşı AzadlıqRadiosunun müxbirinə deyib ki, əməliyyatdan sonra yazıçının vəziyyəti nisbətən yaxşılaşıb. O həkimlərdən xəstəxanadan nə vaxt çıxarılacağını soruşub.

Yaxınlarının dediyinə görə, hələ ki onları Rafiq Tağıyla görüşə buraxmırlar.

***
AzadlıqRadiosunun müxbiri xəbər verir ki, Rafiq Tağını cərrahiyə şöbəsindən reanimasiya şöbəsinə keçirirlər. Onun vəziyyəti haqda əlavə məlumat verilmir.

***

1 saylı Bakı Klinik xəstəxanadında Rafiq Tağının cərrahiyyə əməliyyatı saat 6 radələrində başa çatıb. Əməliyyatda iştirak edən cərrahlardan biri, Abbas Abbasov AzadlıqRadiosuna bildirib ki, ölüm təhlükəsi olmasa da Rafiq Tağının vəziyyəti kifayət qədər ağırdır. Bunun əsas səbəblərindən biri odur ki, xəstə çoxlu qan itirib, çünki hücumdan sonra özü evə gəlib, telefonla danışıb və bütün bu müddət ərzində bədənində güclü qanaxmalar olub.

Cərrah deyib ki, əməliiyat çox gərgin olub. Çünki xəstənin bədənində 6 bıcaq deşiyi var. Bu yaralar kifayət qədər ağır zədələr törədib. Onun 2 qabırğası sınıb, mədəsi, diafraqması zədələnib, dalağını isə ümumiyyətlə çıxartmağa məcbur olublar. Rafiq Tağının vəziyyətinin ağır olduğunu bildirən Abbasov, daha çox diafraqmanın zədələnməsindən qayğılandığını deyib. "Onu suni nəfəs sistemindən ayırandan sonra vəziyyətə daha aydın qiymət vermək mümkün olacaq" - deyə Abbasov əlavə edib.

***

Muxbirimiz xəstəxandan xəbər verir ki, Rafiq Tağının cərrahiyə əməliyyatının daha 2-3 saat çəkəcəyi gözlənilir. Bu haqda məlumat verən növbətçi həkim Rafiq Tağının vəziyyətinin ağır olduğunu bildirib.

***

Həkim Abbas Abbasov Rafiq Tağının çox qan itirdiyini, buna görə vəziyyətinin ağır olduğunu bildirir. Həkim bildirir ki, o, 5 bıçaq yarası alıb. Yaralardan üçünü təftiş sarıyıblar.

Həkimin dediyinə görə bir bıçaq zərbəsi Rafiq Tağının sümüyünü sındırıb. Qarnından aldığı daha iki bıçaq zərbəsi ilə bağlı isə hələ əməliyyat davam edir. Bu əməliyatın hələ bir müddət çəkəçəyi gözlənilir.

Polisdən hələlik Rafiq Tağının bıçaqlanması ilə bağlı hər hansı açıqlama vermirlər. Polis əməkdaşları onun ailə üzvlərini dindiriblər və hadisə baş verən ərazini araşdırıblar.

***

Rafiq Tağının əməlyatı hələ başa çatmayıb. Xəstəxanaya polislər gəlib. Onlar yazıçının qardaşını dindiriblər.

***

Tanınmış yazıçı Rafiq Tağı noyabrın 19-u axşam saatlarında bıçaqlanıb. Ailə üzvlərindən AzadlıqRadiosuna bildirdiklərinə görə yazıçı sinəsindən və boynundan bir neçə bıçaq zərbəsi alıb. Hazırda xəstəxanadadır. Onlaın sözlərinə görə, Rafiq Tağını təcili cərrahiyyə əməliyyatına götürüblər. Həkimlər Rafiq Tağının həyatına təhlükə olmadığını bildirirlər.

Müxbirlərimiz hadisə yerindədirlər və daha ətraflı məlumat almağa cəh edirlər. Bizi izləyin.

İxtisasca həkim olan Rafiq Tağı Azərbaycanda tanınmış yazıçılardandadır. Onun publisistik yazıları dəfələrlə cəmiyətdə ciddi polemikalara səbəb olub.

2007-ci ildə isə işlədiyi "Sənət" qəzetində çap etdirdiyi "Avropa və biz" məqaləsinə görə həbs edilib. Dindarlar onun bu məqalədə Məhəmməd peyğəmbərin ünvanına xoşagəlməz ifadələr işlətməkdə, xristian dəyərlərini islamdan üstün tutmaqda ittiham edirdilər.

Yazıya görə İranda ayətullah Fazil Lənkərani onun ölümünə fitva da vermişdi.

Bu məqaləyə görə milli, irqi və dini düşmənçiliyi qızışdırmaq ittihamı ilə Rafiq Tağı 3 il, qəzetin redaktoru Samir Sədaqətoğlu isə 4 il müddətinə azadlıqdan məhrum edildmişdi. Amma onlar 8 aydan sonra prezidentin əfv fərmanı ilə azadlığa çıxdmışdılar.

“Uşaqlarımı əvvəl boğub, sonra evi yandırıblar”

2011-11-15T13:26:00.001-08:00

Font Ölçüsü

Oxunub

1159

17Share

PwdByEddie

Vasif Turan: «Tibbi ekspertizanın rəyi ilə tanış ola bilməməyim şübhələri bir az da artırır» «Yanğın zamanı 11 yaşlı uşağın qapını aça bilməməsi, heç olmasa, pəncərədən çölə çıxmaması mümkün deyildi...»
Qobu qəsəbəsində evində baş vermiş yanğın nəticəsində iki övladını itirən “bolgexeber.com” portalının baş redaktoru Vasif Turanın (Soltanlı) başına gələn bu faciə azmış kimi, üstəlik, dövlət orqanları da “yaranın üstünə duz tökürlər”. Söhbət baş vermiş olayla bağlı istintaq orqanlarının apardığı araşdırmalardan gedir. Vasif Turan araşdırmaların obyektiv aparılmaması, günahkarların bilərəkdən məsuliyyətdən kənarda saxlanılmasından şikayətçidir.
Baş redaktorun sözlərinə görə, o, bu ilin iyununda Qobuya köçüb. Hadisədən təxminən 10-15 gün əvvəl Qobu kərpic zavodunun direktoru Rəsul adlı şəxslə torpaqla bağlı mübahisələri düşüb.
Öz evinin yerləşdiyi torpağı Qobu bələdiyyəsinin sədri Ənvər Əmiraslanovdan aldığını deyən Vasif Turan onu da qeyd etdi ki, əlində bunu sübut edən sənədlər var: “Evə çəkilən elektrik xətti qanunidir, işıq kodlaşdırılıb. Yəni, torpaqla bağlı heç bir mübahisə yoxdur. O ki qaldı Rəsul adlı şəxsə, onu tanımıram. O, bizim evdən 100-150 metr aralıda yaşayan qayınanamın torpağının ona məxsus olduğunu iddia edib. Birinci dəfə qayınanamın həyətinə üç nəfər şəxslə ağ “Jeep”də gələrək, ona evdən çıxmağı əmr edib. Iki gün sonra mənim evimə gələrək, böyük oğlum Rüfəti hədələyib, qayınanamdan evi tez bir zamanda boşaltmağı tələb edib. Həmin ərəfələrdə Rəsul mənə də zəng elədi, “bilirsən mən kiməm? Mən ”Sədərək Yusif”in adamıyam” deyərək hədələdi. Mən sənədlərin qanuni olduğunu bildirdim. Ondan xahiş etdim ki, bələdiyyənin sədrilə problemi həll eləsin”.
Vasif Turan deyir ki, qayınanası tək yaşadığından Rəsul mübahisəni onunla həll eləmək istəyirdi: “Rəsulla danışanda bildirdim ki, bizim torpaqlar qanunidir, sənədlərimiz var. Bu yaxınlarda sənədləri bələdiyyə sədri istintaqa təqdim edib. Ənvər Əmiraslanov bildirdi ki, Rəsulun əvvəlki bələdiyyə sədri Mübariz adlı şəxslə müəyyən anlaşması olub. Ancaq heç bir sənədi yoxdur”.
Vasif Turanla söhbət zamanı onu da öyrəndik ki, yanğından təxminən 3 ay əvvəl evdə təmir işləri aparan ustaları üç nəfər qəsəbə sakini döyərək, evi yandırmaqla hədələyiblər. Ustalardan biri elə baş redaktorun qaynı Elbrus olub. Yeri gəlmişkən, bu barədə də istintaqa ifadə verilib.
Həmin vaxt isə məsələ ilə əlaqədar Abşeron Rayon Polis Idarəsinin növbətçi hissəsilə əlaqə saxlayıblar, qəsəbənin sahə müvəkkili Rauf adlı şəxsə məlumat veriblər. Lakin o, kənarda olduğunu bildirərək, gələnə qədər heç yerə şikayət etməməyi məsləhət görüb. Sonradan Vasif Turanı bələdiyyə sədrinin kürəkəni Elnur adlı şəxs bələdiyyəyə dəvət edib. Kəndin ağsaqqalı da ora gələrək, hadisəni törədənləri tənbeh edəcəyinə söz verib.
Vasif Turan deyir ki, başına gələn faciədə şübhələndiyi şəxslərin adlarını istintaqa təqdim edib: “Istintaqın gedişatından ona görə narazıyam ki, izahatımda göstərdiyim hal şahidlərinin əksəriyyəti indiyə qədər dindirilməyib. Tibbi ekspertizanın verdiyi rəylə tanış ola bilmirəm. Ekspertizaya müraciət etmişəm, ancaq ”sənə rəy verilə bilməz” cavabını almışam. Müstəntiqdən ekspertizanın rəyinin istintaqa daxil olub-olmadığını soruşduqda məlum oldu ki, heç bir sənəd təqdim edilməyib. Ancaq bu sənədlə tanış olmağa ixtiyarım var. Çünki istintaqda övladlarımın hüquqi varisi sayılıram.
Müstəntiq Qəhrəman Məmmədovun mənə dediyinə görə, Rəsul istintaqa çağırılıb və izahatı alınıb. Rəsul mənim və qayınanamın dediklərini inkar edib. Hətta ağ “Jeep”in də ona məxsus olmadığını söyləyib”.
Baş redaktorun sözlərinə görə, istintaq hələlik qayınanasını da dindirməyib: “Sonuncu görüşümüzdə də müstəntiqi evə dəvət edib yoldaşımı və qayınanamı dindirməsini istəmişəm. Müstəntiqə dedim ki, övladlarımın 40 mərasiminə hazırlaşıram, ona görə bir müddət Bakıda olmayacağam. Ancaq heç bir dindirmə yoxdur”.
Vasif Turan yas mərasimini yola verəndən sonra özü də araşdırma aparmaq niyyətindədir. “Jurnalistik, bu və ya digər dərəcədə yazılarımızla bağlı zənglər olur. Sayta baxıb, arxivi yoxlayacağam”, - deyə baş redaktor baş verənlərin özünün jurnalist fəaliyyətilə bağlılığı versiyasını da istisna etmir.
Zərərçəkmiş faciə ərəfəsində baş vermiş bir hadisəni də danışdı: “Hadisədən bir həftə əvvəl içində iki nəfər olan ağ ”Jeep” markalı avtomobil evimizi müşahidə edib. Hətta bir dəfə oğlum Rüfət onlara deyib ki, “burada niyə dayanmısız? Atam gəlsin ona xəbər verəcəm”. Bunu mənə yoldaşım dedi. Hadisədən bir gün əvvəl yenə həmin iki nəfər evin ətrafında dolaşaraq çıxıb gediblər”.
Vasif Turan mətbuata açıqlamasında yanğın zamanı evin qapısının qəsdən bağlandığını, partlayış baş verdiyini söyləmişdi. Bu məqama gəlincə, zərərçəkmiş yenə fikrində qalır ki, evi qəsdən yandırılıb və uşaqların çıxmasına imkan verməmək üçün qapı bağlanılıb: “Qapını açmaq istəyəndə arxadan bağlı olduğunu gördüm. Halbuki, qapı indiyə qədər bağlı olmayıb. Işin belə olduğunu görüb pəncərədən içəri girmək istədim. Bu zaman partlayış baş verdi. Həmin vaxt başımdan, ayağımdan xəsarət aldım. Məni orada qəsəbə sakini yanğından xilas eləyə bildi. Bu zaman evin mansarı uçdu. Məni yanğından qoruyan şəxsin də ayağı sındı. O da istintaqa ifadə verib və partlayışın olduğunu təsdiqləyib. Indi iki sual meydana çıxır. Evimizin qapısı necə bağlı ola bilər? Ikincisi də övladlarım azyaşlı olsa da, yanğın baş verən zaman qapını açıb evdən çıxardılar. Mənə elə gəlir ki, uşaqlarımı əvvəlcə boğub, sonra evi yandırıblar. Uşaqlarımın hansı formada həlak olması barədə tibbi ekspertizanın rəyi ilə tanış ola bilməməyim şübhələri bir az da artırır. 11 yaşlı uşağın qapını aça bilməməsi heç cür inandırıcı görünmür. Qapı açılmasaydı belə, 60-70 santimetr hündürlükdəki pəncərədən çölə çıxmaq mümkün idi. Bütün bunlar deməyə əsas verir ki, uşaqlarımı boğublar”.
Vasif Turan yanğının qısaqapanmanın nəticəsi kimi qələmə verilməsinin də əleyhinədir. Fikrini də belə əsaslandırır ki, yanğına qədər evdə partlayış baş verib: “Bunun şahidləri var. Ikinci partlayışı öz gözlərimlə görmüşəm. Evimdə qaz balonu var idi. Yanğın zamanı ona heç nə olmayıb. Çünki o biri otaqda idi. Məntiqlə, yanğın baş versəydi, qaz bolunu partlayardı. Çünki qaz balonu otaqdakı işıq xətlərinin altına qoyulmuşdu”.
Yas mərasimi başa çatandan sonra Vasif Turan tibbi ekspertizanı məhkəməyə vermək niyyətindədir. Həmçinin yaxın günlərdə mətbuat konfransı keçirib, qaranlıq məqamlara aydınlıq gətirəcək: “Yenidən ekspertiza keçirilməsi tələbilə çıxış edəcəm. Istintaq işi düzgün aparmasa, eksqumasiya da tələb edəcəm. Mətbuat vasitəsilə bir daha Ilham Əliyevdən xahiş edəcəm ki, olayın düzgün araşdırılması, günahkarların cəzalandırılması üçün aidiyyəti qurumlara göstəriş versin”.

http://azadliq.info/index.php?option=com_content&view=article&id=10362:uaqlarm-vvl-boub-sonra-evi-yandrblar&catid=351:asagi-manshet

İctimai Palata Bakıda etiraz aksiyası keçirdi (FOTOLAR/VİDEO)

2011-11-15T13:23:00.001-08:00

Polis aksiyanı zorakılıqla dağıtdı; həbs olunanlar var

Noyabrın 15-də İctimai Palata gənclərinin təşəbbüsü ilə Bakı Şəhər İcra Hakimiyyətinin qarşısında etiraz aksiyası keçirilib.

Meriyanın razılıq vermədiyi aksiyaya iştirakçılar iki istiqamətdən başlayıblar. Polis “İçərişəhər” metro stansiyası qarşısında aksiyaçıların bir qrupunun qarşısını kəssə də, digər bir qrup meriyanın binasına yaxınlaşa bilib (media forum).
Polis aksiyaçılara zor tətbiq edib, plakatları alaraq cırıb və bir neçə nəfəri döyüb.

Aksiya iştirakçılarından AXCP Suraxanı rayon şöbəsinin sədri Vaqif Xalıqov, partiya fəalları Məmməd İbrahim,AXCP Gənclər Komitəsinin üzvləri Elçin Həsənov, Dəyanət Babayev,Abdulla Əliyev, Orxan Carçı, Əli Muradlı, Müsavat Partiyası başqanının müavini Tofiq Yaqublu, Müsavat Məclisinin üzvü Mustafa Hacıbəyli, Müsavat Gənclər Təşkilatının üzvləri Rauf Məmmədli, Elnur Əsgərov, Kərim Ağarzayev, Cavid Ələkbərov, Demokrat Partiyası Gənclər Təşkilatının sədri Cəmil Hacıyev saxlanılaraq Səbail rayon 9-cu polis bölməsinə aparılıblar.

Aksiyada “2 aprel məhbuslarına azadlıq”, “İstefa”, “Rədd olsun diktatura” şüarları səsləndirilib.
İştirakçılara aksiyanın qətnaməsini oxumağa imkan verilməyib.

Bir müddət əvvəl gənclər noyabrın 15-də Bakı Şəhər İcra Hakimiyyətinin və ya Bakı Apellyasiya Məhkəməsinin qarşısında piket keçirmək üçün meriyaya müraciət etmiş, piketdə 2 aprel aksiyasına görə tutulanların azadlığa buraxılmasını və sərbəst toplaşmaq azadlığının təmin olunmasını tələb etmək fikrində olduqlarını açıqlamışdılar. Ancaq meriya sözügedən yerlərin heç birində piketin keçirilməsini məqsədəuyğun saymamışdı.

http://azadliq.info/index.php?option=com_content&view=article&id=10391:bakda-etiraz-polis-zoraklq-etdi-hbs-olunanlar-var&catid=358:ust-manset

Ilham Aliyev you are next

2011-10-22T11:24:00.001-07:00

ACLIQ EDƏN MƏHBUS ATALARINA DƏSTƏK BÖYÜYÜR

2011-10-16T02:44:00.001-07:00

Siyasət

ACLIQ EDƏN MƏHBUS ATALARINA DƏSTƏK BÖYÜYÜR

2011-10-16

“Şərq tərəfdaşlığı” ölkələrinin Vətəndaş Cəmiyyəti Forumu hakimiyyətə çağırış etdi

İctimai Palatanın 2 aprel aksiyasına görə həbs olunan AXCP üzvü Elnur Məcidlinin atası Arzuman Məcidli və Müsavat Partiyasının üzvü Rüfət Hacıbəylinin atası İbrahim Hacıbəyli Müsavat Partiyasının qərargahında başladıqları aclıq aksiyasını davam etdirirlər. Aclıq edənlərə baş çəkənlərin ardı-arası dünən gün ərzində kəsilmir. Müxalifət partiyalarının nümayəndələri, ictimai xadimlər aclıq edənlərə baş çəkirlər. Məlumat üçün deyək ki, 2 aprel aksiyasına görə həbs olunan şəxslərlə bağlı yaradılmış Məhbus Ailələri Komitəsinin 18 üzvü var. Komitəyə 2 aprel mitinqində tutulanlarla yanaşı Ruslan Bəşirlinin, Cabbar Savalanın, Bəxtiyar Hacıyevin, Vidadi İsgəndərlinin ailələri daxildir.

Müsavat Partiyasından “Yeni Müsavat” qəzetinə deyiblər ki, aksiya iştirakçısının biri də artıb. Partiyanın Gənclər Təşkilatının sədr müavini Səxavət Soltanlı aksiya iştirakçılarının vəziyyətinin yaxşı olduğunu dedi: “Artıq AXCP-dən Dəyanət Babayev də aksiyaya qoşulub. Onlar siyasi və vicdan məhbuslarının azadlığa buraxılmasını tələb edirlər. 30-a yaxın müsavatçı gənclə bu gün (dünən-red.) aksiya iştirakçılarına baş çəkdik. Onlar dedilər ki, vəziyyətləri yaxşıdır”.
Məhbus Ailələri Komitəsinin sədri Arzuman Məcidli “Yeni Müsavat”a açıqlamasında bildirdi ki, səhhətləri imkan verdiyi qədər aksiyanı davam etdirəcəklər: “Ən azı üç gün aclıq edəcəyik. Etiraz aksiyaları da olacaq. Tələbimiz 2 aprel aksiyaçıları ilə yanaşı Ruslan Bəşirli, Cabbar Savalan, Bəxtiyar Hacıyev, hüquq müdafiəçisi Vidadi İsgəndərli və bütün siyasi məhbusların azad olunmasıdır. Onları qondarma ittihamlarla həbs ediblər”.
Rüfət Hacıbəylinin atası İbrahim Hacıbəyli söylədi ki, bu aksiya azadlıq uğrunda davadır: “Bu, Azərbaycanın azadlığı, demokratikləşməsi uğrunda davadır”.
Dünən “Şərq tərəfdaşlığı” ölkələrinin Vətəndaş Cəmiyyəti Forumu Azərbaycan hakimiyyətini toplaşmaq azadlığı hüququnun pozulmasına son qoymağa və bütün siyasi məhbusları dərhal azad etməyə çağırıb. Bu ictimai qurumun bəyanatında deyilir ki, bu il aprelin 2-də Bakıda keçirilən dinc mitinqdən sonra hakimiyyət 14 müxalifət fəalını müxtəlif müddətli həbs cəzalarına məhkum edib. Onlar xuliqanlıqda və iğtişaş yaratmaqda ittiham olunublar, baxmayaraq ki, aksiya iştirakçıları ölkədə demokratik islahatlar keçirilməsini tələb edirdilər. Məhkəmə prosesləri zamanı ədalətli təhqiqat normaları pozulub, müttəhimlərə qarşı ittihamlar isə siyasi xarakter daşıyırdı və əsassız idi. Bununla əlaqədar olaraq forum Azərbaycan hökumətini siyasi məhbusları dərhal azad etməyə və ifadə və toplaşmaq azadlıqlarına hörmət etməyə çağırır. Forum həmçinin Avropa Şurasını, Avropa Parlamentini, xarici siyasət və Avropa İttifaqının genişlənməsi üzrə Avropa komissarlarını Azərbaycan hakimiyyəti ilə əlaqə yaratmağa və məhbusların azad edilməsini tələb etməyə çağırır.

MTN-in 207 nömrəli əməliyyatı...

2011-10-16T02:43:00.001-07:00

Font Ölçüsü

Oxunub

992

13Share

PwdByEddie

"Çevriliş" ittihamı ilə 8 il həbs yatmış mühacir "Azadlıq"a ilginc məlumatlar verdi
Əsəd Qasımov: "Ziya Bünyadovun qatili deyilən adam mənim yanımda olub"
"Ramin Nağıyevin dedikləri həqiqətdir... Surət Hüseynovu türməyə xərəkdə gətirəndə mən onu tanımadım"
1993-2003-cü illərdə ən çox dəbdə olan həbs növü “dövlət çevrilişi” məsələsi idi. Həmin illərdə həyata keçirilən əməliyyatlarla bağlı sənədləri vərəqləyən olsa, yəqin, fikirləşər ki, Azərbaycan küçənin ortasında sahibsiz qalmış bir araba imiş. Hər yoldan ötən də ona sahiblənmək istəyirmiş. Lakin Əliyevlər hakimiyyətinin polis və güc strukturları bu arabanı göz bəbəyi kimi qorumağı “bacarıblar”. Milli Təhlükəsizlik Nazirliyinin sabiq mühüm işlər üzrə müstəntiqi Ramin Nağıyevin açıqlamaları da Azərbaycanda güc strukturlarına sahiblənmiş bir qrupun yüzlərlə insanı heç bir günahı olmadan həbsə atdığını, zindanlara saldığını təsdiq edir. Və bu gün bu insanlardan bir çoxu xarici dövlətlərdə yaşamaq zorunda qalıblar. Çünki sözün əsl mənasında Azərbaycanda onları yaşamağa qoymayıblar. Azərbaycanda 8 il günə-gün (1997-ci il 8 yanvardan 2005-ci ilin 8 yanvarına kimi) məhbəsdə yataraq sonradan Nederland Krallığında sığınacaq almış Əsəd Qasımovu da vətənində yaşamağa qoymayıblar. 1968-ci il təvəllüdlü Əsəd bəy Bakı Dövlət Universitetində 1984-91-ci illərdə təhsil alıb. BDU-da oxuduğu dövrdə 2 il də sovet ordusunda xidmət edib. Tarixçi olmaq istəyən Əsəd Qasımov tarixi hadisələrin burulğanına elə düşüb ki, indi də həmin günlərin necə gəlib keçdiyini hiss etmədiyini deyir. Indi mühacir həyatı yaşayan Əsəd bəylə dostluq əlaqələrimiz olsa da, ondan müsahibə almaq nədənsə yadıma düşməmişdi. Nəhayət, bu günlərdə “Azadlıq”ın verdiyi tapşırığa uyğun olaraq Əsəd bəylə görüşüb bəzi məqamlar barədə söhbətləşdik.
- Əsəd bəy, öncə ondan başlayaq ki, sizi nə zaman və niyə həbs etmişdilər?
- Məni 1997-ci ilin yanvarın 8-də həbs etdilər. Azərbaycanda təxribatlar törətmək, dövlət çevrilişi etmək kimi ittihamlarla həbs etmişdilər. Məni Milli Təhlükəsizlik Nazirliyinin əməkdaşları saxlamışdılar. 18 ay MTN-in təcridxanasında saxlanıldıq. Məhkəmə hökmü oxunduqdan sonra bizi cəzaçəkmə müəssisəsinə göndərdilər.
- Bizi deyəndə siz neçə nəfər idiniz?
- Öncə bu işlə bağlı 40-a qədər şəxs həbs edilmişdi. Amma məhkəməyə 20 nəfər çıxdı. Bu işin nömrəsi MTN-də 207 saylı işdi. O zaman dövri mətbuat bizim işi “20-lərin işi” kimi adlandıraraq işıqlandırırdı.
- Sirr deyilsə, “banda başçısı” kim idi? Indi deyildiyi kimi, Rasim Ağayev yoxsa..?
- “Banda başçısı” deyəndə konkret şəxs müəyyənləşdirilməmişdı. Hamımız ağır cinayətlərdə ittiham edilirdik. Rasim Ağayevi isə sadəcə olaraq bizim işə istintaqın gedişi zamanı caladılar. Bu da hay-küyü daha da böyütmək üçün lazım idi. Çünki həmin dövrdə DIN, Respublika Prokuroroluğu gündə bir “dövlət çevrilişinə” cəhdin qarşısını “alırdılar”. MTN də sıradan geri qalmamaq üçün bizi həbs edib bir çevriliş şousu yaratdı. Əslində ortada heç bir çevriliş söhbəti və ya cinayət yox idi.
- MTN-də sizin işi araşdıran qrupun rəhbəri kim idi?
- Mühüm işlər üzrə müstəntiq Telman Hüseynov idi. Mən həbsdən çıxanda onu artıq işdən azad etmişdilər. Mənim müstəntiqim isə Eldar Ismayılov idi. Bildiyim qədər hazırda da MTN-də çalışmalıdır.
- Ümumiyyətlə, Əsəd Qasımovu bu cür məşhur cinayət işiylə calaşdıran səbəb nə olmuşdu?
- Məncə, məni sadəcə say artırmaq üçün tutmuşdular. Mənim kimiləri çox idi orda.
- Amma diqqəti cəlb etməyə bir səbəb olmalıydı...
- Səbəb mənim Surət Hüseynovun dəstələriylə birlikdə müharibədə iştirak etməyim idi.
- Surət Hüseynovla əlaqəniz necə yaranmışdı?
- Mənim şəxsən Surət Hüseynovla heç bir əlaqəm yox idi və heç olmayıb da. 1992-ci ildə Xocalı olaylarından sonra mən də bir azərbaycanlı kimi nələrsə etmək istəyirdim. Həmin vaxt OMON bazalarından biri də Bərdədə yerləşirdi. OMON-un mobil rotasının komandiri Nazim Bayramov Bərdədə daha çox məşhur olduğundan onlarla birgə hərəkət etmək istədim. Marquşevan savaşı zamanı mülki şəxs kimi maşınımla onlara silah daşıdım. Bununla da onlarla və Nazim Bayramovla münasibətim yarandı. Nazim Bayramovun OMON-dan ayrılıb Surət Hüseynova qoşulması mənim də avtomatik olaraq onlara qoşulmağıma gətirib çıxardı. Sonradan o da Surət Hüseynovun tərəfdarı kimi 14 il həbs cəzası aldı. Nazim Bayramovu da həmin dəstəyə mən bildiyim qədər “Zobik” ləqəbli avtoritet dəvət etmişdi
- 1993-cü il 4 iyun qiyamı zamanı Gəncədə olmusunuzmu?
- Mən həmin hadisələrdə iştirak etməmişəm. Sadəcə, bu barədə başqa adamlardan məlumat almışam. O zaman mən Bakıdaydım.
- Yəqin ki, “Azadlıq” qəzetində Milli Təhlükəsizlik Nazirliyinin mühüm işlər üzrə sabiq müstəntiqi Ramin Nağıyevin açıqlamalarını oxuyubsunuz. Həmin açıqlamalarda sizin işlə də bağlı bir çox nüanslar var...
- Onun açıqlamalarını oxumuşam. Onun yazdıqları həqiqətən də baş vermiş faktlardır. Onu şəxsən mən tanımıram. Ola bilsin ki, bəlkə də MTN-də saxlanılanda dəhlizlərdə rastlaşmışıq. Onun açıqlamalarında bəzi texniki səhvləri nəzərə almasaq, hər şey reallığı əks etdirir.
- Ümumiyyətlə, siz necə fikirləşirsiniz, həmin dövrdə, yəni, 1993-98-ci illər ərəfəsində baş verən silsilə qətllərə görə həbs edilənlər doğrudanmı etdikləri cinayətə görə həbs ediliblər?
- Ölüm işlərilə bağlı bunu deyə bilərəm ki, türmə dilində desək “mənim podelnikim”in boynuna bunu qoymaq istəyiblər. Afiyəddin Cəlilovla Şəmsi Rəhimovun qətlini Aftandil Məlikovun boynuna qoymağa çalışıblar. Lakin sonra bu alınmayıb. Bunu dəqiq bilirəm. Onlar israr ediblər ki, Aftandil Məlikov bu cinayətləri törədib. Təbii ki, MTN-in təcridxanasında bu israr rol oynamır. Sadəcə, kimə nə qədər iş yükləmək lazım idisə onu yükləyib həbsxayana göndərirdilər. Işgəncələrlə bağlı onu deyim ki, MTN-də işgəncə yox idi. Ramin Nağıyevin yazdığı kimi, məsələn, Rasim Ağayevin qızının cibindən nanəni nəşə adıyla çıxarırdılar.
- Mən bildiyim qədər siz Ziya Bünyadovun qətlində suçlandırılan bəzi şəxslərlə, hətta eyni həbsxanada cəza çəkibsiniz. Onlarla heç səmimi söhbətləriniz olubmu? Bu söhbətlərdə onlar nələrsə etiraf ediblərmi?
- Onlardan biri mən olduğum 11 saylı cəzaçəkmə müəssisəsində yatırdı. Adı Tariyel idi. O deyirdi ki, mən o işdə olmamışam. Tariyelin “Hizbullah”a nə dərəcədə aidiyyatı olub-olmadığını deyə bilmərəm. Dindar və səmimi bir oğlan idi. Bütün günü işi namaz qılıb, Quran oxuyub kasıblara yardım etmək idi. Ziya Bünyadovun qətlini əsaslandırırlar ki, Quranın tərcüməsi zamanı Həzrət Əliylə bağlı səhv edib və buna görə qətlə yetirilib. Amma mən bu barədə konkret bir şey deyə bilmərəm.
- Ümumiyyətlə, məşhur siyasi məhbuslardan kimlərlə birgə eyni cəzaçəkmə müəssisəsində olmusunuz?
- Demək olar ki, hamısıyla. Qapalı həbsxanada da, adi cəzaçəkmə müəssisəsində də. Məsələn, xatırlayıram ki, 2001-ci ildə həbsxanaya Surət Hüseynovu xərəkdə gətiriblər. Onu o günə salmışdılar ki, mən tanıya bilmədim. Nəzarətçilər dedi ki, Surət Hüseynovdur bu.

MÜXALİFƏTÇİLƏRƏ VERİLƏN HÖKM ETİRAZLA QARŞILANDI

2011-10-10T10:24:00.003-07:00

Son xəbər

MÜXALİFƏTÇİLƏRƏ VERİLƏN HÖKM ETİRAZLA QARŞILANDI

2011-10-10

İctimai Palatanın 2 aprel aksiyasında saxlanılan və barələrində cinayət işi açılaraq mühakimə olunan gənc müxalifətçilərin Nəsimi rayon Məhkəməsində aparılan məhkəmə prosesində bu gün hökm oxunub. Belə ki, Şahin Abdullayev Əhəd Məmmədlinin 3, Ülvi Quliyevin 3, Rüfət Hacıbəylinin 1 il 6 ay və Elnur Məcidlinin 2 il müddətinə azadlıqdan məhrum edilməsi barədə məhkəmənin yekun hökmünü elan edib.

İctimai Palatanın Koordinasiya Şurasının üzvü Aqil Səmədbəyli deyir ki, bu məhkəmələr çox açıq və birmənalı şəkildə siyasi sifarişin işlədiyi məhkəmələr idi: “Bunlar Azərbaycanın ədalət tarixinə qara ləkə kimi yazılacaq məhkəmələrdir. Çünki inzibati xəta səviyyəsində belə, dəyərləndirilə bilməyəcək hərəkəti ağır cinayət əməli kimi qələmə verib, onları azadlıqdan məhrum etdilər. Bu, sadəcə olaraq, hakimiyyətin nə qədər qərəzli və siyasi ayrı-seçkiliyə yol verdiyini göstərdi. Çox təəssüf ki, bu məhkəmələr Azərbaycan dövlətini bütün dünyada biabır edir”. A.Səmədbəyli ümid edir ki, Avropa İnsan Haqları Məhkəməsi bu məhkəmələri birmənalı olaraq rədd edəcək və fəalların azadlığa çıxması barədə qərar çıxaracaq, həmçinin Azərbaycan hökumətini cərimələyəcək: “Mən bu məsələni İctimai Palatanın Koordinasiya Şurasının iclasında da qaldıracam. Çünki həmin məhkəmə iclaslarını aparan hakimlər ədalətsiz qərarlar verdikləri üçün qərb ölkələrinə buraxılmamalıdırlar. Onların ora girişi qadağan edilməlidir”.

Hüquq müdafiəçisi Səidə Qocamanlı da bu məhkəmə qərarlarının ədalətsiz olduğunu söyləyir: “Bu məhkəmələr də əvvəlki məhkəmə proseslərinin davamı idi. Hər halda Azərbaycanın müstəqilliyi ərəfəsində onlar azadlığa buraxılmalı idilər. Bu da öz-özlüyündə cəmiyyətdə bir barış addımı ola bilərdi. Çox təəssüf ki, həbs olunan fəalların hamısına iş kəsildi. Həmin insanlar müstəqilliyin 20-ci ildönümünü məhbəsdə qarşılayacaqlar. Bu da bir daha Azərbaycanda hüquq müdafiəçiləri tərəfindən tərtib olunmuş siyasi məhbus siyahısını daha da uzadacaq. Biz sonuncu əfvdən sonra sevinirdik ki, siyahı azalıb. Ancaq çox keçmədi ki, azadlığa çıxanların yerini yenidən siyasi məhbuslar tutdular. Hesab edirəm ki, bu beynəlxalq təşkilatlar və Qərb tərəfindən pisləniləcək. Biz də bunu pisləyirik. Çox təəssüf edirəm ki, bu bayram ərəfəsində o insanların azadlığı əllərindən alındı”.

AXCP sədrinin müavini Fuad Qəhrəmanlı isə 2 aprel məhbuslarının məhkəmə proseləri siyasi sifariş xarakteri daşıdığını deyir: “Bu qəraralar göstərdi ki, Azərbaycanda məhkəmələr müstəqil fəaliyyət göstərmir. Onlar hakimiyyətin siyasi və repressiya alətinə çevriliblər. Bizim mübarizə yoldaşlarımıza qarşı çıxarılmış qərarlar məhkəmələrin iradəsi ilə deyil, məhz hakimiyyətin iradəsi ilə həyata keçirildi. Ancaq ittiham olunan şəxslərin məhkəmədə çıxşıları onu göstərdi ki, hakimiyyət öz istəyinə nail ola bilmədi. Onlar azadlıqqdan məhrum edilsələr də, öz mübarizələrini indi də davam etdirirlər. Məhbuslara qarşı irəli sürülən yuxarı hökümlər hakimiyyətin qorxusunun göstəricisidir. Hakimiyyət bununla cəmiyyətdə xof yaratmağa çalışdığını düşünür. Düşünürəm ki, bu əks effekt verəcək və cəmiyyətdə etirazları daha da stimullaşdıracaq. Həmçinin beynəlxalq təşkilatların hakimiyyətə təzyiqləri daha da artacaq”.

Aydınlar Partiyası da İctimai Palatanın 2 aprel mitinqinə görə həbs olunan müsavatçılar Ülvi Quliyev, Əhəd Məmmədli, Rüfət Hacıbəyli və AXCP üzvü Elnur Məcidlinin azadlıqdan məhrum edilməsini qətiyyətlə pisləyir və bunu analoqu olmayan rəzalət besab edir. Partiyanın yaydığı bəyanatda bildirilir ki, gənc fəalların sərbəst toplaşmaq hüququndan istifadə etdiyinə görə cəzalandırılması hakimiyyətin siyasi azadlıqları birdəfəlik ləğv etməyə, fəal gənclik arasında qorxu mühiti yaratmağa hesablanmış bir addımdır: “Hakimiyyət demokratik təsisatların son işartılarını da söndürməklə ölkədə avtoritar rejimi möhkəmləndirməyə, bir partiyalı sistem qurmağa çalışır. Korrupsiyalaşmış rejim sosial dayaqlarının olmadığını anladığından idarəetmədə ancaq zora və repressiv cəza aparatına arxalanır ki, bu da cəmiyyətdə totalitar meyllərin güclənməsinə gətirib çıxarır. Ancaq qloballaşan və demokratikləşən dünya da bu siyasət çox yaxı vaxtlarda iflasa uğrayacağı danılmaz bir həqiqətdir”. AP siyasi hakimiyyətdən məhbusların dərhal azadlığa buraxılmasını, repressiyaların dayandırılmasını, vətəndaşların konstitusion haqlarının bərpasını tələb edir. Aydınlar Partiyası belə hesab edir ki, siyasi hakimiyyət onu tənqid edən müxalifətçiləri həbs etmək əvəzinə onların tələblərini həyata keçirməlidir.
Bildirək ki, oktyabrın 3-də məhkəmənin hökmü ilə Arif Hacılı, Məhəmməd Məcidli və Tural Abbaslı 2 il 6 ay müddətinə azadlıqdan məhrum olunublar, Fuad Qəhrəmanlıya isə 2 il şərti iş verilib.
Günay MUSAYEVA

Qanlı məhkəmə (FOTOREPORTAJ)

2011-10-09T02:03:00.001-07:00

Oktyabrın 7-də Ağır Cinayətlər Məhkəməsində İslam Partiyasının həbs edilmiş sədri və üzvlərinə hökm oxunum. İttiham olunanları dəstəklərini nümayiş etdirmək üçün onların çoxlu sayda tərəfdarı məhkəmə binasının önünə toplaşıb. Polis toplaşanlara qarşı qadın-kişi məhəl qoymadan amansızlıq edib və onları zorakılıqla binanın qarşısından uzaqlaşdırıb. Olay yerindən müxbirimizin lentə aldığı fotoları təqdim edirik:

«MƏNİ YERƏ YIXMIŞDILAR, TƏPİKLƏYİRDİLƏR»

2011-10-06T12:53:00.001-07:00

Gündəm

«MƏNİ YERƏ YIXMIŞDILAR, TƏPİKLƏYİRDİLƏR»

2011-10-06

Oktyabrın 6-da Yasamal rayon Məhkəməsində ABŞ vətəndaşı Amanda Erickson və Böyük Britaniya vətəndaşı Celia Daviesə qarşı xuliqanlıq hərəkətləri etməkdə, onları döyməkdə təqsirləndirilən Adil Tağızadə, Roman Həsənov, Vüsal Qurbanov və Nazim Hüseynovun məhkəməsi başladı. Məhkəmə iclasına hakim Elçin Qurbanov sədrlik edir.

Əvvəlcə dövlət ittihamçısı Rizvan Sultanov ittiham aktını elan etdi.
İbtidai istintaqın qənaətinə görə, bu gənclər iyunun 15-dən 16-na keçən gecə Akademik Milli Dram Teatrının binasının arxa tərəfində Amanda Ericksonla Celia Daviesə hücum ediblər, onları yerə yıxaraq döyüblər.
Təqsirləndirilənlər ibtidai istintaqa etirafedici ifadələr veriblər. Ancaq məhkəmədə həmin ifadələrindən imtina etdilər. Dedilər ki, istintaq vaxtı vəkillə formal şəkildə təmin olunublar, faktiki isə onlara vəkil xidməti göstərilməyib, hüquqları izah olunmayıb. Müstəntiq kompüterdə yazdığı hazır ifadələrə onlara imza atdırıb. Onlar ifadələrlə tanış olmaq istəsələr də, müstəntiq vaxtın azlığını bəhanə gətirərək buna imkan yaratmayıb. Təqsirləndirilən şəxslər belə dedilər.

«ONLAR QIŞQIRANDA BİLDİK Kİ, XARİCİLƏRDİR»

Müttəhim Adil Tağızadə: «Bizə ittiham veriblər ki, guya onlarla tanış olmaq üçün yaxınlaşmışıq və onları döymüşük. Bizim belə fikrimiz olmayıb, onlar ikisi də sərxoş idilər, mən birinə yaxınlaşıb əlimlə kürəyinə vurdum, dedim sizə kömək lazımdır? Onlar qorxdular, qışqırmağa başladılar, onda bildik ki, xaricidilər. Dayım oğlu Nazim öz telefonunu onlardan birinə uzatdı, dedi ki, qorxmayın, istəyirsinizsə «102» xidmətinə zəng edin. Qız telefonu alıb yerə çırpdı, telefon sınıq-sınıq oldu. Biz onları yerə yıxmamışıq, döyməmişik. Özləri sərxoş idilər deyə, qaçanda bir-birlərinə dəyib yıxıldılar».
Digər müttəhimlər də məhkəmədə oxşar ifadələr verdilər. Qızların sərxoş olduqlarını, qaçarkən yerə yıxıldıqlarını deyiblər.

«YALAN DANIŞIRLAR»

Ancaq zərərçəkmiş Celia Davies məhkəməyə dedi ki, müttəhimlər yalan danışır: «Onlar dalımızca düşmüşdülər, bizə baxıb möhkəm gülürdülər. Bizə çatanda onlardan biri çantalarımızı əlimizdən alıb yerə tulladı. Onların nə dediklərini başa düşmürdük. Bizi itələyib yerə yıxdılar».
Vəkillərdən biri zərərçəkmişdən «sizi bu adamlardan konkret hansıları yerə yıxmışdı?» sualına dedi ki «məni yerə yıxmışdılar, təpikləyirdilər, ona görə də üzlərinə baxmaq imkanım yox idi» deyə cavab verdi.
Vəkillərin suallarına cavab olaraq Celia Davies hadisə baş verməmişdən əvvəl Amanda Erickson ilə pivə içdiklərini, ancaq sərxoş olmadıqlarını dedi.

TƏRCÜMƏÇİ PROBLEMİ

Sonra Celia Davies məhkəmədə onun ifadəsinin Azərbaycan dilinə düzgün tərcümə olunmadığını deyərək ifadə verməyi dayandırdı və tərcüməçinin dəyişdirilməsini xahiş etdi.
Elə zalda oturan müşahidəçilərdən bəziləri də hakimə bildirdilər ki, tərcüməçi hüquqi terminləri düzgün tərcümə etmədiyinə görə onu dəyişdirmək lazımdır.
Hakim başqa tərcüməçi təyin olunması ilə əlaqədar məhkəmə prosesini oktyabrın 13-nə kimi təxirə saldı.
Təqsirləri sübuta yetirilsə gəncləri 3 ildən 7 ilə qədər həbs gözləyir.
Hadisə baş verən dövrdə Amanda Erikson və Celia Davies Bakıda yerli jurnalistlər və vətəndaş cəmiyyəti fəalları üçün treninqlər keçirirdilər.
Erikson həmçinin «Washington Post» və «New-York Times» qəzetləri ilə əməkdaşlıq edir. Hazırda o, Amerikadadır.

Mübarizənin Qiyməti

2011-10-05T23:26:00.001-07:00

Mübarizənin Qiyməti

AXCP sədrinin müavini Gözəl Bayramlı bu il aprelin 17-də keçirilən mitinq zamanı həbs edilir

İndiki Azərbaycan siyasətini təsvir etmək üçün iqtisadi terminologiyadan rahat bir şey tapa bilmədim. Azərbaycan hökuməti müxalifətə anlatmağa çalışır ki, mitinq etmək “bahadır”. Nə qədər baha? Müxalif partiyaların 10-15 enerjili fəalını, liderlərini bir neçə illiyinə həbsxanalara göndərmək qədər baha.

2 aprel mitinqinə görə həbs edilmiş müxalifət fəallarının üçüncü dalğasının məhkəməsi gedir. Beynəlxalq təşkilatlar etiraz etməklərindədirlər, vəkillər dəlil-sübut tələb etməklərində. İttiham edilənlər isə daha desperado bir fəaliyyətə baş vururlar – onları ittiham edən prokurorların və onlara həbs cəzası kəsən hakimlərin vicdanına müraciət edirlər.

Artıq 10 nəfər mühakimə olunub. Ardı gəlir. Mesaj kifayət qədər sadədir. Əgər müxalifət hökumətin onun üçün cızdığı oyun qaydalarından kənara çıxmağa çalışsa, aktiv mübarizə yolunu seçsə, həmin bu partiyalarda bu radikal xətti təklif edən, onu icra edən, təşkil edənlərin içindən həbsxanaya atılanlar olacaq. Söhbət də bir neçə sutkadan yox, itirilən illərdən gedəcək.

Azərbaycan hökuməti müxalifətə anlatmağa çalışır ki, mitinq etmək “bahadır”...

Vəziyyət nə qədər belə davam edə bilər?

Qısa cavab versək, müxalifət hökumətə anlada bilənə qədər ki, müxalifət fəallarını həbs etmək “bahadır”.

Müxalifətin cavabı nədir?

Bəyan edilən cavab odur ki, mübarizə davam edəcək. Sırf iqtisadi terminlərlə düşünsək yaranan vəziyyət budur: Müxalifət altı ay əvvəl etdiyi mitinqə görə indiyəcən Azərbaycan hökumətinə bədəl ödəyir. Hökumət isə hələ ki, atdığı addımlara görə müxalifətə heç nə ödəmir. Müxalif fəalları həbsə atmağın bədəli ödənmir hələ ki.

Belədə Azərbaycan hökumətinin müxalifət üzərinə hücumunu nə dayandıra bilər? Hipotetik mülahizələri kənara qoyanda cavab budur: hələ ki, Azərbaycan hökumətini müxalifət üzərinə hücumdan çəkindirən faktor yoxdur ortada. Nəticədə məhkəmələr parta-part hökm oxuyur müxalifət fəallarına.

Vəziyyət nə qədər belə davam edə bilər? Qısa cavab versək, müxalifət hökumətə anlada bilənə qədər ki, müxalifət fəallarını həbs etmək “bahadır”. Daha dərinə varsaq, gərək siyasi həbslərin arxasındakı məntiq tam çözülə.

Strateji səbəbə – müxalifəti aktiv mübarizə üsullarından çəkindirmə cəhdinə yuxarıda nəzər salmışıq. Taktiki səbəb kimi isə müxalifət liderliyinə nüfuz etmə cəhdi də göstərilə bilər.

Həbs edilənlərin böyük əksəriyyəti müxalifətin aprelin 2-də başlayan yeni mübarizə kursunun avanqardını təşkil edir. Bu adamları həbsə atarkən yerdə qalanlara verilən siqnal kifayət qədər şəffafdır: onların yolunu getsəniz…

Üslub kobud olsa da, hələ ki, işləyir. İqtisadi terminlərə bir daha müraciət etsək, siyasətdə verən əl gərək almağı da bacarsın. Hər şeyin qiyməti var, o cümlədən mübarizənin də. Müxalifət indiyədək bu mübarizə üçün çox baha bir qiymət ödəyir. İqtidarın isə hələ ki, sanki alacağı var, verəcəyi isə yoxdur.

İsa Qəmbər: «Bugünkü «Müsavat» liderlərinin elə varlı ataları da yoxdur…»

2011-10-05T11:15:00.001-07:00

İsa Qəmbər: «Bugünkü «Müsavat» liderlərinin elə varlı ataları da yoxdur…»

İsa Qəmbər

05.10.2011

Sevda İsmayıllı

AzadlıqRadiosunun «Can Bakı» proqramının «Müsavatsız Azərbaycan nə itirərdi?» mövzusunda başladığı müzakirəyə Müsavat başqanı İsa Qəmbər də qoşulub.

--İsa bəy, xoş gördük! Proqramımıza qoşulmaqla bizə Müsavat Partiyasının 100 illik yubileyini sizinlə paylaşmaq imkanı qazandırdınız. AzadlıqRadiosunun təbriklərini qəbul edin.

--Təşəkkür edirəm, Sevda xanım. Sağ olun. Verilişin qonaqlarına da dəyərli fikirlərinə görə təşəkkür edirəm.

HƏR KİM YÜZ İL YAŞAMASA?!

--Yubileyi necə qarşılayırsınız? Üzümüzə gələn günlərdə hansı tədbirlər gerçəkləşdiriləcək? Kimlər qonaq olacaq?

--Əslində, Müsavat Partiyasının 100 illik yubileyi dövlət, ümumxalq səviyyəsində qeyd olunmalı bayramdır. Çünki Müsavat ümumxalq dəyəridir. Azərbaycan xalqının çoxminillik tarixində ən şərəfli siyasi hadisədir. Təsəvvür edin, bir siyasi partiya 100 il ərzində fəaliyyət göstərir! 100 il Azərbaycan xalqının inkişaf yolunu müəyyənləşdirir. Elə şəkildə müəyyənləşdirir ki, heç kim o yola zidd çıxa bilmir. Zidd çıxanlar əvvəl-axır tarixin arxivinə göndərilirlər.

Həmçinin oxu

«Müsavat»sız Azərbaycan nə itirərdi?

Çünki yol düzgün, dəqiq qiymətləndirilib. Hədəflər də həmçinin. Ancaq təəssüf ki, Azərbaycanda bu gün avtoritar bir rejim hökm sürdüyü üçün, öz siyasi rəqiblərinə düşmən gözü ilə baxıldığı üçün, Azərbaycanın dəyərlərini öz dəyərləri kimi qəbul etmədikləri üçün, bu partiyanı korrupsiya fəaliyyətlərinə maneə kimi gördükləri üçün bu bayram dövlət səviyyəsində qeyd olunmur. Ümumxalq səviyyəsində isə ancaq nəzəri cəhətdən qeyd olunur. Amma bütün bunlara baxmayaraq, partiyamızın 100 illiyi ilə bağlı biz keçən il qərar qəbul etmişik. 2011-ci ili Müsavat ili elan etmişik. İlboyu bir çox tədbirlər həyata keçirilib. Bu günlərdə isə bir neçə tədbirimiz planlaşdırılır. Ayın 8-də Müsavat Partiyasının qərargahında saat 11-də bayram tədbiri keçiriləcək. Biz şəhər rəhbərliyinə müraciət edib normal bir zal ayrılmasını xahiş etdik. Amma təəssüf ki, onlar öz xislətlərinə uyğun mənfi, uydurma cavab verdilər. Ayın 7-də isə avropalı müttəfiqlərimizin təşəbbüsü ilə Bakıda böyük bir forum keçiriləcək—«Müsavat 100 il Azadlıq və İstiqlal uğrunda mübarizədə» adı ilə. Avropadan, Türkiyədən və b. ölkələrdən qonaqlarımız olacaq. Hesab edirəm ki, maraqlı və yüksək səviyyəli tədbir olacaq.

KİMDİR GÜNAHKAR?

--İsa bəy, dinləyicilərimizdən biri Müsavatın yubileyi olduğunu ilk dəfə bizim verilişdən eşitdiyini yazır. Sizi təmtəraqlı yubiley düzənləməməkdə, təbliğat aparmamaqda günahlandırır...

Məhəmməd Əmin Rəsulzadə

-- Mən dinləyicilərin bütün tənqidlərini qəbul etməyə hazıram. İl ərzində tədbirlər keçiririksə, «Yeni Müsavat» qəzeti bu barədə yazırsa, sosial şəbəkələrdə kifayət qədər məlumatlar yayılırsa və dinləyicimiz 100 illikdən xəbərdar deyilsə, ona deyiləsi əlavə sözüm yoxdur... Sadəcə, dinləyicimizi yox, hakimiyyəti də günahlandıra bilərəm ki, imkan versəydi, televiziyalarda bu məsələdən danışılsaydı, heç kimin «xəbərim yoxdur» bəhanəsi olmazdı.

KİMDİR MÜSAVATÇI?

-- «Can Bakı»nın qonağı Ədalət Tahirzadənin də bir iradı var. Dövlət Arxivində Müsavat dövrü ilə bağlı saysız sənədlərin olduğunu, amma arxivdə çalışmalı olanların yoxluğuna diqqət çəkir... Deyir ki, niyə Müsavat Partiyasının ziyalıları arxivlərə gəlmir? Hətta arzu edənlərə öz məsləhətlərini verməyə hazır olduğunu bəyan edir.

-- Ədalət bəyin köməyini məmnuniyyətlə gözləyirik. Onun Azərbaycan tarixinin öyrənilməsi sahəsindəki xidmətlərini yüksək qiymətləndiririk. Bu gün Müsavat Partiyasında Nəsiman Yaqublu, Nəsib Nəsibli, Məryəm Oruclu, Aydın Balayev və digər tədqiqatçılar bu sahədə işlərini davam etdirirlər və arxivlərdə çalışırlar. Mən Şirməmməd müəllim başda olmaqla sizin hamınızı (Ədalət bəyə müraciətlə--S.İ.) müsavatçı hesab edirəm. Müstəqilliyin, Cümhuriyyətin, Müsavatın, demokratiyanın dəyərini bilən hər bir ziyalı müsavatçıdır. Əslində Cümhuriyyət irsini öyrənmək üçün böyük bir institut yaradılmalıdır. Dəyərli alimlərimizə orada hər cür şərait olmalıdır. Onlara həm Bakıda, həm də dünya arxivlərində çalışmaq imkanı
verilməlidir. Bunlar bizim planımızdadır və imkan olan kimi həyata keçirəcəyik. Qətiyyən şübhəniz olmasın.

RƏSULZADƏ İLƏ HEÇ KİM MÜQAYİSƏ OLUNMAZ!

-- Bir az tarixə ekskurs edək. Aradan 100 il keçib. Bu 100 ildə nələr dəyişib? 1911-ci il Bakısında partiya qurmaq, yaşatmaq asan idi, yoxsa indi?

—Mən bir az əvvəl hörmətli Eldar müəllimin, Ədalət bəyin fikirlərini eşitdim ( Eldar müəllim bildirmişdi ki, əski «Müsavat»la indikinin arasında böyük fərq var. Ovaxtkı liderlər böyük nəzəriyyəçi idi. İndikilər isə nəinki nəzəriyyəçi, hətta nəzarətçi deyillər - S.İ.). Müqayisə etmək düzgün deyil. Biz böyük Məhəmməd Əmin Rəsulzadə ilə nəinki özümüzü, hətta Azərbaycan tarixində heç kimi müqayisə etmirik. Yalnız Elçibəy bu siyasi zirvəyə yüksələ bilib. Biz Müsavatın digər liderlərini də həddindən artıq yüksək qiymətləndiririk və özümüzü onlarla müqayisə etmirik. Eyni zamanda şərtlərə diqqət etmək lazımdır. O dövrdə çox ağır şərtlər olub. M.Ə. Rəsulzadə həyatının 1918-ci ilə qədərki böyük bir hissəsini siyasi mühacirətdə keçirib. Bir neçə il İranda, bir neçə il Türkiyədə olub. Yalnız 1917-ci ildə Müsavat Partiyası fəaliyyətini gücləndirə bilib və bir ildən sonra hakimiyyətə gəlib müstəqil dövlət qurub. 1920-ci ildə növbəti rus işğalından sonra yenə ölkəni tərk edib və mühacirətə gedib. 1991-ci ilə qədər bu fəaliyyət mühacirətdə davam edib. 1992-ci ilin əvvəlində bu şərəf bizə qismət olub. Müsavatın xaricdəki liderləri onu bərpa etmək zərurəti məsələsində razılığa gəlib—biz də o fikirdə olmuşuq.

Azərbaycan parlamenti, 1918

Bu müqəddəs missiyanı bizə etimad ediblər. Fəxr edirik ki, 20 ildir bu şərəfli missiyanı daşıyırıq. 20 ildir ki, Müsavat Azərbaycanda ardıcıl fəaliyyət göstərir. Bu yüzillik tarixin heç bir hissəsində belə fenomen olmayıb. Biz Müsavatı yenidən Azərbaycanın aparıcı siyasi qüvvəsinə çevirə bilmişik. Müsavata xalqın hər zamankı məhəbbətini, hörmətini, inamını bərpa edə bilmişik. Hər halda bütün seçkilərdə Müsavatın nümayəndələrinin göstərdiyi nəticələr bunu sübut edir. Əvvəlki dövrdəki liderləri ideallaşdırmaq düzgündür—bunun həm də tərbiyəvi əhəmiyyəti var. Amma tutaq ki, Arif Hacılı—müstəqilliyə imza atmış şəxs hər şeydən keçərək mübarizəsini davam etdirir və müstəqilliyin 20-ci ildönümü, Müsavatın 100 illik yubileyini həbsxanada keçirir. Gənc müsavatçılar da həmçinin. Bu fədakarlıq qiymətləndirilməməlidirmi?

BUGÜNKÜ «MÜSAVAT» LİDERLƏRİNİN ELƏ VARLI ATALARI DA YOXDUR…

Nəsib bəy Yusifbəylinin o tarixi məktubu hər zaman dilimizdədir—Neçə il Azərbaycanın Baş naziri olmuş şəxs atasına məktub yazır ki, mənə pul göndər, maliyyə problemlərimi həll edim… Amma bugünkü «Müsavat» liderlərinin elə varlı ataları da yoxdur… Eldar müəllimə məsləhət görərdim ki, 1995-97-ci illərdə Müsavat Partiyasının başlatdığı yeni proqram layihəsi ilə bağlı diskussiyaların materiallarını bir daha nəzərdən keçirsin və müqayisə etsin. İnşallah, yəqin bu söhbətə sonra yenə dönmək imkanımız olacaq.

--Müsavat ikinci yüzilliyini qarşılamağa hazırlaşır. Necə bilirsiniz, bu yüzilə «möhtəşəm yüzil» demək olacaqmı?

--Bu yüzilin cəmisi üç ilini Müsavat hakimiyyətdə ola bilib. Mən inanıram ki, növbəti yüzilin əksər hissəsini Müsavat Partiyası, ən azı Müsavat ideyası hakimiyyətdə olacaq. Müsavat ideyası Azərbaycan xalqının qəlbində özünə taxt qurubdur. Reallıqda da hakimiyyətdə olacaq və Azərbaycanımızı daha yüksək səviyyələrə yüksəldəcək.

VİCDAN MƏHBUSLARINA HÖKM OXUNDU (FOTOLAR)

2011-10-03T12:11:00.001-07:00

Bu, Arif Hacılıya oxunan ikinci 3oktyabr tarixli hökmdür

Xəbər verildiyi kimi, bu gün Səbayel rayon Məhkəməsində 2 aprel aksiyasında həbs olunan şəxslərinin daha bir qrupunun məhkəməsinin yekun iclası keçirilib. "Yeni Müsavat"ın reportyoru Elşən Balaxanılının verdiyi məlumata görə, nahar fasiləsindən sonra ədliyyə işçiləri və polislər məhkəmə binasının önünə yığışan adamları zorla binadan kənarlaşdırıb.

Reportyorumuzun verdiyi xəbərə görə, jurnalistlər də kənarda qalmayıblar. Onlar da müttəhimlərinin qohumlarının, yaxın adamlarının srasında məhkəməni kənarda müşahidə etməli olublar.

2 aprel dustaqlarının məhkəməsinin hökmoxunma mərhələsi qapalı keçirilib.

Əməkdaşımızın aldığı məlumata görə, məhkəmənin hökmü ilə Arif Hacılı, Məhəmməd Məcidli və Tural Abbaslı 2 il 6 ay müddətinə azadlıqdan məhrum olunublar, Fuad Qəhrəmanlıya isə 2 il şərti iş verilib.

***

Onu da qeyd edək ki, bu, Arif Hacılıya oxunan ikinci 3 oktyabr tarixli hökmdür. Birinci dəfə ona 2004-cü ilin 3 oktyabrında Pənah Hüseyn, Rauf Arifoğlu, Sərdar Cəlaloğlu, İbrahim İbrahimli, İqbal Ağazasə, Etimad Əsədovla birlikdə hökm oxuyublar.

***

"Yeni Müsavat"ın reportyoru Fərahim İlqaroğlunun verdiyi məlumata görə, müxalifət fəallarına hökm oxunduqdan sonra hökmün ədalətsiz olmasından narazı qalan şəxslər - məhbusların qohumları və partiya yoldaşları plakatlar açaraq "Azadlıq" şüarları səsləndiriblər. Polislər onları mühasirəyə alaraq toplu şəkildə hərəkət etmələrinə imkan verməyib, əllərindəki transparantları alıblar. Bu zaman polislə insanlar arasında qısamüddətli gərginlik yaşanıb. Polis müxalifətçilərə zor tətbiq edib.

VİCDAN MƏHBUSLARI İTTİHAM TƏRƏFİNİ DARMADAĞIN ETDİ

2011-09-29T07:15:00.001-07:00

Siyasət

VİCDAN MƏHBUSLARI İTTİHAM TƏRƏFİNİ DARMADAĞIN ETDİ

2011-09-29

“Heç düşünürsünüzmü ki, kimlərin davamçılarısınız? Sumbatyanların, markaryanların, ovanesyanların...”

Səbayel Rayon Məhkəməsində Müsavat Partiyası Mərkəzi İcra Aparatının rəhbəri Arif Hacılı, Müsavat Gənclər Təşkilatının sədri Tural Abbaslı, AXCP sədrinin müavini Fuad Qəhrəmanlı və AXCP-nin şöbə rəhbəri Məhəmməd Məcidlinin işi üzrə məhkəmə prosesi yekunlaşmaq üzrədir. Hakim Famil Nəsibovun sədrliyi ilə keçirilən dünənki prosesə İctimai Palata Koordinasiya Şurasının üzvləri Vidadi Mirkamal, AXCP sədri Əli Kərimli, Müsavat başqanı İsa Qəmbərlə yanaşı, çoxsaylı siyasi xadim və diplomat qatılmışdı.

Bu proses əvvəlkilərdən jurnalist kontingenti baxımından da seçilirdi. “2 aprelçilər”in heç bir məhkəmə prosesinə qatılmayan iqtidar mətbuatı nümayəndələri də gəlmişdi.
Prosesdə ilk müdafiə çıxışını A.Hacılının vəkili Nemət Kərimli etdi (çıxışın tam mətni burada). O, ittihamların heç birinin hüquqa əsaslanmadığını göstərdi. Dedi ki, müvəkkili saxlandığı andan polisin qanunsuz hərəkətləri ilə üzləşib, onun hüquqları pozulub. A.Hacılının heç bir ictimai qaydanı pozmadığını vurğulayan vəkil bu faktın hətta polis şahidlərinin ifadəsində də təsdiqini tapdığını bildirdi. Vəkil cinayət işi materiallarının dərhal ibtidai araşdırmaya prosessual rəhbərliyi həyata keçirən prokurora göndərilməsini, A.Hacılıya isə bəraət verilməsini tələb etdi.
T.Abbaslının vəkili Səyyarə Heydərova da məhkəmə istintaqı zamanı verilən ittihamın təqsirləndirilənlərin heç birinə qarşı təsdiqini tapmadığını söylədi. Bildirdi ki, müdafiə etdiyi şəxs və o birilər ancaq azad fikirlərinə görə həbs olunub: “Yəqin bu şəxslər Amerikadakı kimi Ağ Evin qarşısında çəllək üstünə çıxıb çıxışlar etsəydi, kütləvi aksiya keçirsəydi, snayperlə vurub onların axırına çıxmışdılar. Hakimi dərindən düşünməyə və haqsızlığa son qoyacaq qərar verməyə çağırıram”.
M.Məcidlinin vəkili İlqar Musayev də vicdan məhbuslarının məhkəmə prosesini məntiqsiz, mənasız, əsassız ittiham üzrə ekskursiya adlandırdı. Dedi ki, dövlət ittihamından söz gedə bilməz, ittiham adlandırılan sənəd yalan-böhtan yığınıdır. Vəkil dövlət ittihamçısının vicdan məhbuslarına maksimal cəza istəməsini hakimiyyətdəki qorxu ilə əlaqələndirdi. Dedi ki, ibtidai istintaq zamanı bir çox şahidlər yalan danışsa da məhkəmədə böhtan, şər atmaqdan imtina ediblər. Bunu cəmiyyətin mənəvi keyfiyyətlərinin tükənməməsi kimi şərh edərək prosesdə diqqətini çəkən başqa bir məqama toxundu: “37-ci ildə ziyalı türk oğullarının üzünə duran Niftəliyev Abbasqulu Şəmil oğlunun övladı Fəxrəddinin bizə qarşı verdiyi xasiyyətnaməni görüb dəhşətə gəldik. Dəhşətə ona görə gəlmədik ki, ”ot kökü üstə bitər" məsəlinin şahid olduq. Ona görə dəhşətə gəldik ki, sumbatyanların, markaryanların, donosçuların gənc türk alimi Məhəmməd Məcidlinin üzünə durmasına şahid olduq".
Vəkil hakimin hüquqi savadının yüksək olduğuna inamını ifadə edərək dedi ki, onun öz adını tarixə qızıl hərflərlə yazmaq şansı var: “Sizdə olan bu şans kaş məndə olaydı. Ədalətli qərar verin, bu insanlara bəraət hökmü oxuyaraq tarixə qızıl hərflərlə düşün”.
M.Məcidlinin digər vəkili Azər Nağıyev də müdafiə etdiyi şəxsə bəraət istədi. Dedi ki, Məcidlinin həbsdə saxlanılması qanunsuzluqdur. M.Məcidli 2 aprel aksiyası zamanı heç bir hüquq pozuntusu etməyib, əksinə, o, polisin vəhşi rəftarı ilə üzləşib, xəsarət alıb.
Vəkillərin çıxışı yekunlaşdıqda prokuror Ceyhun Kazımov vəkil N.Kərimlinin sərbəst toplaşmaq azadlığı haqda qanuna düzgün istinad etmədiyini dedi, vəkil Yavər Hüseynlinin isə prosesdə tədqiq olunmayan dəlillərə istinad etməsini irad tutdu.
Bundan sonra A.Hacılı replika hüququndan istifadə etdi: “Dövlət ittihamçısı burada xeyli dərəcədə siyasi bir çıxış etdi. Burada vəkillər ittihamın qondarma və siyasi sifariş əsasında hazırlandığını bütün çılpaqlığı ilə ortaya qoydu. Onlara təşəkkürümüzü bildiririk. Kütləvi aksiyalar barədə danışmaq istəyirəm. Sərbəst toplaşmaq hüququ bütün sivil dünyada prioritet hüquqdur. Bir neçə prioritet hüquq var:
Söz və mətbuat azadlığı; sərbəst toplaşmaq azadlığı və azad seçki hüququ. Məncə, sərbəst toplaşmaq hüququ daha önəmlidir. Demokratik dünyada sərbəst toplaşmaq hüququnun 2 yolu müəyyən olunub: icazə verilməklə və xəbərdarlıq etməklə sərbəst toplaşmaq hüququnun gerçəkləşdirilməsi. Azərbaycan konstitusiyasının 49-cu maddəsinə görə də kütləvi aksiya keçirmək üçün icazə yox, müvafiq icra hakimiyyəti orqanına sadəcə xəbərdarlıq etmək lazımdır. Yəni qanunlarımızda daha demokratik qayda nəzərdə tutulub. Təəssüf ki, hakimiyyət bu qaydadan istifadəyə imkan vermir. Biz aprelin 2-də konstitusiyanın 49-cu maddəsi ilə təsbit olunan hüquqlarımızı gerçəkləşdirməyə cəhd etmişik və hakimiyyətin qanunsuz əməlləri ilə üzləşib heç bir əsas olmadan həbs olunmuşuq. Bakı Şəhər İcra Hakimiyyəti sərbəst toplaşmaq hüququ ilə bağlı müraciətlərimizə ənənəvi cavablarında yazır ki, guya sərbəst toplaşmaq hüququ gerçəkləşdiriləndə istirahət hüququ tapdanır. Bu bəhanə ilə sərbəst toplaşmaq hüququ heç bir halda məhdudlaşdırıla bilməz. Çünki “Sərbəst toplaşmaq haqqında” Qanunda yazılıb ki, sərbəst toplaşmaq hüququ yalnız dövlət əhəmiyyətli obyektlərin 200 metrliyi istisna olmaqla, bütün ölkə ərazisində tanınır. Sadəcə, təşkilatçılar aksiyanın yerini, iştirakçıların sayını müvafiq icra hakimiyyətinə bildirməlidir. İcra hakimiyyəti aksiya keçirmək üçün yeri təşkilatçılara göstərə bilməz. Qanun buna yol vermir. Kütləvi aksiya zamanı hər hansı mübahisə olubsa belə, bunun məsuliyyəti sərbəst toplaşmaq hüququnu məhdudlaşdıran hakimiyyətin üzərindədir. Həbsdə olduğum aylarda bu cinayət işi ilə yanaşı 4 kitab da oxumuşam. Bu kitablar Cinayət Məcəlləsi, Cinayət Prosessual Məcəlləsi, İnzibati Xətalar Məcəlləsi və Cinayət Məcəlləsinin kommentariyasıdır. Bu kitablardan yalnız İnzibati Xətalar Məcəlləsində istirahət hüququ sözünə rast gəlinir. Bu da məcəllənin 306-cı maddəsidir. Maddə belə adlanır: “Məişət səs-küyünə qarşı mübarizə qaydalarını pozma”. Orada ictimai yerlərdə gecə vaxtı səs-küyün qarşısının alınmasından söhbət gedir. Bu maddəni pozanlar 10-15 manat cərimə olunur. Bu iş siyasi sifarişli işdir. Dövlət ittihamçısı bizə cəza istəyərkən ən maksimal həddə cəza təyin olunmasını istədi. Bizim şəxsiyyətimizi səciyyələndirən halları nədənsə nəzərə almadı. Amma bunun əvəzində 37-ci ildə ovanesyanlara, markaryanlara donos yazanın oğlunun Məhəmməd Məcidli barədə verdiyi xasiyyətnaməni tələsik işə tikdilər. Baxmayaraq ki, Məcidliyə BDU-dan da xasiyyətnamə verilmişdi. Necə olur, mənim 28 yaşımda millət vəkili seçilməyim, prezident Elçibəyin fərmanı ilə ərazi idarəetmə orqanları üzrə müşavir təyin olunmağım məni səciyyələndirən hal deyil, amma donosçu oğlunun yazdığı xasiyyətnamə səciyyələndirən cəhətdir? 100 yaşı olan, bu dövlətin əsasını qoyan bir partiyanın rəhbərliyində təmsil olunmağım məni səciyyələndirən cəhət deyil? Tural Abbaslının siyasi gəncliyin rəhbərlərindən biri, Fuad Qəhrəmanlının tanınan bir partiyanın rəhbərlərindən biri, Məhəmməd Məcidlinin müharibə veteranı olması şəxsiyyətlərini səciyyələndirən cəhət deyil? İttiham tərəfinin bizə maksimum cəza istəməsi bir daha bu işin siyasi sifariş olmasını, diletantların quraması olduğunu göstərir. Bizə maksimum cəza verilməsinin heç bir hüquqi əsası yoxdur. Bununla siz xalqın müqavimətini azaldırsınız. Bunların nəticəsidir ki, hansısa İran generalı açıq-açığına Azərbaycan xalqını, dövlət başçısını təhqir edir, amma heç kim küçəyə çıxıb etirazını bildirmir. Çünki bilir ki, küçəyə çıxıb etiraz etsə, Arif Hacılının qonşuluğundakı kameraya yerləşdiriləcək. Burada üzümüzə duran polislər deyirlər dövlətimizi qoruyuruq. Dövləti quranları həbs etməklə dövləti qorumurlar".
Sonra Fuad Qəhrəmanlı çıxış etdi: “Bu məhkəmədə açıq göründü ki, bizə qarşı ittiham siyasi sifarişdən doğub. İsa Qəmbərə, Əli Kərimliyə hələ aksiyadan əvvəl təqdim edilən xəbərdarlıqlarda bu gün bizə qarşı olan ittihamda yazılanları yazmışdılar. Bu o deməkdir ki, bu gün ittiham edildiyimiz maddənin dispozisiyasını əsasının yaradılması üçün əvvəlcədən hazırlanmış ssenari olub. Bu gün dünyada gedən proseslər göstərir ki, diktatorlar məhvə məhkumdur. Siz burada istirahət hüququndan danışırsız, amma insanlarımızın ləyaqətli yaşamaq hüququnu dilinizə də gətirmirsiniz. İnsanların həyatını məhv etmisiniz”.
T.Abbaslı isə dövlət ittihamçısının replikasına belə cavab verdi: “Prokurorun replikası da çıxışı kimi orta məktəb səviyyəsində idi. O, heç bir qanuna istinad etmədi, əvəzində dedi-qodulara əsaslandı. Guya burada Nemət Kərimlidən səhv tutmuşdu. Əslində isə Nemət Kərimliyə qulaq asmamışdı deyə belə danışdı. Prokuror nə qədər savadlı olsa da bura bir məktəbli uşaq da çağırsaq, onu susduracaq. Çünki nə qədər savadlı olursansa ol, haqqı demirsənsə, haqqın yanında deyilsənsə, balaca uşağın qarşısında da gülünc vəziyyətdə qalacaqsan. Biz bu gün Ceyhun müəllimin obrazında prokurorluğu, hüquq-mühafizə orqanlarını belə rəzil, gülünc durumda gördük. Sabah-birigün məhkəmə də eyni vəziyyətə düşəcək. Arif Hacılının hakimin altında oturub qərar verdiyi, prokurorun and içdiyi dövlət atributlarının qəbul olunmasında rolu var. Arif Hacılını 500 manat cərimə edib buraxmaq əvəzinə ona maksimum cəza istənilməsi Azərbaycanın hətta Cibutidən də betər günə düşdüyünü göstərir. Bu gün bizi siyasi sifarişlə, birbaşa İlham Əliyevin sifarişi ilə tutublar”.
M.Məcidlinin çıxışı isə prokurorun başını aşağı dikməsinə səbəb oldu: “ABŞ prezidentləri arasında ən çox önəm verdiyim Avraam Linkolndur. Onun məşhur bir sözü var: ”Bir nəfəri həmişə aldatmaq olar, hamını bir dəfə aldatmaq olar, amma hamını həmişə aldatmaq olmaz". Siz burada qeyri-rəsmi, qeyri-qanuni tapşırıqlarınızla bərabər siyasi sifarişlə tərtib olunmuş ittiham aktı adlı pasportunuzla təmsil olunursunuz. Dəfələrlə deyirsiniz ki, guya mən Fuad Qəhrəmanlı ilə mitinqdən 7-8 dəqiqə əvvəl təşkilat qurub mitinq təşkil etmişik. Uşaq da bilir ki, mitinqi 7-8 dəqiqəyə təşkil etmək, sadəcə, mümkün deyil. Kəndimizin sakinləri 37-ci ildə ən çox repressiyalara məruz qalanlardan olub. Elələri olub ki, repressiyaya məruz qalmış dədə-babalarından imtina edib. Amma repressiyaya məruz qalanların adları qızıl hərflərlə qəlbimizə yazılırdı. Biz də repressiyalara məruz qalırıq. Siz heç düşünürsünüz ki, kimin davamçılarısınız? Sumbatyanların, markaryanların, ovanesyanların davamçılarısınız. Onlar da bu millətə qənim kəsilmişdi, siz də bu millətə qənim kəsilmisiniz! Onlar da bu xalqın haqq sözünü deyənlərə qarşı mübarizə aparırdı, siz də. Əgər bu gün bizə güllələnmə hökmü verilməsi istənilsəydi, siz o sifarişi də yerinə yetirəcəkdiniz. Burdan çıxıb evinizə gedəndən sonra özünüz haqda düşünün. Evdəkilər bu proses haqda sizdən soruşanda nə deyəcəksiniz? Bizi həbsə atmaqla sındıra bilməyəcəklər, amma siz artıq sınmısınız. Nəyin xatirinə? Siz burada telekanalların təqdim etdiyi videolardan çox cüzi hissəsini nümayiş etdirdiz. Orada polisin bizə qarşı qəddarlığı açıq-aşkar görünür. Biz millət uğrunda mübarizə aparırıq. Sabah bu insanlardan hər hansı biri hakimiyyətdə təmsil olunacaqsa, bu milləti düşünəcək. Biz Məhəmməd Əminin davamçılarıyıq. O, dünyasını dəyişəndə belə üç dəfə Azərbaycan deyib canını tapşırdı. Amma Heydər Əliyev öləndən sonra onun imzası ilə İlham Əliyevi baş nazir təyin etməsi barədə qərarı oldu. Siz belə adamların davamçılarısınız".
Hakim tələsik prosesin yekunlaşdığını, növbəti iclasın sentyabrın 30-u 10:30-a təyin olunduğunu elan etdi.

REAL MÜXALİFƏT ÜÇÜN TƏHLÜKƏLİ PLAN

2011-09-29T07:14:00.001-07:00

Hakimiyyət ilin sonunadək daha bir antidemokratik qanun qəbul edəcək

Azərbaycan hakimiyyəti “Siyasi partiyalar haqqında” Qanunu ilin sonunadək qəbul etməyi qərarlaşdırıb. Bu barədə Milli Məclis üzvlərindən biri əməkdaşımıza məlumat verib. Xəbərdə bildirilir ki, parlament Prezident Administrasiyasından göndərilən qanun layihəsini bir neçə ay əvvəl Avropa Şurasının Venesiya Komissiyasına təqdim edib. Qanun layihəsində partiyaların dövlət qeydiyyatına alınması üçün yeni tələblər, həmçinin partiyaların dövlət büdcəsindən maliyyələşməsi məsələsi də əksini tapıb.

Mənbənin dediyinə görə, hakimiyyət real müxalifət partiyalarının dövlət büdcəsindən maliyyələşmədən kənarda saxlanmasını istəyir. Ona görə də layihəyə “Parlamentdə təmsil olunan partiyalar onlara verilən səslərin sayına uyğun dövlət büdcəsindən maliyyələşdirilir” kimi maddə daxil edilib. Parlamentdə təmsil olunmayan real müxalifət partiyalarını daha da zəiflətməyə hesablanan bu maddənin qəbul edilib-edilməməsi Venesiya Komissiyasından asılıdır. Əgər qurum qanun layihəsinə həmin maddəni olduğu kimi saxlamaqla müsbət rəy verib qəbul üçün Azərbaycan Milli Məclisinə göndərsə, Müsavat, AXCP, KXCP, ADP, AMİP, ALP kimi müxalifət partiyaları dövlət büdcəsindən maliyyə almaqdan məhrum olacaqlar. Venesiya Komissiyasının sözügedən maddəni qəbul etməyəcəyi də istisna olunmur.
Qeyd edək ki, son aylarda YAP təmsilçiləri siyasi partiyaların maliyyələşməsi kriteriyaları ilə bağlı mövqelərinin necə olduğunu bir neçə dəfə açıqlayıblar. Bu mövzuda ən son açıqlamanı YAP icra katibinin müavini, deputat Siyavuş Novruzov və BAXCP sədri Qüdrət Həsənquliyev veriblər. S.Novruzov bildirmişdi ki, YAP partiyaların dövlət büdcəsindən bir necə parametr üzrə maliyyələşməsini təklif edir: “Təklif edirik ki, ”Siyasi partiyalar haqqında" yeni qanun qəbul olunduqdan sonra partiyalar təkrar dövlət qeydiyyatından keçirilsin və qeydiyyatdan keçən partiyaların hamısı dövlət büdcəsindən maliyyələşdirilsin. İkincisi, parlament seçkisində iştirak edən partiyalar aldıqları səsin miqdarına görə maliyyələşdirilsin. Üçüncüsü, Mili Məclisdə deputat mandatının sayına görə partiyaya maliyyə ayrılsın. Bizim təklifimizə əsasən elə partiya olacaq ki, üç istiqamətdə maliyyə alacaq".
Qüdrət Həsənquliyevin ötən həftə verdiyi açıqlamada isə parlament təmsilçiliyi olmayan partiyaların maliyyələşdirilməyəcəyi vurğulanırdı.
Parlament təmsilçiliyi olmayan real müxalifət partiyaları isə yalnız parlament təmsilçiliyi olan partiyaların dövlət büdcəsindən maliyyələşdirilməsinin qəti əleyhinədir. Onlar bəyan edir ki, parlamentdə təmsil olunan partiyaların əksəriyyəti saxta seçkilərlə təmsilçilik qazanıblar, əslində həmin partiyalar parlamentdən kənarda saxlanan partiyaların bir çoxundan qat-qat zəifdirlər və nüfuzları yox səviyyəsindədir.
Müsavat Partiyası başqanının müavini Gülağa Aslanlı bildirdi ki, parlament seçkisində iştirak edən partiyalar aldıqları səsin miqdarına görə maliyyələşdirilməlidir. Bu meyar normal ölkələrdə tətbiq olunur və uğurlu təcrübədir: “Yalnız parlament təmsilçiliyi olan partiyaların maliyyələşdirilməsinin qanuna daxil edilməsi Azərbaycanda siyasi partiya institutunun, müxalifətin sıradan çıxarılması üçündür. Müxalifət bunu qəbul etməz”.
AXCP sədrinin müavini Gözəl Bayramlı bildirdi ki, parlament qanuni formalaşmayıb. Seçkilərdə çoxlu sayda namizədləri qalib gəlmiş partiyalar var ki, saxtakarlıq nəticəsində qalib parlamentdən kənarda qalıblar: “Necə ola bilər ki, saxta yolla parlament təmsilçiliyi qazanmış partiyalar maliyyələşsin, saxtakarlıqla üzləşib parlamentdən kənarda qoyulan partiyalar maliyyələşməsin? Bu, meyar ədalətli ola bilməz. Parlament seçkisində iştirak edən partiyalar aldıqları səsin miqdarına görə maliyyələşdirilməlidir”.
ADP sədrinin birinci müavini Həsrət Rüstəmovun sözlərinə görə, yalnız parlament təmsilçiliyi maliyyələşmə üçün kriteriya ola bilərdi ki, parlament seçkiləri demokratik keçiriləydi: “Bəllidir ki, hazırkı parlament saxta seçkilərlə formalaşıb. Onun tərkibi heç də Azərbaycanın siyasi partiyalarının real gücünü əks etdirmir. Ona görə də biz hesab edirik ki, ”Siyasi partiyalar haqqında" Qanun mütləq ictimai dinləmələrdən sonra qəbul olunmalıdır. Parlamentdə çoxluq təşkil edən bir partiyanın istədiyi şəkildə qanuna dəyişiklik ediləcəksə, bu heç də Azərbaycanda siyasi partiyalar institutunun inkişafına gətirib çıxarmayacaq. Parlamentdə geniş ictimai dinləmələr keçirilməli, ora bütün siyasi partiyalar dəvət olunmalı və ən optimal təkliflər qəbul olunmalıdır".

POLİS MÜXALİFƏTÇİLƏRİN MƏHKƏMƏSİNƏ GƏLƏNLƏRİ DÖYDÜ

2011-09-28T12:35:00.000-07:00

Aksiyaçılar vicdan məhbuslarının məhkəməsi zamanı şüarlar səsləndirdi

Səbayel Rayon Məhkəməsinin qarşısına toplaşan müxalifətçilər növbəti dəfə polis hücumuna və fiziki təzyiqlərə məruz qaldı. Dünən İctimai Palatanın 2 aprel aksiyası zamanı həbs edilmiş və hazırda Səbayel Rayon Məhkəməsində mühakimə olunan müxalifət fəallarının məhkəməsi bitəndən sonra məhbuslara dəstək vermək üçün məhkəmə binasının önünə toplaşan 100 nəfərə yaxın müxalifətçi “Məhbuslara azadlıq”, “İstefa”, “Azadlıq”, “Vicdan məhbuslarına qarşı haqsızlığa son qoyulsun”, “Rədd olsun diktatorlar” kimi şüarları səsləndirdi.

Bu zaman yaxınlıqda toplaşmış polislər onlara hücum edərək toplaşanları dağıtmağa, susdurmağa cəhd göstərdilər və qarşıdurma yarandı. Qarşıdurma zamanı bir neçə müxalifət fəalı döyülüb yüngül xəsarətlər aldılar.

Qeyd edək ki, hər dəfə məhkəmə bitəndən sonra bu kimi hallar baş verir. Müxalifətçilər məhkəmənin önündə şüarlar səsləndirir. Bu dəfə əraziyə çoxsaylı polis qüvvəsi cəlb olunmuşdu. Həmçinin müxalifət liderləri - Müsavat başqanı İsa Qəmbər və AXCP sədri Əli Kərimlinin məhkəməyə gəlişi aksiyaçılarda böyük coşqu yaratmışdı. Elə məhkəmədən çıxan liderlər ilk olaraq jurnalistlərə açıqlama verdilər.
İ.Qəmbər “məhkəmənin gedişindən nə gözləyirsiniz” sualına belə cavab verdi: “Məhkəmənin gedişindən bir dost kimi bəraət gözləyirik. Amma bir tarixçi kimi, bir siyasətçi kimi hesab edirik ki, bunun məhkəmənin hökmünə heç bir dəxli yoxdur. Çox yaxın zamanlarda bütün dostlarımız azadlıqda olacaqlar inşallah”.

Ə.Kərimli də məhkəmənin gedişi ilə bağlı fikirlərini bildirdi: “Məhkəmədə hüquqi iş getmir. Tam siyasi bir prosesdir. Heç bir hüquqi arqumentasiya, dəlillər, sübutlar yoxdur. Amma mən bütün dostlara deyə bilərəm ki, bu gün şərti olaraq ittiham elan olunmuş şəxslər mühakimə olunmur. Rejim mühakimə olunurdu, rejimi təmsil edən prokuror mühakimə olunurdu. Bu gün sizin hər birinizin ürəyinizdən keçən ədalətli ittihamlar hamısı dostlarımız tərəfindən rejimin üzünə səsləndirildi. Mən dostlarımızla fəxr elədim”.

Gənclər müxalifət liderlərinin bu açıqlamasını alqışlarla qarşıladı. Daha sonra aksiyaçılar vicdan məhbuslarını maşınlara mindirərkən şüarlarını səsləndirməyə başladılar. Buna baxmayaraq polislər jurnalistlərlə kobud davranır və fotoçəkiliş aparmağa imkan vermirdi. Aksiya zamanı Reportyorların Azadlıq və Təhlükəsizlik İnstitutunun əməkdaşı polis zorakılığı ilə üzləşdi. Vicdan məhbuslarını məhkəmə zalından çıxararkən jurnalistlərin fotoşəkil çəkməsinə maneçilik törədilirdi.

Ötən həftə də Səbayel məhkəməsinin önündə bənzər hadisə baş vermişdi. Xatırladaq ki, dünən Səbayel Rayon Məhkəməsində İctimai Palatanın aprelin 2-də keçirdiyi razılaşdırılmamış aksiya ilə bağlı saxlanılan Müsavat Partiyası Mərkəzi İcra Aparatının rəhbəri Arif Hacılı, AXCP sədrinin müavini Fuad Qəhrəmanlı, Müsavat Partiyası Gənclər Təşkilatının sədri Tural Abbaslı və AXCP-nin şöbə müdiri Məhəmməd Məcidlinin cinayət işi əsasında məhkəmə prosesi keçirilirdi.

PROKUROR VİCDAN MƏHBUSLARINA CƏZA İSTƏDİ

2011-09-26T06:49:00.000-07:00

İctimai Palatanın 2 aprel aksiyasında tutulan, barələrində cinayət işi açılan müxalifət fəallarının məhkəməsi bu gün davam etdirilib. Səbayel rayon məhkəməsində aparılan məhkəmə prosesində dövlət ittihamçısı çıxış edib.

Məlumata görə, prokuror Arif Hacılının, Tural Abbaslının, Məhəmməd Məcidlinin 3, AXCP sədrinin müavini Fuad Qəhrəmanlının isə 2 il 6 ay müddətinə azadlıqdan məhrum edilməsini tələb edib.

Bakıda «Müsavat» küçəsində yaşamağın dərd-səri...

2011-09-19T11:06:00.001-07:00

«MÜSAVATDIR DEYƏ...»

Bakının Balaxanı qəsəbəsində «Müsavat» küçəsində yaşayanlar gileylənirlər ki, küçələrinin adı qarşısında elə bil pişik asqırıb. Yəni Müsavat adına görə onlara biganə münasibət var.

Fəxrəddin Kərimbəyli:

- Ay ərzində 1 dəfə 8 saat su buraxılır. Onu da Azərsu bələdiyyənin öhdəsinə verib. Küçə çox olduğu üçün 1 xətti bələdiyyə paylaşdırır. Elə küçə var 4 gün buraxılır, bizim küçəyə gələndə, Müsavatdır deyə, ümumiyyətlə, su buraxmırlar.

«ELÇİBƏY HAKİMİYYƏTƏ GƏLƏNDƏ...»

Balaxanıdakı bu küçəyə ad 90-cı illərdə Xalq Cəbhəsi hakimiyyəti dövründə verilib. Fəxrəddin Kərimbəyli deyir ki, bu, məhəllədə müsavatçılar çox idi:

«Elçibəy hakimiyyətə gələndə qoyulub bu ad. Atam Elçibəyin tələbəsi olub, onun təşəbbüsü ilə bu küçəyə ad qoyulmuşdu. Bu küçədə çox Müsavatçı vardı. Mənim atamın babası da müsavatçı olub. Sovet hakimiyyəti qurulanda güllələnmişdi. Atam da elə o ideologiya ilə azadlıq hərəkatına qoşulmuşdu».

Su və kanalizasiya problemi «Müsavat» küçəsinin sakinlərinin ən çox danışdığı mövzudur.

Səadət Əliyeva deyir ki, kanalizasiya üçün qazdıqları quyu artıq dolub daşmaqdadır:

«Balaxanının nefti ilə yaşayırlar, ancaq Balaxanıya baxan yoxdur. Kanalizasiya nədir axı? Yoxdur. Yuyuruq paltarı, qabı-qaşığı, atırıq bayıra».

QAZ – QAZ - QAZ

Müsavat küçəsiYanacağın qucağında yaşayan balaxanılılar «qaz» deyib dad çəkirlər. Səbəb köhnə borclardır. Sakinlərdən Akif Əzimov təəccüblənir ki, əgər prezident sərəncam imzalayıb köhnə borcları silibsə, 1600 manat borcu necə meydana çıxıb:

- Bax, budur çəkiblər, hər şey hazırdır. Bax, hamısı bağlıdır. Hamısının borcu var. Prezident silmişdi axı onların borcunu.

Digər qonşu söhbətə qoşulur:

- Biz gedək o ölüləri necə dirildək ki... Dədə-babadan qalan borclardır. Biz gedək o ölüləri necə dirildək ki, ay ölülər gəlin borcu qaytarın?

- Nə qədər mən taxta qoyum sobaya? Odun da bu gün var, səhər yoxdur. Köhnə başmaqdan-zaddan nə tapırıq, atırıq sobaya. Tək mən yox ee, hamı belədir.

- Biz özümüz neft içində yaşayırıq, qaz içində yaşayırıq. Ancaq nə qaz var, nə bir şey...

Kəndin sakinləri cavanların iş tapa bilməməyindən də ürək dolusu danışırlar. Elə hər kəs deyirdi ki, cavanlar təqaüd alan valideynlərinin hesabına yaşayırlar.

Akif Əzimov:

Müsavat küçəsindən görüntü- Cavanlar hamısı avaradırlar. Əvvəl Balaxanı zibilxanasında işləyib çörək pulu qazanırdılar. İndi bağlıdır, işə götürmürlər uşaqları, 5-6 zavod var, şəxsidir, kənd uşaqlarını götürmürlər.

«CAVANLARIMIZ İŞLƏMİR, İŞ YOXDU CAVANLAR ÜÇÜN»

-Axı prezident də deyir ki, 900 min iş yeri açılıb...

- Hanı açılıb, hanı açılıb? Düzdü, açılıb, Mərdəkandı, Buzovnadı, o tərəflərdə açılıb. Ancaq neft burdan gedir, buranın camaatına baxan yoxdur...

İCRA NÜMAYƏNDƏSİ HAMIYA BİR GÖZLƏ BAXIR?

Müsavat küçəsi sakinlərinin bu giley-güzarından Balaxanı icra nümayəndəliyinin də xəbəri var. İcra nümayəndəsi Fərhad Qəribov deyir ki, hansısa küçəyə yuxarıdan aşağı baxmaq söhbəti yoxdur:

- Bütün küçələrdə qrafiklə 10 gündən, 12 gündən, 1 həftədən bir su gəlir. Çünki qəsəbə böyükdür, suyu çatdırmaq olmur. Kanalizasiya məsələsi isə dövlət proqramındadır, inşallah 2013-cü ildə hazır olacaq. Dövlət onun üçün vəsait də buraxıb, indi ilkin işlər gedir.

Müsavat küçəsiO ki qaldı sakinlərin qazsız qalmağına, Fərhad Qəribov deyir ki, bu, vətəndaşların öz günahıdır:

- Köhnə borc ola bilməz axı. Hörmətli prezident qaz borclarını bağışladı. 2 ayın, 3 ayın pulunu vermirlər, qazı istədikləri kimi işlədirlər, yığılır borc, vermirlər, sonra da belə olur.

Bakı şəhərinin və onun qəsəbələrinin sosial-iqtisadi inkişafına dair sonuncu dəfə Dövlət Proqramı bu ilin may ayında təsdiqlənib. Bu proqramda Bakı şəhərinin və onun qəsəbələrinin elektrik enerjisi, qaz, su, kanalizasiya, vəziyyətin yaxşılaşdırılmasından bəhs edilir. Bundan başqa proqramda yolların və digər infrastruktur obyektlərinin inşası, sosial-mədəni infrastruktur obyektlərinin yenidən qurulması vəd edilir.

PROKUROR VİDADİ İSGƏNDƏRLİYƏ 4 İL İŞ İSTƏDİ

2011-08-25T13:57:00.001-07:00

Bu gün Göyçay Rayon Məhkəməsində dövlət ittihamçısı İctimai Palatanın təhqiqat qrupunun sədri, hüquq müdafiəçisi Vidadi İsgəndərliyə cəza istəyib. Prokuror Nəriman Ələkbərov V.İsgəndərlinin 4 il müddətinə azadlıqdan məhrum edilməsini xahiş edib. Bu barədə “Yeni Müsavat”a hazırda Göyçayda ezamiyyətdə olan müxbirimiz Elşən Məmmədəliyev məlumat verib.

Proses sabah 09:30-da davam etdiriləcək.

Vidadi İsgəndərli İctimai Palatanın aprelin 17-də Bakıda keçirdiyi mitinqə görə həbs olunaraq 15 sutka azadlıqdan məhrum edilib. Mayın 2-də - həbs cəzası başa çatan gün ona Cinayət Məcəlləsinin 159.4.1 və 160.2.1-ci maddələri ilə yeni ittiham elan olunub. Nəsimi Rayon Məhkəməsi onun haqda 2 aylıq həbs qətimkan tədbiri seçib. Hüquq müdafiəçisi seçki (referendumda iştirak) hüquqlarının həyata keçirilməsinə mane olma, seçki (referendum) komissiyalarının işinə müdaxilə etmə və ya təsir göstərmədə günahlandırılır. Sonradan ona Cinayət Məcəlləsinin 132-ci maddəsi ilə (döymə) yeni ittiham irəli sürülüb.

Vidadi İsgəndərli 2010-cu il noyabrın 7-də keçirilən parlament seçkisində 89 saylı Ağdaş-Göyçay seçki dairəsindən namizəd olub.

AVROPALI LİBERALLAR SİYASİ MƏHBUSLARIN AZAD OLUNMASINI TƏLƏB EDİR

2011-08-19T12:21:00.001-07:00

Avropa Liberal Demokratları Azərbaycanda siyasi məhbusların azadlığa buraxılmasını tələb edir. Bir neçə gün öncə Azərbaycanda səfərdə olan Avropa Liberal Demokratik İslahatlar Partiyasının vitse-prezidenti, Almaniyanın İnsan Haqları komissarı Markus Löning Azərbaycanda insan haqlarının kütləvi pozulmasından narahatlıq keçirdiyini bildirib. Bu barədə qurumun internet saytı məlumat yayıb.

M.Löning deyib ki, Azərbaycan hakimiyyəti müxalif səsləri boğur. Liberal Demokratik İslahatlar Partiyası bunun növbəti il paytaxt Bakıda keçiriləcək “Eurovision” musiqi yarışmasından dolayı ölkənin imicinə təhlükə yaradacağını düşünür: “Avropa Şurasının üzvü olan Azərbaycanda Sovet İttifaqı dağılandan 20 il sonra bu cür hərəkətlər yolverilməzdir. Azərbaycan hakimiyyəti başa düşməlidir ki, iqtisadi inkişaf fərdlərin azadlığı ilə çiyin-çiyinə olmalıdır. İqtisadi inkişaf fundamental azadlıqların bahasına başa gəlməməlidir”.

Avropalı Liberallar Müsavat Partiyasının üzvlərinin həbsindən narahatlıq keçirir və Azərbycan hakimiyyətindən siyasi məhbusları dərhal azadlığa buraxmağı tələb edir: “Siyasi fəaliyyət və açıq çoxpartiyalı sistem sivil və tolerant ölkənin nüvəsi sayılır. Avropa Şurasının üzvü olan hər bir ölkə insan haqları, demokratiya və hüquq normalarını cəmiyyətlərinin əsası kimi qəbul ediblər.

Avropalı liberallar Avropa Parlamentində və Avropa Şurası Parlament Assambleyasında təmsil olunan üzvləri vasitəsilə lazımı tədbirlər görəcək və bildirəcəklər ki, bu dəyərlər qorunmalıdır”.

Məlumat üçün bildirək ki, Müsavat Partiyası Avropa Liberal Demokratik İslahatlar Partiyasının üzvüdür. Bir müddət öncə Liberal Gənclərin Beynəlxalq Federasiyası Müsavat Gənclər Təşkilatının həbsdə olan sədri Tural Abbaslı, müavinləri Əhəd Məmmədli və Rüfət Hacıbəylinin dərhal azadlığa buraxılmasına dair qətnamə qəbul etmişdilər.

Leyla Yunus: “Bu, bir qisas əməliyyatı idi”

2011-08-17T12:44:00.000-07:00

Avqustun 11-də Bakıda ofisi sökülən vaxt Sülh və Demokratiya İnstitutunun direktoru Leyla Yunus Norveçdə idi. Səfəri başa çatsa da, o, Norveçdə qalaraq Bakıda ofisinin sökülməsi haqda Norveçin hökumət strukturlarını, QHT-lərini məlumatlandırmaqdadır.

Ofisi söküləndən bəri Azərbaycana yayımlanan KİV-ə ilk müsahibəsini verən Leyla Yunus Oslodan telefonla AzadliqRadiosuna deyib ki, özünə qarşı belə bir hərəkəti gözləmirdi.

- Onlar axşam saat 8-də gəliblər, elə biliblər ki, ofisdə heç kim yoxdu. Amma bizim əməkdaşımız Azad İsazadə orda olub...

- Bəs əvvəllər sizə ofisi tərk etmək haqda xəbərdarlıq edilibmi? Deyilibmi ki, ofisdən çıxmasanız, gəlib dağıdacağıq?

- Bizə nəinki deməyiblər ki, çıxın, ofis sökülə bilər, heç təklif də etməyiblər ki, ofisi sataq. Biz ümumiyyətlə, heç bir təklif almamışıq.

- Necə hesab edirsiniz, qəfildən belə bir hadisənin baş verməsi nəylə bağlı ola bilər?

- Mən bir şeyi dəqiq bilirəm. Orada ofisin sökülməsi əməliyyatına 2 nəfər rəhbərlik edib. Onlardan biri Dövlət Əmlak Komitəsinin işçisi Yusif Qəmbərov, digəri isə Bakı Şəhər İcra Hakimiyyətinin əməkdaşı Zülfəli İsmayılov olub. Və onlar deyiblər ki, bu, prezidentin sərəncamıdır.

Amma bunun yalan, yoxsa, doğru olduğunu deyə bilmərəm. Mənim anladığım budur ki, əgər bunlar gecə vaxtı xəlvətcə gəlib sanki Bakı sakininin evini yox, Ermənistanin hansısa postunu alırlarmış kimi hərəkət edirlərsə, yarım saat içində ofisi dağıdıb içindəki avadanlığı, kitabxananı, arxivi məhv edirlərsə, bu bir qisas əməliyyatıdır. Sanki demək istəyirlər ki, Leyla, səsini kəs.

Hamıya da görk olsun. Qoy, insanlar düşünsün ki, bir halda ki, Leylanın evini ATƏT-in nümayəndəliyinin, Avropa səfirlərinin gözü qarşısında uçururlar, o da öz əmlakını müdafiə edə bilmirsə, onda biz ümumiyyətlə heç nə edə bilmərik.

Ona görə qisas deyirəm ki, bu ilin fevralından bəri mən prezidentin adına 8 məktub göndərmişəm. Həmin məktubların surətini daxili işlər nazirinə, baş prokurora, Bakı Şəhər İcra Hakimiyyətinə də yollamışam. Həmin məktubun surətini kütləvi informasiya vasitələrinə göndərmişik.

Orada deyilir ki, Azərbaycan prezidenti korrupsiyaya qarşı mübarizə elan edib. Biz bu kampaniyanı dəstəkləyirik. Vətəndaşları da çağırırıq ki, üzləşdikləri korrupsiya halları haqqında prezident aparatına məlumat versinlər. Məktubda prezidentə də müraciətlə yazılır ki, Sülh və Demokratiya İnstitutu olaraq əlimizdə olan korrupsiya faktlarını sizə göndəririk.

Azərbaycanda iqtisadi sahədə mövcud olan böyük korrupsiya mexanizmi barədə məlumatları da sənədlərlə birlikdə o məktuba əlavə etmişdik. Qeyd etmişdik ki, burada böyük korrupsiya məsələləri var.

Sülh və Demokratiya İnstitutu sökülür. 11 avqust 2011Məktubda Bakı Şəhər İcra Hakimiyyətindən Hacıbala Abutalıbov, Dövlət Əmlak Komitəsindən Kərəm Həsəsov, eləcə də onların işçiləri Zülfəli İsmayılov, Yusif Qəmbərovun adı çəkilirdi.

Biz məktuba sənədlər əlavə etmişdik ki, Dövlət Neft Şirkəti, Neft Fondu, Vergilər Nazlirliyi məmurların şəxsi hesablara yüz milyonlarla manat pul köçürürlər. Şəxsi hesabına pul köçürülən adamlar həmin pullarla başqa vətəndaşlardan evlər alırlar.

Halbuki Konstitusiyaya, qanunlara görə, hökumət Bakının harasınısa sökmək istəyirsə, gərək Nazirlər Kabineti bu haqda qərar çıxarsın, qərar dövlət reyestrinə düşsün, sonra gərək parlament həmin qərarı müzakirə etsin, sonra prezident ona qol çəksin ki, həmin işlərə büdcədən pul ayrılsın. Və hamı bilməlidir ki, hansı küçələr söküləcək.

Vətəndaşlar bilməlidirlər ki, onları evləri söküləcək, ya yox. Və bundan 3 il sonra vətəndaşların evləri sökülməyə başlanmalıdır. Amma burda böyük bir kriminal var.

Yəni heç kim bilmir ki, kimin evini sökəcəklər. Bir gün Netfçilər prospektində sökürlər, sabah Şəmsi Bədəlbəyli küçəsində, o biri gün Vidadi küçəsində.

Heç kim bilmir ki, pulu kim verir. Pul hardan gəlir. Mən bu faktları yerli mətbuatda çap etməklə yanaşı xarici mətbuata da yaymışam. Avqustun 10-da “The New York Times” qəzeti də bu barədə yazıb. Ofisimin sökülməsi isə məndən qisas alınmasıdır.

- Yəni kim tərəfindən qisasdır? Kimi nəzərdə tutursunuz?

- Azərbaycanda kim ki bu korrupsiyaya rəhbərlik edir, onların tərəfindən qisas. Çünki qanun yoxdur. Məhkəmə yoxdur. Azərbaycan mafiozi ölkədir.

- Ofisinizin sökülməsi ilə bağlı beynəlxalq reaksiyalar sərt oldu...

- Bəli. ABŞ-ın Azərbaycandakı səfirliyi, Avropa Birliyinin Azərbaycandakı nümayəndəliyi bəyanat verdilər və s.

Və mənim fikrimcə, bu, yalnız başlanğıcdır. Mən özüm də Norveçin Xarici İşlər Nazirliyində oldum. Nazirlik də bəyanat verdi. Norveçin ən populyar qəzeti sayılan “VG” də məqalə dərc edib. Başlığı belədir: “Avroviziya

müsabiqəsinə bir il qalmış Bakıda insan haqları müdafiəçisinin evi söküldü”.

Norveçin ən populyar radiostansiyası da məndən müsahibə aldı. “The New York Times” da bu günlərdə hadisə ilə bağlı böyük məqalə çap etdi. “Human Rights Watch” da, “Amnesty İnternational” da bəyanat veriblər. Müxtəlif ölkələrin qeyri-hökumət təşkilatları da Prezident Aparatının, Bakı şəhər İcra Hakimiyyətinin ünvanına çoxsaylı məktublar yollayırlar.

- Bu söküntüdən sizə nə qədər ziyan dəyib?

- Evin dəyəri bazar qiymətləri ilə desək, 600 min dollardan çoxdur. O cümlədən əmlak – kompüter, televizor və s.

Amma elə şey də var ki, onları heç vaxt bərpa edə bilmərik. Bu, arxiv və kitabxanadır. Bu, çox qiymətli arxiv idi. Orada Azərbaycanın ilk “samizdat” qəzetləri vardı. Onları Azərbaycan Xalq Cəbhəsi Tallində, Vilnüsdə çap edirdi. Sonra mən özüm onları çamadanlarda Bakıya gətirirdim.

Mənim və başqa azərbaycanlı müəlliflərin o dövrdə Rusiyada və başqa yerlərdə Azərbaycan həqiqətləri haqda çap edilən məqalələrimiz, 19-cu əsrə aid kitablar – bütün bunlar itib-batdı. Mənim şəxsi albomumdan babamın, nənəmin şəkilləri də həmçinin.

- Avropa İnsan Haqları Məhkəməsinə şikayət etmək fikriniz varmı?

- Biz artıq Azərbaycandakı bütün məhkəmə instansiyalarını keçmişik və Avropa Məhkəməsinə müraciət etmək niyyətindəyik.

Mənim avropalı həmkarlarım da deyillər ki, siz müraciət edin, biz də bu məsələni diqqətdə saxlayacağıq. Ümumiyyətlə, mənə böyük dəstək var onlardan. Mən burda Norveçdə bir konfransda iştirak etdim.

Orda çıxışlarda deyildi ki, biz Azərbaycan hökumətinin Avroviziya yarışması ərəfəsində Bakını gözəlləşdirməyə çalışdığını görürük, amma heç zaman bunun belə bir qiymətə başa gəlməsini istəmərik, çalışacağıq ki, bu qanunsuzluqlar haqda məlumatları Avropa mətbuatına yayaq.

Mitinqlə bağlı müraciət etdiyi üçün şöbəyə aparıldı

2011-08-12T06:14:00.001-07:00

Gədəbəy sakini rayon icra hakimiyyəti başçısı tərəfindən təhqir olunduğunu və sonra da polisə aparıldığını deyir.

Dəyirmandağ kənd sakini Asəf Musayev deyir ki, mitinq keçirmək üçün bu ilin aprelində göndərdiyi müraciətə, torpaq bölgüsündə saxtakarlıqlarla bağlı şikayətlərinə cavab almaq üçün avqustun 12-də icra hakimiyyətinə gedib. İcra başçısı Kamran Rzazadə isə onu söyüb, təhqir edib:

«Kamran Rzazadə cavabımı dinləmədən məni söyüşlərlə təhqir etdi ki, niyə mən mitinq üçün aprel ayının 10-da rəsmi müraciətlə ondan icazə istəmişəm. Sonra da yanında olan polis rəisinin müavini Fəzail Məmmədova dedi ki, aparın bunu içəri salın».

Asəf Musayev deyir ki, o, şöbəyə aparılıb. Ağlını başına yığmasa, şərlənib həbs ediləcəyini bildirərək sərbəst buraxıblar.

Gədəbəy rayon İcra Hakimiyyətinin başçısı Kamran Rzazadə isə AzadlıqRadiosuna bildirib ki, o, vətəndaşların qəbulunu ictimaiyyət nümayəndələri qarşısında keçirdir və kimsə təhqir edilmir:

«Biz özümüzü o qədər itirməmişik ki, kimisə təhqir edək. O, düz demir. Qəbulumda olub. Amma mitinqlə bağlı heç bir söhbət olmayıb. Deyir islahat vaxtı ona az torpaq veriblər. Mən də deyirəm islahat 1996-cı ildə gedib. Düz aparılmayıbsa, məhkəməyə müraciət et».

Gədəbəy rayon polis şöbəsinin rəis müavini Fəzail Məmmədov isə AzadlıqRadiosuna deyib ki, Asəf Musayev icra hakimiyyətinə mitinqlə bağlı müraciət etdiyi üçün şöbəyə aparılıb:

«Gəlib orada müraciət elədi ki, mən mitinq edəcəm. Mən də göndərdim ki, get müavin Bəhmən müəllimin yanına, araşdırsın ki, şənin şikayətin nədir. Qanunsuz mitinq olmaz. Bir az əvvəl yanımda idi. 5 dəqiqə onunla profilaktik izahedici söhbət aparıldı və o, getdi».

GƏNCLƏRİN MÜDAFİƏ KOMİTƏSİ TOPLANDI (FOTOLAR)

2011-08-11T11:58:00.000-07:00

Bu gün Müsavat partiyasının qərargahında gənc siyasi Məhbusların Hüquqlarını Müdafiə Komitəsi “12 Avqust Beynəlxalq Gənclər günü: həbsdə olan gənclər” mövzusunda dəyirmi masa keçirdi. Tədbirdə Müdafiə Komitəsinə daxil olan AXCP , Müsavat , ADP, Ümid partiyalarının gənclər təşkilatları və Azad Gənclik və Nida Vətəndaş hərəkatının üzvləri, hüquq müdafiəçiləri iştirak edirdi.

Tədbiri giriş sözü ilə açan Müsavat partiyasının Gənclər Təşkilatının sədr müavini Səxavət Soltanlı Müdafiə Komitəsi həbsdə olan gənclərin qanunsuz həbsini ictimailəşdirmək, yerli və beynalxalq ictimaiyyətin diqqətinə çatdırmaq üçün beynalxalq gənclər günündə dəyirimi masanın keçirlməsini vacib bildi.

Sonra çıxış üçün söz AXCP Gənclər Komitəsinin sədri Əbülfəz Qurbanlıya verildi: “Müdafiə Komitəsi bütün dünyanın gəncləri üçün əlamətdar olan bir gündə bir araya gəlmişik. Dünyanın sivil ölkələrində 12 avqust gənclərin müxtəlif sahələrdə inkişafını sürətləndirən tədbirlər keçirilir, müzakirə aparılır, təkliflər verilir. Bu gün dünyada gənclər arasında, gənclər və yaşlı nəsil arasında “qarşılıqlı anlaşma və dialoq günü” kimi yadda qalır. Təəssüf ki, Azərbaycanda bu mümkün deyil. Keçən il bu vaxt Xalq Cəbhəsinin Gənclər Komitəsi həbsdə olan bloqqerlər Emin Milli və Adnan Hacızadə ilə bağlı tədbir keçirlimişdi. Bu il yenə də Beynalxalq gənclər gününu fikir müxtəlifliyinə, azadlıqlar və bütün azərbaycanlıların hüquqları uğrunda həbsə düşmüş gənclərə həsr olunan tədbirin iştirakçısıyıq. Müdafiə Komitəsi indiyə qədər bir sıra tədbirlər keçirib. Gənclərin həbsxanadkı durumu ilə bağlı İctimai Komitəyə, Monitorinq Qrupuna, Ədliyyə Nazirliyinə və digər qurumlara müraciət etmişik. Çox istəyərdik ki, komitədə təkcə gənclər təşkilatlarının üzvləri deyil, həm də müstəqil gənclər və beynəlxalq gənclər təşkilatları birləşsin və bu istiqamətdə iş aparmağı nəzərdə tuturuq”.
ADP Gənclər Təşkilatının sədri Cəmil Hacıyev 12 avqustun 1998ci ildən “Beynəlxalq gənclər günü” qeyd olunduğunu xatırladaraq Müdafiə Komitəsinin bu dəyirmi masasının sırf həbsdəki gənclərlə bağlı olduğunu bildirdi: “Müdafiə Komitəsinin araşdırmaları nəticəsində məlum oldu ki, gənclərin cəzaçəkmə müəssisələrində vəziyyətləri o qədər də yaxşı deyil. Bu cəzaçəkmə müəssisələri bağlanmalıdır. Həmçinin, Gənclər və İdman Nazirliyi ilə əlaqə saxladıq. Onlar bizə bildirdilər ki, siz bizim apardığımız siyasətə qarşı gəlirsiniz. Nazirlik yalnız İrəli və digər hakimiyyətə yönəlik siyasət aparır”.

Dəyirmi masada iştirak edən Seçkilərin Monitorinqi və Demokratiyanın Tədrisi Mərkəzinin icraçı direktoru, hüquq müafiəçisi Anar Məmmədli isə təklif etdi ki, gənclərin həbsdən azad olması üçün dünya səviyyəsində kampaniya aparılmalıdır: “Avropa Şurasına daxil olan gənclər təşkilatları ilə işləmək lazımdır. Tədbirlərə BMT-nin nümayəndələri dəvət olunmalıdır”.

A.Məmmədli bildirdi ki, onun özünün də gənclər təşkilatlarında təmsil olunduğu vaxtlarda ilk gənc siyasi məhbus olan AXCP üzvü Fuad Qəhrəmanlının hüquqlarını müdafiə komitəsində fəaliyyət göstərib: “O zaman müxtəlif partiyalar, gənclər həmin müdafiə komitəsində birləşərək çox güclü kampaniya aparmışdı. İndi də o dövrlə müqayisədə müəyyən sosial, maddi resursların çatışmazlığı olsa da hazırda həbsdə olan gənclərlə bağlı yüksək səviyyədə kampaniya aparmaq mümkündür”.

AXCP Gənclər Komitəsinin sədr müavini Ramil Qafarov çıxış edərək qeyd etdi ki, məhkəmələrdə iştirak edirik amma audio-video çəkilişə icazə verilmir: “Təklif edirəm ki, müdafiə komitəsində xarici dil bilən gənclərdən ibarət qrup məkhəmələrdə baş verən və mətbuat səhifələrində öz əksini tapan epizodik, gülünc məqamları tərcümə edib, xarici qəzetlərə, xarici mətbuata göndərək”.

Nida Vətəndaş Hərəkatının təmsilçisi Etibar Salmanlı bildirdi ki, MK-si həbsdə olan gənclərlə bağlı sayt hazırlayır və yaxın müddətdə sayt ictimaiyyətə təqdim olunacaq. Həmçinin qeyd etdi ki, MK-si gördüyü işlərdən biri də yerli ictimaiyyəti gənc məhbuslarla bağlı məlumatlandırmaq olub. Belə ki, MK-si müxtəlif ünvanlara xeyli sayda məktublar göndərib.

Tədbirdə Bəxtiyar Hacıyevin təmsilçisi Rəşad Həsənov, müstəqil gənc Rafiq Abdulla müxtəlif təkliflərlə çıxış etdilər.

http://www.musavat.com/new/Son_xəbər/106052-GƏNCLƏRİN_MÜDAFİƏ_KOMİTƏSİ_TOPLANDI_(FOTOLAR)

2 aprel aksiyaçılarının məhkəməsində qarşıdurma yaranıb (VİDEO)

2011-08-05T14:04:00.001-07:00

«Məni polis bölməyə çağırıb, deyib ki, ifadə yazım. Mən də gördüklərimi yazmışam». Bunu avqustun 5-də Səbail rayon Məhkəməsində Sahib Kərimov, Arif Alışlı, Elnur İsrafilov, Babək Həsənov, Zülfüqar Eyvazov və Elşən Həsənovun işi üzrə məhkəmə iclasında şahid kimi dindirilən qəzet satıcısı Rəfael Məhərrəmov deyib. Vəkillərin tələbi ilə Rəfael Məhərrəmovun istintaqa verdiyi ifadə oxunandan sonra bu ifadə ilə onun məhkəməyə dedikləri arasında ziddiyyətlərin olduğu üzə çıxıb. Şahid ziddiyyətlərin nəylə əlaqəli olduğunu izah edə bilməyib:

Vəkil Yalçın İmanov: "Bəlkə kimsə sizə necə yazmaqla bağlı göstəriş, məsləhət verib?"

Rəfael Məhərrəmov bu cür sualların qarşısında yalnız susub.

«HADİSƏ APRELİN 2-Sİ 1911-Cİ İLDƏ BAŞ VERİB»

Məhkəmədə şahid kimi dindirilən aksiya günü həmin ərazidə limon satan Malik Məmmədov və gül satan Famil Səfərov da bildiriblər ki, onları ifadə vermək üçün polis bölməsinə polislər aparıblar. Onların da istintaqa verdikləri ifadələr oxunduqdan sonra həmin ifadələri ilə məhkəmədə dedikləri arasında ziddiyyətlərin olduğu üzə çıxıb. Vəkillər vəsatət qaldırıblar ki, bu şəxslər yalan ifadə verdiklərinə görə məsuliyyətə cəlb olunsunlar.

Hakim Elnur Həsənov vəsatəti açıq saxladığını, məsələyə sübutları qiymətləndirmə mərhələsində qayıdacağını deyib.

«Hadisə aprelin 2-si 1911-ci ildə baş verib». Məhkəmə iclasında şahid kimi dindirilən polislərdən ikisi ifadəsinə bu cümlə ilə başlayıblar. Onların bu səhvi zalda gülüşmə doğurub.

«AVTOBUS 50 SANİYƏ DƏ TIXACDA QALSAYDI... »

«İçərisində aksiyaçılar olan avtobus 50 saniyə də artıq tıxacda qalsaydı, çöldəki aksiyaçılar içəri girib Allah bilir bizə nə edərdilər». Bunu da şahid kimi dindirilən çevik polis alayının serjantı Nəsimi Əliyev deyib. O, aksiyaçıların «İstefa, Azadlıq» şüarları qışqırmasını aqressivlik kimi qiymətləndirib. Daha sonra məhkəmədə dedikləri ilə istintaqa verdiyi ifadələr arasında ziddiyyətin üzə çıxdığını görən Nəsimi Əliyein məsələyə münasibəti belə olub:

«Hadisə 4 ay əvvəl olub. Vəkillər də çaşdırıcı suallar verirlər. Cavan oğlanam, düşmüsüz üstümə»

İttiham olunan Sahib Kərimov: «Siz 5-6 suala görə kondinsionerli otaqda tər tökürsüz. Biz isə həm də sizin ifadənizə görə 4 aydır ki, 50 dərəcə istisi olan kamerada qalırıq».

«ÇIXARIN MƏNİ ZALDAN»

Hakim Sahib Kərimovun yerindən şahidlərin ifadəsinə müdaxilə etdiyini irad tutub, Sahib Kərimovsa cavabında «çıxarın məni zaldan» deyib.

İfadə verən həm polislər, həm də digər vətəndaşlar təqsirləndirilən şəxslərin avtobusun şüşəsini sındırdıqlarını görmədiklərini bildiriblər. Onu da əlavə ediblər ki, aksiya iştirakçıları tərəfindən onlara hər hansı xəsarət dəyməyib. Vəkillər bir neçə polis əməkdaşının da məhkəmədə dedikləri ilə istintaqa verdikləri ifadələrin ziddiyyət yaratdığını bildirərək onların məsuliyyətə cəlb olunmalarına dair vəsatət qaldırıblar.

Vəkillər ittiham tərəfinin şahid kimi təqdim etdiyi «Transqeyt» MMC-nin nümayəndələrindən birinə - aksiyanın şahidi olmamış dəstə rəisinin şahid kimi dindirilməsinə etiraz ediblər. Hakim onların bu etirazını qəbul edib.

PROSESDƏ QALMAQAL

Prosesdə 14-15 yaşlarında bir oğlanın telefonla çəkiliş aparması üstündə qalmaqal da yaranıb. Həmin oğlanın prosesdən çıxarıldıqdan sonra nəzarətçilərin otağında saxlanılması zaldakıların etirazı ilə qarşılanıb.

Ayağa qalxıb məhkəmənin saxta olduğunu deyən bir qadının zaldan çıxarılması etirazları daha da artırıb.

Bu prosesdə Müsavat partiyasının başqanı İsa Qəmbər və AXCP sədri Əli Kərimli də iştirak ediblər. Müsavat başqanı İsa Qəmbər bizə bildirdi ki, əslində məhkəmədə bu işin tamamilə qondarma olduğu aydınlaşır. O bu işdə polislərin şahidlik etməsini biabırçılıq adlandırıb deyir ki, polislər ibtidai istintaqa verdikləri ifadəni müstəntiqlərin diktəsi ilə yazdıqları üçün indi onu xatırlamırlar. Ona görə də o vaxt yazdıqları ilə indi dedikləri arasında ziddiyyət var. Bu da ifadələrini məhkəmədə iflasa uğradır:

«Gürcüstan qanunvericiliyinə görə hər hansı bir şahidin istintaq zamanı verdiyi ifadə ilə məhkəmədəki ifadəsi arasında ziddiyyət yaranırsa, məhkəmədəki ifadə əsas götürülür. Nəzərə alınır ki, məhkəmədən fərqli olaraq istintaqa ifadə ictimaiyyət qarşısında, sərbəst şəkildə verilmir, müstəntiqlər tərəfindən işgəncə, təziyiq ola bilir».

Əli Kərimli də bildirir ki, heç bir şahid təstiq etmir ki, bu gün mühakimə olunan şəxslər haradasa qanunsuz iş gördüklərini heç bir şahid təsdiq etmir:

«Bu cinayət işi əvvəlcədən quraşdırılmışdı, saxta idi. Və bu məhkəmə prosesi tam aydın şəkildə sübut edir ki, bu iş mitinq iştirakçılarını həbs etmək üçün quraşdırılıb. Qisas məqsədi daşıyır. İttiham göz qabağında tamamilə ifşa olunur. Əslində bizim müqəssir elon olunmuş dostlarımız məhkəmədə ittihamçı kimi çıxış edirlər».

MƏHKƏMƏ İCLASINDAN SONRA

Sözügedən məhkəmədə müttəhim kürsüsündə əyləşən 6 nəfər Cinayət Məcəlləsinin 233-cü (ictimai qaydanın pozulmasına səbəb olan hərəkətləri təşkil etmə və ya bu cür hərəkətlərdə fəal iştirak etmə) və 186.1-ci (özgənin əmlakını qəsdən məhv etmə və ya zədələmə) maddəsi ilə təqsirləndirilirlər.

Hakim ittihamları haqlı bilsə, müxalifət fəalları üç ilə qədər azadlıqdan məhrum edilə bilərlər.

İttiham aktına görə, bu 6 nəfər asayişi pozub, polisin tələbinə məhəl qoymayıb, 25 mülki şəxsə və polisə xəsarət yetirib. Eyni zamanda, hərəkətdə olan avtobusu dayandırıb üç nəfəri qaçırdıblar, həmin avtobusa 1325 manat ziyan vurublar.

Həmin aksiyaya görə ümumilikdə 14 nəfər cinayət məsuliyyətinə cəlb edilib.

Ancaq müdafiə tərəfi bu ittihamları böhtan və siyasi sifariş hesab edir. Növbəti məhkəmə iclası avqustun 10-dadır.

Avqustun 5-i məhkəmə prosesi başa çatandan sonra məhkəmə binası qarşısına toplaşan ittiham olunanların yaxınları, müsavat və AXCP-dən olan fəallar «Azadlıq», «İstefa» şüarları səsləndiriblər. Onlar məhkəmə binası qarşısındakı yolu kəsməyə cəhd etsələr də, polis bunun qarşısını alıb.

Zərərçəkmiş: “Mən üzə dayanmağa xəcalət çəkirəm”

2011-08-02T13:28:00.000-07:00

MƏHKƏMƏ ZALINDA “KOMXOZ” İŞÇİLƏRİ?

Göyçay rayonunda məhkəməsi keçirilən hüquq müdafiəçisi Vidadi İsgəndərli avqustun 2-də iclas başlanan kimi zalda oturmuş adamlara etirazını bildirdi:

- Möhtərəm hakim, zalda oturan bu adamları hər dəfə bura icra hakimiyyəti yığıb göndərir. Onların bu prosesə nə aidiyyətləri var? Niyə mənim qohumlarım, ailə üzvlərim qapı arxasında qalmalıdır, bu adamlarsa demək olar ki, zalın yarısını tuturlar. Hər dəfə əvvəlcə bu adamlar zala gətirilir, yerləşdirilir. Mən tələb edirəm ki, onları zaldan çıxarasınız.

Bu adamlar “komxoz” (Kommunal Təsərrüfat Birliyi – red.) işçiləridir. Onlar dövlət işində işləyirlər və bu saatlarda iş başında olmalıdılar. Ancaq hər dəfə gətirilirlər bura, iş günlərini burda keçirirlər. Başqası bircə saat işə geciksə, əmrini verib işdən qovarlar.

Hakim:

- Açıq məhkəmədir, mən heç kəsə deyə bilmərəm gəlmə.

Vidadi İsgəndərli:

- Axı siz özünüz də görürsünüz ki, onlar burda təxribat edirlər. Keçən dəfə vəkilimin üstünə cumublar. Sizsə reaksiya vermirsiniz. Mən tələb edirəm ki, vəkilimə hücum edənlər barədə ölçü götürülməsi ilə bağlı qərar qəbul edəsiniz.

HAKİMDƏN DÖZÜMLÜLÜK

Hakim zalda əyləşmiş zərərçəkmiş Şərafəddin Bayramovu ifadə vermək üçün tribunaya dəvət etmək istəyirdi ki, zalda əyləşənlərdən biri yerindən qışqırdı:

- Sən öləsən, Vidadi, səni biabır edəcəm Göyçayda, hamıya “afişa” buraxacam ki, səni üzdəniraqlarla bir kamerada saxlayırlar.

Bunu deyən Qarayazı kəndinin keçmiş bələdiyyə sədri, Göyçay şəhər Kommunal Təsərrüfat Birliyinin sədri Loğman Əliyev idi. O, məhkəmə iclasına ilk gündən gəlir və buna qədər də Vidadi İsgəndərliyə atmacalar söyləməklə məhkəmə iclaslarının gedişatını dəfələrlə pozub.

Bu dəfə də məhkəmə zalında ara qarışdı. Vidadi İsgəndərli masanın üstündəki su ilə dolu qabı götürərək Loğman Əliyevə tərəf atmaq istəyəndə polis işçiləri qarşısını kəsdilər. Hakimsə baş verənləri seyr etdikdən sonra məhkəmə zalından çıxdı. Loğman Əliyevin söyüşləri qarşısında polis işçiləri də acız qalmışdılar. Nəhayət, onların uzun-uzadı xahişlərindən sonra Loğman Əliyev zaldan çıxmağa razılaşdı.

Ancaq mübahisə bununla bitmədi. Bu dəfə zalda əyləşmiş “komxoz” işçilərindən biri Vidadi İsgəndərlinin qohumlarını söyməyə başladı. Nəticə də belə oldu ki, polis işçiləri həmin şəxsi yox, Vidadi İsgəndərlinin bir neçə qohumunu itələyərək məhkəmə zalından çıxartdılar. 5 dəqiqədən sonra hakim zala qayıtdı. Vidadi İsgəndərli:

- Möhtərəm hakim, mən birinci gündən sizə deyirəm ki, bu adamları zala buraxmayın. Sizsə onlardan qorxursunuz. Loğman Əliyev sizin gözünüzün qarşısında məni təhqir edir, siz tamaşa edirsiniz. Bu da bir daha sübut edir ki, İcra Hakimiyyətinin göndərdiyi adamlara söz deməyə, onları zaldan çıxarmağa hünəriniz çatmır. Çünki siz də o kürsüdə necə gəlib oturmusunuz, hamıya yaxşı bəllidir.

Hakim:

- Mən özüm yaxşı bilirəm burda necə oturmuşam. Bu, sizlik deyil.

“MÜSTƏNTİQ YAZIB, MƏNƏ QOL ÇƏKDİRİB”

Nisbətən sakitlik yarandıqdan sonra məhkəmə iclası davam etdirildi. İfadə vermək üçün kürsüyə zərərçəkmiş Şərafəddin Bayramov dəvət edildi. Anket məlumatları elan olunarkən dedi ki, uşaqlıqda adı orta məktəbdə getsə də demək olar ki, məktəb üzü görməyib. Yazıb oxumağı bacarmır.

Hakim:

- Vidadi İsgəndərlini tanıyırsınız?

Zərərçəkmiş:

- Xeyr. İndi məhkəmədə gördüm.

Hakim:

- Səsvermə günü məntəqədə nə görmüsünüz?

Zərərçəkmiş:

- Getdim məntəqəyə. 50-100 metr qalmış binadan səs-küy eşitdim, səs verməyə getmədim, qayıtdım evə.

Prokuror:

- Niyə qayıtdınız evə, səs-küy sizə mane olurdu ki səs verməyə?

Zərərçəkmiş:

- Mən müharibə veteranıyam, müharibədə ağır yaralanmışam və səs-küyə düşəndə mənə pis təsir edir. Ona görə də geri qayıtdım.

Prokuror:

- Məntəqədə adam çox idi?

Zərərçəkmiş:

- Məntəqəyə girmədiyimə görə adamları görmədim.

Prokuror:

- Sonra maraqlandınız ki, nə səs-küy imiş orda?

Vəkil:

- Mən etiraz edirəm. Bu adamın sonra ordan-burdan nə eşitdiyi əhəmiyyətli deyil. O, ancaq özü hadisə yerində gördüyünə əsaslanıb danışa bilər.

Prokuror:

- Səs-küy kimlərin arasında idi?

Zərərçəkmiş:

- Dedim axı, mən heç məntəqənin içini görməmişəm. Uzaqdan səs küy eşidib qayıtmışam. Nə bilim kimin arasında idi.

Hakim:

- İfadə müstəntiq tərəfindən sizə elan olunmuşdu?

Zərərçəkmiş:

- Yox.

Sonrakı sual cavablardan aydın oldu ki, zərərçəkənin ifadəsini müstəntiq yazıb, o isə imzalayıb.

Zərərçəkmiş:

- Mən burda dayanmağıma xəcalət çəkirəm. Mən bu kişinin üzünə necə dayanım? Məcbur etsələr də, üzə dura bilmərəm. Burda sizə nə demişəmsə, istintaq vaxtı müstəntiqə də onu demişəm. Mən məntəqənin içərisini görməmişəmsə, necə bilərdim ki, orda səs-küyü yaradan Vidadi İsgəndərli olub? Müstəntiq savadsızlığımdan istifadə edib.

Vidadi İsgəndərli:

- Siz özünüzü zərərçəkmiş hesab edirsiniz?

Zərərçəkmiş:

- Yox.

Vidadi İsgəndərli:

- Məni sizin ifadələriniz əsasında 3 il həbsdə saxlaya bilərlər.

Zərərçəkmiş:

- Vallah, dedim axı mən sizi tanımıram, görməmişəm. Özləri yazıblar, mənə qol çəkdiriblər. Üzə durmaq mənlik deyil, mən üzə dayanmağa xəcalət çəkirəm.

ZİDDİYƏTLİ İFADƏLƏR

Şərafəddin Bayramov bildirdi ki, müstəntiqin yanına getməzdən əvvəl kənd icra hakimiyyəti nümayəndəsinin müavini ona hansısa sənədə imza atdırıb:

Zərərçəkmiş:

- Mən hərf tanımıram. Səyyad müəllimdən soruşdum bu nə sənəddir, dedi ki, kim səsvermədə iştirak etməyibsə bura imza atmalıdır. Mən də imzaladım. Sonra prokurorluğa çağırdılar.

Vəkil:

- Möhtərəm hakim, göründüyü kimi, zərərçəkmişlərin və şahidlərin istintaqa cəlb olunması icra strukturlarının iştirakı ilə baş verib. Bu gün kənar adamların məhkəmə zalına yerləşdirilməsindən də görünür ki, həmin icra strukturları necə ki, istintaqa təzyiq etmişdilər, indi də məhkəməyə təzyiq edirlər. Vəsatət verirəm ki, həmin icra strukturu əməkdaşlarının cinayət məsuliyyətinə cəlb olunmaları üçün xüsusi qərardad çıxarılsın.

Məhkəmə iclası avqustun 3-də davam edəcək.

Vidadi İsgəndərli ötən il noyabrın 7-də Milli Məclisə keçirilən seçkidə 89 saylı Göyçay-Ağdaş Seçki Dairəsindən deputatlığa namizədliyini irəli sürüb. İttihama görə seçki zamanı Qarabağlar kəndində yerləşən 16 saylı seçki məntəqəsinə daxil olaraq səsvermənin gedişinə maneçilik törədib. Məntəqə seçki komissiyası tərəfindən aktla sənədləşdirilmiş, küncü səhv kəsilmiş 16 ədədə büllüteni komissiya sədrindən zorla alıb. Bir neçə saat sonra Mirzəhüseynli kəndində yerləşən 17 və Göyçay şəhərindəki Mədəniyyət Evində yerləşən 2 saylı seçki məntəqələrində də eyni hərəkətləri təkrar edib.

Vidadi İsgəndərli bu il aprelin 17-də müxalifətin yeni birliyi olan İctimai Palatanın mitinqi zamanı saxlanılıb. Onun barəsində Nəsimi rayon Məhkəməsinin seçdiyi 15 sutkalıq inzibati həbs müddəti başa çatdıqdan sonra barəsində cinayət işi olduğu əsas gətirilərək həbs müddəti uzadılıb.

O, Cinayət Məcəlləsinin 159.3-cü (vətəndaşı öz iradəsinə zidd səs verməyə məcbur etmə və ya onun səs verməsinə mane olma) və 160.1-ci (seçki komissiyalarının işinə müdaxilə etmə və ya təsir göstərmə) maddələri ilə təqsirləndirilir. Bi ittihamlarla o, üç ilə qədər azadlıqdan məhrum edilə bilər.

Oğlunun məhkəməsinə getmək istəyən ata döyülərək həbs olundu

2011-07-30T11:30:00.000-07:00

Adı işgəncələrdə hallanan rəis müavini bu dəfə də ənənəsinə sadiq qaldı

Arzuman Məcidli: "Süleyman Nemətov əməlli-başlı qoçuluq edirdi"

2 aprel mitinqinə görə həbsə atılan gənclərin - AXCP fəalı Elnur Məcidli, Müsavat fəalları Əhəd Məmmədli, Rüfət Hacıbəyli və bitərəf Ülvi Quliyevin işi üzrə dünən Nəsimi Rayon Məhəkəsində keçirilən prosesdə başdan sona qədər qalmaqal yaşandı. Prosesi izləmək üçün məhkəmə binasının önünə gənc fəalların ailə üzvləri, yaxınları, partiya yoldaşları toplaşmışdı. Elə ilk insident polislərlə onlar arasında yaşandı. Ötən prosesdəki izdihamın təkrarlanmaması üçün ərazidə Nəsimi Rayon Polis İdarəsinin çoxlu sayda əməkdaşı, həmçinin Post Patrul Xidməti maşınları var idi.

Üstəlik yaxınlıqdakı çayxananı da yığışdırmışdılar ki, adamların oturması üçün yer olmasın.

Polislərin "təmizləmə əməliyyatı"

Polislər prosesə gələnlərdən məhkəmə binasının önündən uzaqlaşmağı, hasarın arxasında dayanmağı tələb etməyə başlayanda mübahisə yarandı. Qarşı tərəf etiraz etdi ki, binanın önündə dayanmaq hüquqları var və kimsə onları ərazidən uzaqlaşdıra bilməz. Polis işçiləri yenə təkidlə ərazini tərk etməyi tələb edərək prosesə buraxılacaq şəxsləri özləri siyahı ilə çağıracaqlarını bildirdilər. Təxminən on beş dəqiqə tərəflər arasında söz atışması getdi. Gənclər heç bir halda məhkəmənin önündən tərpənməyəcəklərini bildirdilər. Elnur Məcidlinin atası Arzuman Məcidli də oğlunun məhkəməsinə gəldiyini və onu binanın önündən qovmağa kimsənin ixtiyarının olmadığını deyərək polislərə etirazını bildirdi. Etirazlara baxmayaraq polislər adamları zorla hasara tərəf sıxışdırmağa başladılar. Bu zaman müsavatçı fəal Ramil Abdullayevlə polislərdən biri arasında mübahisə başladı. R.Abdullayev üzünü həmin polisə tutaraq "hələ bilmək olmaz o formanı çıxardandan sonra kimsən, nömrəni tapıb görüşəcəm səninlə" - deyərək əsəbi şəkildə reaksiya verdi.

"Əəə, sən kimsən ki, polisi hədələyirsən?"

Elə bu anda hadisə yerinə xidməti avtomobili ilə Nəsimi Rayon Polis İdarəsinin rəis müavini Süleyman Nemətov gəldi. S.Nemətov R.Abdullayevin polislə söz mübahisəsinə qəddarlıqla müdaxilə etməyə başladı. "Əəə, sən kimsən ki, polisi hədələyirsən, nömrəsini tapıb görüşürsən" deyən rəis müavini R.Abdullayevin üzərinə hücum etdi. Gənc faəla qəzəblə yaxınlaşan S.Nemətov R.Abdullayevin qarnına yumruğu ilə çox ağır zərbə endirdi. Zərbənin ağırlığından ikiqat olan R.Abdullayev ağrıdan qışqıraraq yerə çökdü. S.Nemətov isə "basın bunu içəri, buna bax, polisi hədələyir, içəridə başa salacaqlar səni". Ürəyi soyumayan S.Nemətov kobud ifadələr yağdırmaqda davam edir, polislərə camaatı ərazidən dağıtmaq göstərişi verirdi. Qarşıqlıqdan polislərin özünü itirdiyini görən rəis müavini qarşısındakı yaşlı bir polis zabitinə əsəbi şəkildə "Üzümə niyə baxırsan, bas içəri!" deyə əmr verdi. Bu zaman Arzuman Məcidli "Məni də tutun, aparın, belə qanunsuzluq olmaz" deyərək Süleyman Nemətovun yanında uca səslə etiraz etməyə başladı. Rəis müavinindən onu da həbs etmək göstərişi gəldi. İki polis əməkdaşı A.Məcidlinin qollarını vəhşicəsinə buraraq, ona yumruq zərbələri vuraraq polis maşınına saldılar. Onun ardınca "Bu kişini niyə həbs edirsiniz, ağsaqqal adamdır, Elnur Məcidlinin atasıdır, məhkəməyə gəlib" deyərək polislərə etiraz edən A.Məcidlinin qohumu gənc Rövşən Nəzirlini də tutub polis maşınına basdılar.

"Heç erməni adamla bunlar kimi davranmaz"

Bundan sonra aləm bir-birinə qarışdı. Döyülənlərin və həbs edilənlərin yaxınları ağlamağa, qışqırmağa başladılar. Həbs edilənlərdən Rövşən Nəzirlinin anasının halı xarab oldu. Adamlar vəziyyəti pisləşən bu xanımın başına yığılmağa, camaatla qəddarcasına davranan polislərin ünvanına etirazlar yağdırmağa başladılar. Müsavatçı xanımlardan biri "Mən özüm qarabağlıyam, inanın ki, bunların bu davranışını görəndən sonra ermənidən heç bir qorxum qalmadı. Qorxmadan erməninin üstünə gedərəm, onlar da bizə bunlar kimi qəddarcasına davranmazlar" deyə şikayətlənməyə başladı.

Süleyman Nemətov qorxdu, ya peşman oldu?

Vəziyyətin qarışdığını görən S.Nemətov halı pisləşən xanımın yanına yaxınlaşdı. Hiss olunurdu ki, rəis müavini etdiyi hərəkətin yanlış və qanunsuz olduğunun fərqinə varıb və hərəkətinin səs-küyə səbəb olacağından ehtiyat edir.

S.Nemətov ağlayan, hələ də özünə gəlməyən anaya yaxınlaşaraq ona bölməyə apırılan oğlunun buraxılacağını, bu barədə bölməyə tapşırıq verdiyini dedi. Onun göstərişi ilə məhkəmənin önündəki adamların hamısını ərazidən uzaqlaşdırdılar. Rəis müavini bircə halı pisləşən qadının və onun ətrafındakı xanımların ərazidə qalmasına icazə verdi. Az sonra təcili tibbi yardımın əməkdaşları hadisə yerinə gəldi. R.Nəzirlinin anasına sakitləşdirici iynə vuruldu və dərman verildi. Bu vaxt S.Nemətov məhkəmə binasının önündə mülki geyimli şəxslərlə gülümsəyərək söhbət aparırdı. Məhkəmə başa çatana qədər S.Nemətov binanın önündə keşik çəkdi. Müsavatçı fəal Səxavət Soltanlı rəis müavininə yaxınlaşaraq ondan camaatı hansı əsasla ərazidən uzaqlaşdırdıqlarını soruşdu. S.Soltanlının "Bu barədə əlinizdə qərar varmı" sualına rəis müavininin mənə heç kim göstəriş verə bilməz, mənə göstərişi daxili işlər naziri verir". "Yaxşı, bəs, nazirin bununla bağlı göstərişi varmı" sualına isə S.Nemətov qarışıq cavab verərək sualdan yayındı.

Bu arada hakim Şahin Abdullayevin sədrliyi ilə keçən məhkəmə prosesi çox qısa çəkdi. Cəmi yeddi nəfərin zala buraxıldığı prosesdə vəkillərin ötən iclasda qaldırdıqları vəsatətlərin heç biri təmin olunmadı. Bu vəsatətlərdə cinayət işinə bəraətverici əsaslarla xitam verilməsi, gənclər barədə həbs-qətimkan tədbirinin dəyişdirilməsi, vətəndaşların sərbəst toplaşmaq azadlığını pozduğuna görə daxili işlər naziri Ramil Usubov, Bakı Şəhər Baş Polis İdarəsinin rəisi Rafiq Abbasov, Bakı Şəhər İcra Hakimiyyətinin başçısı Hacıbala Abutalıbov və aksiyalarda etirazçıları saxlayan bütün polis işçilərinin məsuliyyətə cəlb olunmaları barədə məhkəmənin qərar qəbul etməsi kimi məsələlər öz əksini tapmışdı.

Bundan sonra hakim məhkəmə baxışının avqustun 9-na təyin edilməsi barədə qərarını elan etdi. Təqsirləndirilən gənclərə məhkəmə binasının önündə baş verən məlum qalamaqal, döyülmə və həbslər barədə məlumat verildi. Həm buna, həm də zala cəmi yeddi nəfərin buraxılmasına etiraz edən gənclər də prosesin davam etdirilməsində maraqlı olmadıqlarını bildirdilər.

"Nə olsun rəis müavinisən, vətəndaşa yumruq, təpik vurmağa nə haqqın var?"

Günorta saatlarında məlum oldu ki, Nəsimi Rayon 20-ci polis bölməsinə aparılan A.Məcidli, R.Nəzirli və R.Abdullayev sərbəst buraxılıblar. A.Məcidlinin sözlərinə görə, polis bölməsində onlara qarşı zor tətbiq edilməyib: "Bizə dedilər ki, polisə müqavimət göstərmisiniz. Cərimələmək istəyirdilər. Dedim, necə olur, məhkəməyə gəlmişik, bizi döyürsüz, həbs edirsiniz, hələ bir cərimələyirsiniz də.

Süleyman Nemətov Ramil Abdullayevin qarnına yumruq vuranda mən müdaxilə etdim ki, niyə vurursunuz. Dedim, nə olsun rəis müavinisən. Sənin vətəndaşa yumruq, təpik vurmağa nə haqqın var? Bundan sonra məni də apardılar. Mülki geyimli bir şəxs arxadan mənə yumruqla zərbə vurdu. Amma bölmədə zor tətbiq etmədilər. Osman Kazımovun müdaxiləsindən sonra cərimə yazmadan, ümumiyyətlə protokol tərtib etmədən hamımızı buraxdılar. Biz DİN-in 102 xidmətinə Süleyman Nemətovun hərəkətlərindən dərhal şikayət etdik. O əməlli-başlı qoçuluq edirdi. Bu adamı əvvəl-axır kimsə cəzalandırmalıdır. Bir nəticəsi olmasa, onun hərəkətlərindən müvafiq orqanlara şikayət verəcəyik".

Qeyd edək ki, Əhəd Məmmədli və Ülvi Quliyev Cinayət Məcəlləsinin 233-cü (ictimai qaydanın pozulmasına səbəb olan hərəkətləri təşkil etmə və ya bu cür hərəkətlərdə fəal iştirak) və 315.1-ci (hakimiyyət nümayəndəsinə qarşı müqavimət göstərmə və ya zor tətbiq etmə) maddəsilə ittiham olunur. Elnur Məcidli və Rüfət Hacıbəyliyə isə yalnız 233-cü maddə ilə ittiham elan olunub.

http://azadliq.info/index.php?option=com_content&view=article&id=7577:gnclrin-mhkmsind-polis-zorakl&catid=293:syas&Itemid=457

2 aprel aksiyasında zərərçəkən: «Şüşələri zalda oturanlar sındırmayıblar»

2011-07-29T11:27:00.000-07:00

29.07.2011

Ülkər Akifqızı

«Avtobusun şüşələrini zalda oturan müttəhimlər sındırmayıb». Bunu 2 aprel aksiyası zamanı həbs olunmuş müxalifət fəallarından altısının məhkəməsində zərərçəkən qismində sərbəst ifadə verən sürücü Sarvan Məhərrəmov deyib.

İyulun 29-da Səbail rayon Məhkəməsində Sahib Kərimov, Arif Alışlı, Elnur İsrafilov, Babək Həsənov, Zülfüqar Eyvazov və Elşən Həsənovun işi üzrə məhkəmə iclası davam edib. Onlar Cinayət Məcəlləsinin 233-cü (ictimai qaydanın pozulmasına səbəb olan hərəkətləri təşkil etmə və ya bu cür hərəkətlərdə fəal iştirak etmə) və 186.1-ci (özgənin əmlakını qəsdən məhv etmə və ya zədələmə) maddəsi ilə də təqsirləndirilirlər. İttiham aktına görə bu 6 nəfər asayişi pozub, polisin tələbinə məhəl qoymayıb, 25 mülki şəxsə və polisə xəsarət yetirib. Eyni zamanda, hərəkətdə olan avtobusu dayandırıb üç nəfəri qaçırdıblar, həmin avtobusa 1325 manat ziyan vurublar.

İdarə etdiyi avtobusa 1325 manat ziyan dəydiyi deyən Sarvan Məhərrəmov şüşə sındıranların üzünü görmədiyini bildirib. Bunu da ətrafda adamların çox olması ilə izah edib. Sarvan Məhərrəmov vəkillərin bəzi suallarını ümumiyyətlə cavablandıra bilməyib. Vəkillər iddia ərizəsinin sürücü tərəfindən yazıldığına şübhə ilə yanaşıblar və bunu aydınlaşdıran suallar veriblər:

Vəkil: Aksiya nədir?

SARVAN MƏHƏRRƏMOV POLİSİ DƏ GÜNAHLANDIRIB

Sarvan Məhərrəmov bu suala cavab verə bilməyib, hakim isə buna haqq qazandırıb, bildirib ki, sürücü ərizə yazarkən hüquqi yardımdan yararlana bilərdi, ona görə də bəzi ifadələrdən xəbərsiz ola bilər.

Daha sonra vəkillər iddia ediblər ki, Sarvan Məhərrəmovun istintaqda verdiyi ifadə ilə məhkəmədə verdiyi ifadə arasında xeyli ziddiyyət var. Vəkillərin tələbi ilə Sarvan Məhərrəmovun istintaqa verdiyi ifadəsi oxunub. Həmin ifadəsində sürücü şüşə sındıranların əlamətlərini təsvir edib. Bundan sonra da Sarvan Məhərrəmov avtobusa kimin ziyan vurması haqda məhkəmə zalında açıqlama verə bilməyib. Əvəzində isə baş verənlərə görə polisi də günahlandırıb:

«Avtobusa yüzlərlə yumruq, təpik dəyib. Mən heç kimi görə bilmədim. Məni ora polis aparmışdı. İstəyirəm ki, kim günahkardırsa, maşınımı təmir etdirsin».

««PODPRES»İN PULU SƏNƏ QURBANDIR»

Daha sonra təqsirləndirilən Sahib Kərimov Sarvan Məhərrəmova suallarını ünvanlayıb:

Sahib Kərimov: Təsdiqləyirsiz ki, avtobusun «podpresi» (ön şüşəsi) sındırılan zaman biz orada olmamışıq. Bəs nəyə görə həmin şüşənin pulunu da bizdən istəyirsiz?

Sarvan Məhərrəmov: «Podpres»in pulu sənə qurban olsun. Mən tələb etmirəm ki, burdakılar həbs olunsun. Sadəcə istəyirəm ki, maşınım təmir olunsun.

TIXACI 6 NƏFƏR YARADIB?!

Daha sonra məhkəmədə digər zərərçəkən Şahnisə Məmmədovanın nümayəndəsi Eldar Bahadurov dindirilib. O iddia edib ki, aksiya zamanı yaranan tıxac səbəbindən Şahnisə Məmmədovanın sahibəsi olduğu 234 və 242 saylı marşrutların hərəkətində maneə yaranıb, nəticədə onlara 850 manat ziyan dəyib. Eldar Bahadurov bu zərərin ödənməsini tələb edib.

Vəkillər isə ümumiyyətlə bu iddia ərizəsinə etiraz ediblər, bildiriblər ki, qarşı tərəf dəyən ziyana görə cavabdeh tərəfi müəyyənləşdirə bilməyib, iddia ərizəsi əsaslandırılmayıb. Onu da qeyd ediblər ki, bu zərərçəkənin aksiya zamanı həbs olunan digər məhbusların da məhkəməsində eyni məbləğdə eyni iddianı qaldırması bir daha iddianın absurdluğunu göstərir.

Məhkəmənin qarşısıEldar Bahadurov vəkillərin bir neçə sualını cavablandıra bilmədiyi üçün vəkillər vəsatət qaldırıblar ki, prosesə zərərçəkənin özü - Şahnisə Məmmədova çağırılsın. Hakim bu vəsatəti açıq saxlayıb, deyib ki, sürücülərin dindirilməsindən sonra da eyni ehtiyac yaranarsa, zərərçəkən məhkəməyə dəvət oluna bilər.

Zərərçəkdiyini iddia edən «Transqeyt» MMC-nin nümayəndəsi Elvin Məmmədov da məhkəmə iclasında deyib ki, aksiya zamanı tıxac yarandığından onlara 1650 manat ziyan dəyib.

Elvin Məmmədov: Biz deyə bilmərik ki, konkret bu insanlar günahkardır. Tələbimiz mülki iddiamızın təmin olunmasıdır.

Vəkil: Siz cavabdehi müəyyənləşdirə bilmədiyiniz halda iddia qaldırmısız. 6 nəfərin tıxac yaratması absurddur.

«BURADA OTURANLAR ŞÜŞƏ SINDIRMAYIBLAR»

3 nömrəli avtonəqliyyat müəssisəsinin nümayəndəsi Ayaz Qasımov isə ifadəsində tıxac yarandığından onlara 2255 manat zərər dəydiyini bildirib. Vəkillər bu mülki iddianın da tərtibinə etiraz ediblər və nümayəndə bütün sualları cavablandıra bilmədiyinə görə hüquqi şəxsin özünün məhkəmədə iştirakının vacibliyini qeyd ediblər.

Zərərçəkən qismində dindirilən «EnTrans Çinar» MMC-nin nümayəndəsi Elxan Qurbanov isə deyib ki, onlara həm tıxaca görə zərər dəyib, həm də şirkətə məxsus 288 saylı marşrutun bir şüşəsi sındırılıb. Ümumilikdə şirkətə 510 manat ziyan dəyib. Amma Elxan Qurbanov onu da deyib ki, şüşəni sındıran zalda oturan məhbuslar deyil:

«Mən sürücü ilə birlikdə video görüntülərə də baxmışam. Burda oturan adamlar orada olmayıblar».

2 aprel aksiyası

Vəkil: Bir halda ki, bunlar orada olmayıblar nəyə görə ittihamınızı bu şəxslərə qarşı yönəltmisiz?

Elxan Qurbanov: Bu sualınıza cavab verə bilmərəm.

AYDIN OLMAYAN HƏDƏF

Vəkil Natiq Mustafayev deyir ki, zərərçəkənlərin tələbi aydın deyil, onlar sadəcə siyasi sifariş yerinə yetirirlər:

«Əslində iddia tələbində tələbin yönəldiyi hədəf aydın olmalıdır. Mücərrəd anlamda demək ki, mitinq iştirakçıları tıxac yaradıb və bu 6 nəfərə qarşı iddia qaldırmaq tamamilə qanunsuzdur. Proses boyu da tam aydın oldu ki, zərərçəkmiş şəxslər öz iradə ifadəsini sərbəst ortaya qoymurlar, mənə elə gəlir ki, onlar hansısa sifarişi yerinə yetirirlər».

Növbəti proses avqustun 2-nə təyin olunub.

2 aprel aksiyasına görə saxlananlardan dörd nəfərin - Elnur Məcidli, Əhəd Məmmədli, Rüfət Hacıbəyli və Ülvi Quliyevin məhkəməsi avqustun 9-da davam edəcək. İyulun 29-da Nəsimi rayon məhkəməsində bu haqda qərar verilib.

2 aprel aksiyasına görə təqsirləndirilən sonuncu 4 nəfərin istintaqı isə yekunlaşıb. Arif Hacılı, Tural Abbaslı, Məhəmməd Məcidli və Fuad Qəhrəmanlı ilə bağlı cinayət işinin materialları baxılması üçün Səbail rayon Məhkəməsinə göndərilib.

Həmin aksiyaya görə ümumilikdə 14 nəfər cinayət məsuliyyətinə cəlb edilib.

http://www.azadliq.org/content/article/24280993.html

Beynəlxalq Liberal Gənclər Federsiyası Azərbaycan hökumətindən Tural Abbaslı, Əhəd Məmmədli və Rüfət Hacıbəylini azadlığa buraxmağıı tələb edir

2011-07-28T03:52:00.000-07:00

Proposed by: IFLRY Bureau

Beynəlxalq Liberal Gənclər Federsiyası Azərbaycan hökumətindən Tural Abbaslı, Əhəd Məmmədli və Rüfət Hacıbəylini azadlığa buraxmağıı tələb edir

Resolution on the political situation in Azerbaijan

Considering that parliamentary elections were held in Azerbaijan on 7 November 2010, of which international observers have said that the conduct of these elections was not sufficient to constitute meaningful progress in the democratic development of the country,

Considering that since these elections, various clampdowns have occurred on the freedom of assembly and expression, such as during peaceful protests in March and April, of which civil society organizations, media and political organizations have been the primary victims,

Considering that on 2 April 2011, Tural Abbasli, the President of IFLRY Member organization Musavat Youth Organization was arrested, amongst many other activists, such as the deputy presidents Ehed Memmedlly and Rufat Hajibeyly,

Considering that these members of Musuvat Youth Organization are still in prison and are being indicted by the justice system,

Considering that other forms of harrassment are taking place, such as the expulsion of activitists from universities and workplaces,

Therefore, the International Federation of Liberal Youth,

Strongly deplores the practice of intimidating, arresting, prosecuting and convicting independent journalists, blogges and political activists on various criminal charges,

Expresses its solidarity with all democratic forces in Azerbaijan,

Calls for the immediate release of the members of the Musuvat Youth Organization, and urges the government of Azerbaijan to ensure the freedom of expression and assembly,

Urges all international institutions to put more pressure on the government of Azerbaijan to actively defend and promote human rights

Rəsulzadənin büstünü evində saxlayan “xuliqan”

2011-07-24T04:08:00.001-07:00

«Azadlıq» 2 aprel məhbusu Rüfət Hacıbəylinin evindən yazır

«İlham Əliyev xalqın prezidenti olmalıdır, bir qrup adamın yox; gənclərin həbsi Prezident Administrasiyasının göstərişidir»

İbrahim Hacıbəyli: «Oğlum «Azadlıq», «İstefa» deyib, mən də deyirəm. Gəlib məni də həbs etsinlər»

Ailəsi onun yolunu gözləyir. Günahsız yerə həbs olunduğuna görə yox, səhhətinə görə... Hərbi xidmətə getmək üçün komissarlığa üz tutub. Onu qarşılayanların dili-dodağı quruyub. Indiki zamanda hamı olmasa da, əksəriyyət hansısa adla əsgərlikdən yayınmaq istəyir, o isə könüllü gəlib. Araşdırma aparılır, ürəyində qüsur olduğu üzə çıxır. Və o, hərbi xidmətə gedə bilmir...

“Rəsulzadənin qurduğu dövlət yaxşı dövlət idi, ancaq ruslar imkan vermədi”

O, Ictimai Palatanın aprelin 17-də keçirdiyi mitinqə görə 5 sutka inzibati qaydada azadlıqdan məhrum edilib. Lakin aprelin 23-də 2 aprel mitinqinə görə barəsində Cinayət Məcəlləsinin 233-cü maddəsi - ictimai qaydanın pozulmasına səbəb olan hərəkətlər təşkil etmə və ya fəal iştirak etməsiylə ittiham elan olunub və 2 aylıq həbs-qətimkan tədbiri seçilib...

Ailəlikcə müsavatçıdırlar. Babası da 1911-ci ildə Müsavatın qurucularından olub. O, nəvələrinə deyirmiş ki, “Rəsulzadənin qurduğu dövlət yaxşı dövlət idi, ancaq ruslar imkan vermədi”. Bu sözləri eşidəndə nədənini soruşmamışdılar. Indi çox peşmandılar. Çünki baba nəsə demək istəyirmiş, nəvələri uşaq olduğundan bu niyyətindən vaz keçirmiş.

Kaş soruşaydılar...

Indi özü kimi atası da babasının yolunu gedir. Müsavat ideologiyasını yayırlar. Ağcabədidə hər kəs onlara xüsusi rəğbət bəsləyir. Kimlikləri hamıya bəllidir. “Xocalı”, “31 mart” soyqırımlarında insanlar onlarla birgə Şəhidlər xiyabanına gedirlər... Bir sözlə, rayonda adlı-sanlı nəslin nümayəndələrindəndirlər.

Əslən Ağcabədi rayonundan olan qəhrəmanımız 1985-ci il dekabrın 26-da Bərdə rayonunda anadan olub. Qərb Universitetinin hüquq fakültəsini bitirib. 2003-cü ildən Müsavat Partiyasının sıralarına qoşulub. Hazırda partiyanın Gənclər Təşkilatının sədr müavini, Müsavat Məclisinin üzvüdür.

Atası Ibrahim Hacıbəyli uzun müddət hüquq-mühafizə orqanlarında çalışıb. Bu səbəbdən də onlar ailəlikcə bir müddət Yevlaxda yaşayıb, sonradan yenə Ağcabədiyə köçüblər.

Dövlətə vurulan 600 manatlıq ziyan

Əqidə yoldaşları onun təmkini, mülayim davranışı ilə daim nümunə olduğunu deyirlər. Qardaşı Cavid də təsdiqləyir ki, o, emosional deyil və ətrafı onun sakit təbiətli adam olduğuna əmindir: “Konstitusiyanın 49-cu maddəsinə görə, dinc mitinqlərdə, dinc etiraz aksiyalarında iştirak etməyə hər bir vətəndaşın hüququ var. Cinayət Məcəlləsinin 233-cü maddəsi ilə həbs edilməsi konstitusiyanın 49-cu maddəsinə ziddir. 2 aprel mitinqində qardaşım guya polis maşınına hücum edib. Ancaq bu, ağ yalandır. O, həmişə gənclərə də deyirdi ki, heç vaxt qarşıdurmaya getməyin”.

Atası Ibrahim bəy Azərbaycanın ərazi bütövlüyü uğrunda döyüşlərin fəal iştirakçısı olub. Övladlarını vətənpərvər ruhda böyüdən ata onların sağlam əqidəsi ilə fəxr etdiyini bildirdi: “Mən 1997-ci ilə qədər inzibati orqanlarda işləmişəm, eyni zamanda Qarabağ müharibəsinin iştirakçısı olmuşam. Ailəmi ac-susuz, səksəkə içərisində qoyub soyuq səngərlərdə yatanda bu gün hazıra nazir olanlar harada idi? Uşaqlarımın 5-6 yaşı olanda onları dəfələrlə döyüş bölgəsinə aparıb demişəm ki, baxın, düşmənlərimiz bu təpənin arxasındadır. Yəni, körpəlikdən onları vətənpərvər ruhda böyütmüşəm. Özüm polis işçisi olmuşam. Necə ola bilər ki, oğlum polisə zor tətbiq etsin? Bildiyimə görə, bir hüquq işçisi Allahsız iş tuta bilməyəcəyini söyləyib və bu işə yaxın getməyib. Hakimiyyət ürəyində sağlamlığı ilə əlaqədar 4 qüsuru olan çəlimsiz uşaqdan bu qədər qorxursa, bəs erməni ilə necə müharibəyə gedəcək? Deyirlər ki, oğlum dövlətə 600 manat ziyan vurub. O, mitinqə balta-yaba ilə çıxıb, maşınlara zərər yetirirdi. Niyə istintaqa bu zərərin video görüntüləri verilmir?”.

“Onlar Azərbaycanın gələcəyidir”

“Ilham Əliyev xalqın prezidenti olmalıdır, bir qrup adamın yox. Əgər dövlət başçısı hamıya başçılıq edirsə, niyə belə ayrı-seçkiliyə yol verir? Polis həmkarlarım deyir ki, bu gənclərin həbsi Prezident Administrasiyasının göstərişidir. Oğlum ”Azadlıq”, “Istefa” deyib. Bunu mən də deyirəm. Gəlib məni də həbs etsinlər” - deyir Ibrahim bəy.

O, 2 aprel mitinqinə görə həbs olunanların əvəzinə məhbəs həyatı yaşamağa da hazır olduğunu dilə gətirdi: “2 aprel və digər qondarma ittihamlarla həbs olunan gəncləri azad etsinlər. Onlara veriləcək işləri mənim üstümə yükləsinlər. Bu insanların yerinə məhbəs həyatı yaşamağa hazıram. Çünki onlar Azərbaycanın gələcəyidir. Bizə belə insanlar lazımdır”.

9 aydır oğlunun üzünü görməyən anası Alagöz xanım (Rüfət işdən macal tapıb rayona gedə bilmirdi. Sonuncu dəfə ata yurdunda ötən ilin noyabrında olub - R.D) oğlunun səhhətindən çox narahatdır: “O, uşaqlıqdan haqsızlığa qarşı mübarizə aparıb. Novruz bayramı ərəfəsində ona 5 sutka həbs cəzası verildi. Bayramda yolunu gözlədim, gəlmədi. Ən sevdiyi yeməyi - aş bişirəcəkdim, ancaq bişirə bilmədim. Indi oturub səbirsizliklə oğlumun yolunu gözləyirəm”.

Onun evində Məhəmməd Əmin Rəsulzadənin büstü var. 1992-ci ildə rayonda dahi şəxsiyyətin büstünü qoyurlar. 8 il sonra isə büst “yox”a çıxır. Aidiyyəti qurumlardan büstün taleyini soruşanda “oğurlayıblar” cavabını alırlar. Bir neçə il keçəndən sonra, yəni, 2009-cu ildə Ibrahim bəy əqidə yoldaşı Rəşid Nəcəfliylə (hazırda Müsavat partiyasının Ağcabədi rayon təşkilatının sədridir - R.D) büstün yerini müəyyənləşdirir. Məlum olur ki, hökumət Rəsulzadəyə qiyməti, büstünü yerə basdırmaqla verir. Bir neçə gün ərzində onlar həmin məkana gedir və çətinliklə də olsa büstü torpaqdan çıxara bilirlər. Bir il bu məsələni gizli saxlayırlar. Yalnız 2010-cu ildən sonra bunu ictimailəşdirirlər.

2 aprel məhbusu: «Bizim məhkəməmiz «avtobus şousu»dur»

2011-07-22T10:36:00.000-07:00

Sahib Kərimov
- İstintaq materiallarında mənim nə isə sındırdığıma və ya digər hər hansı cinayət etdiyimə dair bircə kəlmə, bir şahid ifadəsi də yoxdur. Belə olan halda mən nəyə görə həbsdəyəm?

İctimai Palatanın 2 aprel aksiyası zamanı həbs olunmuş AXCP sədrinin müşaviri Sahib Kərimov bu sualla məhkəməyə, hakimə üz tutdu.

İyulun 22-də Səbail rayon Məhkəməsində 2 aprel aksiyası zamanı həbs olunmuş 6 nəfərin işi üzrə növbəti məhkəmə prosesi keçirilib. Bunlar AXCP üzvləri - Sahib Kərimov, Babək Həsənov, Zülfüqar Eyvazov, Arif Alışlı, Müsavat üzvü Elşən Həsənov və bitərəf Elnur İsrafilovdur.

Onlar Cinayət Məcəlləsinin 233-cü (ictimai qaydanın pozulmasına səbəb olan hərəkətləri təşkil etmə və ya bu cür hərəkətlərdə fəal iştirak etmə) və 186.1-ci (özgənin əmlakını qəsdən məhv etmə və ya zədələmə) maddəsi ilə təqsirləndirilirlər.

İttiham aktında deyilir ki, bu 6 nəfər asayişi pozub, polisin tələbinə məhəl qoymayıb, 25 mülki şəxsə və polisə xəsarət yetirib. Eyni zamanda, hərəkətdə olan avtobusu dayandırıb üç nəfəri qaçırdıblar, həmin avtobusa 1325 manat ziyan vurublar.

«AVTOBUS ŞOUSU»

Zərərçəkənlərin nümayəndələrinin də iştirak etdikləri prosesdə AXCP sədrinin müşaviri Sahib Kərimov və AXCP Nizami rayon Şöbəsinin sədri Zülfüqar Eyvazov sərbəst ifadə veriblər, dövlət ittihamçısı ilə vəkillərin suallarını cavablandırıblar.

AXCP sədrinin müşaviri Sahib Kərimov ifadəsində bildirib ki, ittiham saxtadır, qərəzlidir və ortalıqda heç bir cinayət faktı yoxdur. O, məhkəmə işini «avtobus şousu» adlandırıb:

- Mən sadəcə, avtobusun qapısını yumruqla döyüb sürücüyə demişəm ki, «aç qapını!». Hər gün 200 min adam avtobusun qapısını döyüb, «qapını aç!» deyir. İstintaq materiallarında da var ki, sürücü mənim şüşəni sındırmadığımı deyir. Mən sürücüyə «açın qapını!» dediyimə görə həbsdəyəm, yoxsa «demokratiyaya qapını açın!» dediyimə görə?

Zülfüqar EyvazovSahib Kərimov məhkəməni də azad hesab etmədiyini, siyasi sifarişlə işlədiyini bildirib.

Zərərçəkənlərdən biri Sahib Kərimova sual verib:

- Siz sürücünün başını qatmısız, bu müddətdə bir başqası arxadan gəlib avtobusa zərər vurub. Belə olan halda Siz özünüzü avtobusa zərər dəyilməsində günahkar hesab etmirsiz?

Zərərçəkənin bu sualı zalda gülüş doğurub.

Sahib Kərimov:

- Sürücünün fikri məndə qalmasaydı belə, o, öz yerində otura-otura avtobusa arxadan dəyən təpiyin qarşısını necə ala bilərdi ki?

«VƏZİFƏMDƏN İSTEFA VERMƏDİYİMƏ GÖRƏ HƏBS OLUNMUŞAM»

Məhkəmə prosesində AXCP-nin Nizami rayon şöbəsinin sədri Zülfüqar Eyvazov da sərbəst ifadə verib. O deyib ki, etiraz aksiyasına şüurlu şəkildə, korrupsiyaya, inhisarçılığa, antidemokratiyaya «yox» demək üçün gedib. Zülfüqar Eyvazov bildirib ki, avtobusa zərər vurmaqda ittiham olunsa da, videoyazılar açıq-aydın bu ittihamın düzgün olmadığını göstərir:

- Mən sadəcə, əlimi uzadıb avtobusun pəncərəsini bağlamışam.

Dövlət ittihamçısı:

- Pəncərəni nəyə görə bağlamaq istəmisiz?

Zülfüqar Eyvazov:

- Avtobusun içərisində partiyamızdan olan qadınlar var idi. Avtobusun kənarında isə xeyli sayda tanımadığım adamları görüb şübhələndim ki, içəridəki qadınlara zərər vura bilərlər. Amma indi pəncərəni bağlamağıma çox peşmanam, çünki sonradan bilmişəm ki, avtobusun içərisinə qaz vurublarmış.

Fəxrəddin MehtiyevZülfüqar Eyvazov onu da deyib ki, əvvəlcə onu şahid qismində ifadə vermək üçün polis bölməsinə dəvət ediblər. Daha sonra bölmədə ona təklif ediblər ki, partiyanın Nizami rayon şöbəsinin sədri vəzifəsindən istefa versin. Buna razılaşmadığına görə onu həbs ediblər.

VƏKİLLƏR HƏLƏ Kİ MƏHKƏMƏ İCLASININ GEDİŞİNDƏN RAZIDIRLAR

Zülfüqar Eyvazovun vəkili Natiq Mustafayev isə məhkəmədən ədalətli qərar gözləməsə də, hələ ki, prosesin hüquqi norma və qaydalara uyğun keçirildiyini deyir. O ki qaldı müdafiə etdiyi şəxsə:

- Zülfüqar Eyvazovun əməlində, ifadəsində heç bir cinayət tərkibi yoxdur. 186.1-ci maddədən söhbət gedə bilməz, çünki elə bir hərəkət qeydə alınmayıb.

AXCP üzvü Babək Həsənovun vəkili Fəxrəddin Mehtiyev də deyir ki, məhbuslara qarşı ittihamın saxta olduğu gün kimi aydındır:

- Məhkəmə dinləmələri də göstərdi ki, ittiham nə qədər saxta və əsassızdır. Bu gedişlə ittiham hökmü çıxarmaq mümkün deyil.

Həbs olunanların yaxınları və ailə üzvləri isə həm də məhkəmə iclaslarının uzanmasından narazıdırlar.

Növbəti məhkəmə iyulun 27-nə təyin olunub.

2 aprel məhbuslarının məhkəməsində

2011-07-19T09:04:00.001-07:00

İyulun 19-da Səbail rayon məhkəməsində İctimai Palatanın 2 aprel aksiyası zamanı həbs olunmuş altı nəfərin işi ilə bağlı məhkəmə istintaqı başladı.

Həmin altı nəfər AXCP sədrinin müşaviri Sahib Kərimov, AXCP üzvləri Babək Həsənov, Zülfüqar Eyvazov, Arif Alışlı, Müsavat üzvü Elşən Həsənov və bitərəf Elnur İsrafilovdur.

Onlar Cinayət Məcəlləsinin 233-cü (ictimai qaydanın pozulmasına səbəb olan hərəkətləri təşkil etmə və ya bu cür hərəkətlərdə fəal iştirak etmə) və 186.1-ci (özgənin əmlakını qəsdən məhv etmə və ya zədələmə) maddəsi ilə də təqsirləndirilir.

25 MÜLKİ ŞƏXS VƏ POLİS XƏSARƏT ALIB

Məhkəmədə ittiham elan olundu. İttihamda altı nəfərin asayişi pozduğu, polisin tələbinə məhəl qoymadığı, 25 nəfər mülki şəxsə və polisə xəsarət yetirdikləri deyilir. Eyni zamanda, hərəkətdə olan avtobusu dayandırıb üç nəfəri qaçırdıqları, həmin avtobusa 1325 manat ziyan vurduqları da bildirilir.

Bəri başdan deyək ki, zərərçəkənlərin hamısı məhkəməyə gəlməmişdi. Gələnlərsə müttəhimlərə sual verməkdən imtina etdilər.

Vəkil Fəxrəddin Mehdiyevin vəsatətindən sonra müttəhimlər dəmir qəfəsdən çıxarıldılar.

Onlar ittihamla tanış olduqlarını, amma özlərini təqsirli saymadıqlarını söylədilər.

İyulun 19-da həmçinin Elnur İsrəfilovla Arif Alışlı sərbəst ifadə verdilər. Eyni zamanda, dövlət ittihamçısı ilə vəkillərin suallarını cavablandırdılar.

ZİDDİYYƏTLİ İFADƏLƏR

Elnur İsrafilovun aprelin 24-25-də verdiyi ziddiyyətli ifadələr elan olundu. Vəkillərin diliylə desək, birinci ifadədə Elnur İsrafilovun özünü müdafiə etdiyi, ikincidəsə özünü ittiham etdiyi görünürdü. O bunun səbəbini belə izah etdi: ifadəni imzalasa da onu oxumayıb, çünki, latın qrafikası ilə yazıb-oxumaqda çətinlik çəkir. İfadəni də müstəntiq özü yazıb.

Bir əlavə: Elnur İsrafilov orta məktəbi bitirməyib, üçüncü qrup gözdən əlildir.

2 Aprel aksiyası

Müttəhimin sözlərinə görə, «müstəntiq ifadəni dəyişsən səni buraxacağıq» deyib.

İkinci ifadədə Elnur İsrafilov mitinqə dayısının – AXCP üzvü Məmməd İbrahimin tapşırığı ilə getdiyini deyir: «Səhv etmişəm. Gərək dayıma qulaq asmayaydım. Günahımı etiraf edirəm, peşmanam».

Amma məhkəmədə bu ifadədən imtina etdi. O istintaqın mitinqin təşkilatçısı kimi təqdim etdiyi Arıf Hacılını, Fuad Qəhrəmanlını, Məmməd Məcidlini, Tural Abbaslını tanımadığını söylədi. Arif Hacılını sadəcə, həbsdən sonra gördüyünü bildirdi.

BAKIYA İŞ AXTARMAĞA GƏLƏN AKSİYAÇI

Hakim:

- Siz dediniz ki, bulvara gəzməyə getmişdiz, necə oldu ki, sonra «Torqovı»ya getdiz?

- Bulvarda Kukla Teatrının yanındakı keçiddən keçib, «Torqovı»ya gəldik.

- Hansı andan sonra mitinqçilərə qoşuldunuz?

- On dəqiqə sonra. Onlar «Azadlıq», «İstefa», «İşsizliyə son» qışqırırdılar. Mən də axırıncı şüarı dedim.

- Əvvəldən bilirdizmi ki, Bakı Şəhər İcra Hakimiyyəti aksiyaya icazə verməyib?

- Xeyr! Mən heç bilmirəm mitinq nədir.

Elnur İsrafilov mitinqdə təsadüfən, cəmi 5-10 dəqiqə iştirak etdiyini dedi. O Bakıya iş axtarmağa gəldiyini və mitinqdə də «İşsizliyə son» şüarını səsləndirdiyini əlavə etdi.

O ki qaldı avtobusa xəsarət yetirməklə bağlı ittihama:

«Gördüm ki, avtobusda bir qadının gözü yaşarıb. Qıraqdakılardan kömək istəyirdi. Onda avtobusa təpik atdım».

«MƏLİKMƏMMƏD NAĞILINDA CİNAYƏT İŞİ VAR, BİZİM İŞDƏ YOXDUR»

Arif Alışlı isə mitinqə şüurlu şəkildə, korrupsiyaya, inhisarçılığa yox demək üçün getdiyini bildirdi. O avtobusa təpik atdığını gizlətmədi. Bunu da içəridəki qadını – AXCP sədrinin müavini Gözəl Bayramlını xilas edə bilmədiyi üçün etdiyini dedi:

«Mən orda avtobusun şüşəsinin sındığını görmədim. Mən orda bir polisə xəsarət yetirildiyini, ya döyüldüyünü də görmədim. Mən 25 polisə xəsarət yetirməkdə ittiham olunuram, mən Şvartsnegerəm ki? (Arnold Schwarzenegger- aktyor, ABŞ Kaliforniya ştatının qubernatoru - müəl.) Mitinqdə bir saat ərzində «Azadlıq», «İstefa» şüarlarını dedim. Məlikməmməd nağılında cinayət işi var, bizim işdə yoxdur».

Vəkil Mənsum Bayramov Bakı şəhər İcra Hakimiyyətinin nümayəndəsini məhkəməyə dəvət etməklə bağlı vəsatət qaldırdı. Onun dediyinə görə, məhz icra qurumu sərbəst toplaşmaq azadlığını pozduğuna görə, belə vəziyyət yaranıb. Bundan başqa əlavə şahidlərin dəvət edilməsini istədi. Onun sözlərinə görə, şahidlərin 17-i polisdir ki, bu da həqiqətin ortaya çıxmasına imkan verməyəcək. Hakim bu məsələyə vaxtı çatanda baxılacağını dedi.

Məhkəmə iyulun 22-də davam edəcək.

“BU, MƏHKƏMƏ YOX, DRAM TEATRDIR”

2011-07-16T07:58:00.001-07:00

Vidadi İsgəndərov məhkəməni və Baş Prokurorluğu biabır etdi; hakim 5 vəsatətin heç birini təmin etmədi

Dünən Göyçay Rayon Məhkəməsində hakim Elxan Süleymanovun sədrliyi ilə həbsdə olan hüquq müdafiəçisi Vidadi İsgəndərovun məhkəməsinə hazırlıq iclası keçirildi. V.İsgəndərova dəstək olan yüzlərlə göyçaylı məhkəmənin önünə toplaşmışdı. Onların arasında əllərində V. İsgəndərovun şəkilləri əks olunmuş plakatlar qaldıran uşaqlar da var idi. Əraziyə xeyli sayda polis qüvvələri də cəlb olunmuşdu.

Məhbus Penitensiar Xidmətin maşını ilə məhkəməyə gətirilərkən jurnalistlər çəkiliş aparmağa cəhd etdilər. Ancaq polis buna müdaxilə etdi, “Ölkə” və “Reportyor” qəzetlərinin bölgə müxbiri Ceyhun Əsgərovun fotoaparatın əlindən aldılar. Onu da deyək ki, məhkəməyə ABŞ-ın ölkəmizdəki səfirliyinin nümayəndəsi də gəlmişdi.
Nəhayət, saat 12:00-da proses başlandı. Məhkəməyə çağırılan 18 “zərərçəkmiş”dən yalnız 3-ü iştirak edirdi. Onlar isə hakimin və müttəhimin vəkili Xalid Bağırovun suallarını cavablandıra bilmədilər. Məhkəmə zalında olan insanlar isə yalançı şahidləri lənətləyirdi.

Çıxış edən V.İsgəndərov baş prokuroru ona qarşı qanunsuz cinayət işi açmaqda suçladı: “Şahid Araz Ələkbərov ruhi xəstədir, bu adamlar öyrədilib. Bu məhkəmə deyil, dram teatrdır. Bilirəm ki, hakim də sifariş yerinə yetirir. Məni korrupsiyaya qarşı mübarizə apardığım üçün həbs ediblər. Bu siyasi sifarişdir. Heç nədən qorxum yoxdur. "Yeni Müsavat" qəzetində “Viva və Vidadi” yazısından sonra hamı məni Viva Göyçaylı çağırır. Məni heç nə qorxuda bilməz, doğma yurdumun problemlərini həll etmək üçün mübarizə aparmışam".
Daha sonra hüquq müdafiəçisi həbsinin ilk 15 günündə ona cəza verildiyi söylədi: “Mənə narkotik vurublar. Möhtərəm hakim, tələb edirəm indicə ekspertiza gəlib burda yoxlasın hələ də narkotik maddə damarımda qalıb. Şəkərli diabet xəstəliyim var. 3 gün mənə dərman verilməyib”.
Bundan sonra “zərərçəkmişlərlə” tanışlıq başlandı. Bu zaman Aslan Yolçuyev adlı “zərərçəkmiş” İsgəndərovu tanımadığını dedi. O, “bəs niyə üzümə durursan” sualı qarşısında susdu və məhkəməni yarımçıq tərk etdi.

Vəkil X.Bağırov 6 vəsatətlə çıxış etdi. O bildirdi ki, “zərərçəkmiş” Araz Ələkbərovun ruhi xəstə olduğunu təsdiqləyən sənəd var: “Bununla belə, həkim razılığı və iştirakı olmadan ondan ifadə alınıb. Bu baxımdan ifadəsi yolverilməzdir, cinayət işindən xaric edilməlidir. Hadisənin baş verdiyi bir neçə seçki məntəqələrində hələ birində 39 müşahidəçidən şahid kimi yalnız 3-ü dindirilib. Eyni vəziyyət digər məntəqələrdə də təkrarlanıb. Dindirilənlər əsasən YAP-çılardır”.
Vəkil dindirilməyən şahidlərin dindirilməsini, seçki günü məntəqələrdə quraşdırılmış kameraların çəkdiyi videogörüntüləri tələb etdi. Həmçinin, audio- video çəkilişlərin aparılması, həbs qətimkanın ev dustaqlığı və ya başqa yerə getməmək barədə iltizam qətimkan tədbiri ilə əvəz olunması, hüquq müdafiəçisinə verilmiş CM-nin 159.4.1 maddəsi ilə ittiham üzrə icraata cinayət tərkibi olmadığına görə xitam verilməsi, qalan cinayət işi üzrə icraata xitam verilməklə prokurora qaytarılması barədə vəsatət qaldırdı. Dövlət ittihamçısı isə yalnız “vəsatətlər təmin olunmasın” deyib oturdu.
V.İsgəndərov üzünü hakimə tutaraq onun çıxardığı qərardan artıq xəbərdar olduğunu söylədi: “Mənə 3 il həbs nəzərdə tutulub, bəlkə sən ürəyiyumşaq olub, 2 il hökm çıxaracaqsan. Ancaq onsuz da qərarı dəyişə bilməyəcəksən. Çünki "yuxarı"ların əmrini icra edirsən. Mən həbsdə olanda məndən daha çox qorxurlar. Öpürəm sizi, əziz göyçaylılar. Mən möhkəməm, mübarizə davam edir".
Bundan sonra fasilə elan olundu və 1 saat sonra hakim qərarı oxudu. O, qaldırılan vəsatətlərin heçi birini təmin etmədi. Növbəti məhkəmə prosesi iyulun 20-nə təyin olundu.
Xatırladaq ki, V.İsgəndərov İP-in 17 aprel mitinqindən 2 saat əvvəl həbs olunaraq 15 sutkalıq həbs cəzasına məhkum olunub. 15 sutkanın bitməsinə 1 saat qalmış isə onu Baş Prokurorluğun Ağır Cinayətlərə Dair İşlər üzrə İstintaq İdarəsinə aparıb barəsində CM-in 159 və 160-cı maddələri ilə cinayət işi başlayıblar. Bundan sonra Nəsimi məhkəməsi hüquq müdafiəçisi barədə 2 aylıq həbs-qətimkan tədbiri seçib.

NAXÇIVANDA JURNALİSTİN BAŞINA OYUN AÇDILAR

2011-07-08T11:42:00.001-07:00

Almaniyalı jurnalist, “Frankfurter Allgemeine Zeitung” qəzetinin Moskva bürosunun müxbiri Mixail Ludviq iyulun 7-də Naxçıvan Muxtar Respublikasını tərk etməyə məcbur olub.

Məlumatına görə, o, Naxçıvana reportaj hazırlamaq üçün iyulun 5-də gedibmiş. Azərbaycanın Xarici İşlər Nazirliyində akkreditə olunmuş qəzetçi RATİ-yə deyib ki, işini yarımçıq dayandıraraq muxtar respublikanı tərk etməsinə yerli hakimiyyətin onun işinə maneə olması, onun izlənməsi və sərbəst hərəkət etməsinin məhdudlaşdırılması olub.

Mixail Ludviqin ən azı bir həftə Naxçıvanda qalıb işləmək istəyi varmış: “Məqsədim muxtar respublikanın bütün rayonlarını gəzmək, yerli əhali ilə görüşüb onların yaşayış səviyyəsi ilə tanış olmaq, problemlərini, çətinliklərini öyrənmək, tarixi abidələri görmək və bu haqda məqalə yazmaq idi. Azərbaycan Xarici İşlər Nazirliyindən verilmiş akkreditə kartını göstərməyimə baxmayaraq Şahbuz Rayon İcra Hakimiyyəti başçısının müavini mənə Ali Məclisdə qeydiyyatdan keçməyin lazım olduğunu bildirdi. Halbuki buna ehtiyac yox idi. Dedi ki, qeydiyyatdan keçməsəniz, sizin üçün böyük problemlər olacaq, sizi gözləyirlər, gedin qeydiyyatdan keçin. Bundan sonra biz Ali Məclisə müraciət etdik. Amma onlar mənim burada işləməyimə icazə vermədilər”.

Xarici İşlər Nazirliyinin yerli idarəsinə müraciət ediyini, orada onu saatlarla gözləməyə məcbur etdiklərini və get-gələ saldıqlarını, Almaniyanın Azərbaycandakı səfirliyinə və işlədiyi qəzetin rəhbərliyinə bu haqda məlumat verdiyini bildirən Mixail Ludviq deyib: “Sonra məndən hərəkət planı istədilər. Bir gün sonra isə Naxçıvana gələrkən məni qarşılayan jurnalistlərlər - RATİ-nin bölgə müxbirləri Elman Abbasov, Həkimeldostu Mehdiyev, “Turan” İnformassiya Agentliyinin müxbiri Məlahət Nəsibova və İlqar Nəsibovla birlikdə hərəkət etməmək şərti qoyuldu. Xarici İşlər Nazirliyinin yerli idarəsindən mənə bir bələdçi veriləcək və onunla birlikdə hərəkət edəcəkdim. Onlar bunu mənim təhlükəsizliyim üçün etdiklərinə inandırmağa çalışırdılar. Bu həqiqətən çox gülməli idi. Mən isə yalnız kirayə elədiyim avtomobildə hərəkət edəcəyimi bildirdim. Çox mübahisədən sonra iyulun 6-da onların təklifi ilə razılaşdıq və təqdim etdiyim plan üzrə Şərur-Sədərək istiqamətində hərəkət etməyə başladıq”.

Jurnalist deyib ki, bələdçi hər an harada olduqları, kiminlə görüşdükləri haqda telefonla kiməsə məlumat verib, insanların onunla danışmasına mane olub: “İnsanlar bələdçidən qorxaraq danışmaqdan imtina etdilər. Məni əvvəlcədən təlimatlandırılmış insanlarla görüşdürməyə çalışdılar. Şərur rayonunda isə bələdçi sürücüyə mənimlə rus dilində danışmaması üçün təzyiq etdi. Mənə istiqamət verməməyi tələb etdi, avtomobili dəyişmək və onların çağıracağı avtomobillə hərəkət etməklə hədələdi. Hər bir jurnalistin qüruru var. Mən bununla razılaşa bilməzdim. Sürücüdən dərhal geri qayıtmağı xahiş etdim. İşi dayandırdığımı bildirdim”.(qafqazinfo.az)

Təzəxan Mirələmlini döyüb həbs etdilər

2011-07-03T06:42:00.001-07:00

“Məni siyasi fəaliyyətimə görə tutublar”

2011-06-26T04:26:00.001-07:00

Şahin Həsənli: «Gözlərimi açanda başımın üstündə 4 polis gördüm, heç ayaqqabılarımı da geyinməyə imkan vermədilər»
Polis şahidlər məhkəmədə niyə and içmək istəmədi?

Cinayət Məsəlləsinin 228.1-ci (qanunsuz, qadağan olunmuş silah, döyüş sursatı gəzdirmə) maddəsilə ittiham olunaraq həbs edilən AXCP Rəyasət Heyətinin üzvü Şahin Həsənlinin işi üzrə dünən Şəmkir Rayon Məhkəməsində növbəti məhkəmə iclası keçirildi.
Hakim Qalib Paşayevin sədrlik etdiyi iclasda Şahin Həsənlinin hüquqlarını vəkil Mənsum Bayramov müdafiə edirdi. AXCP funksionerinə dəstək nümayiş etdirmək üçün ətraf rayonlardan - Şəmkir, Qazax, Tovuz, Ağstafa, Gədəbəy və Gəncədən də məhkəməyə cəbhəçilər gəlmişdilər. Bakıdan AXCP Rəyasət Heyətinin üzvü Iradə Əliyeva və “ReAL” Vətəndaş Hərəkatının Idarə Heyətinin üzvü Zöhrab Ismayıl da məhkəməni izləməyə gələnlər sırasında idi. Məhkəmənin iclas zalı kiçik olduğundan, bu dəfə də prosesə gələnlərin çoxu çöldə gözləmək məcburiyyətində qaldı.
Məhkəmə iclası başlayan kimi vəkil Mənsum Bayramov vəsatətlə çıxış etdi. O, Şahin Həsənliyə qarşı ittiham tərəfinin təqdim etdiyi sübutların təsdiqini tapmadığını bildirərək, onların sübutlar siyahısından çıxarılmasını istədi. Vəkil bildirdi ki, şahidlərin üzləşmə zamanı verdikləri ifadələr də əsassız olduğundan onlar da sübutlar siyahısından çıxarılmalıdır.
Lakin hakim vəsatəti təmin etmədi.
Daha sonra iş üzrə iki polis əməkdaşı ifadə verdi. Onlardan biri Şəmkir Rayon Polis Idarəsinin cinayət-axtarış şöbəsinin rəisi Müqalib Abdıyev, o biri isə Kəpəz Rayon Polis Idarəsinin baş əməliyyat müvəkkili Emil Qurbanov idi.
Polis şahidlər bildirdilər ki, əməliyyat məlumatı əsasında Ş.Həsənlinin yerini müəyyənləşdirərək saxlayıblar, onu polis idarəsinə gətirib üstündə axtarış aparıblar, bu zaman cibindən 5 ədəd 9 mm. kalibrli güllə tapıblar.
Polislərin sözlərinə görə, onlar evə daxil olanda Şahin Həsənli kompüter arxasında işləyirmiş, ona qarşı heç bir zorakılıq edilmədən şöbəyə dəvət ediblər.
Ş.Həsənli isə polislərin söylədiklərinin yalan olduğunu bəyan etdi. O, hakimdən xahiş etdi ki, şahidlər doğru danışdıqlarına əminlik yaratmaq üçün “Quran”a and içsinlər. Şahidlər onun bu istəyinə qarşı çıxdı, heç hakim də razılaşmadı.
Ş.Həsənli güllələrin ona heç bir aidiyyəti olmadığını bildirdi. Baş verənləri öz siyasi fəaliyyətilə əlaqələndirən Ş.Həsənli güllə məsələsini şər-böhtan, həbsini isə “siyasi sifarişin nəticəsi” adlandırdı.
Polislərin dediklərindən fərqli olaraq, Şahin Həsənli bildirdi ki, onu yatdığı yerdə tutublar: “Gözlərimi açanda başımın üstündə 4 polis gördüm. Onlar heç ayaqqabılarımı da geyinməyə imkan vermədilər. Qollarıma qandal vurub idarəyə gətirdilər”.
Vəkilin qandalla bağlı suallarını polis şahidlər inkar etdilər. Onlar ümumiyyətlə, qandaldan istifadə olunmadığını bildirdilər.
Yeri gəlmişkən, məhkəmə prosesində müdafiə tərəfin şahidlərə verdiyi sualları tez-tez hakim nədənsə, məhdudlaşdırırdı. “Bu sualın işin mahiyyətinə dəxli yoxdur”, “bu, yönləndirici sualdır” kimi əsaslandırmalarla hakim tez-tez şahidə ünvanlanan sualların qarşısını alırdı.
Bu iş üzrə məhkəmə prosesi iyulun 4-də davam etdiriləcək.
Xatırladaq ki, AXCP Rəyasət Heyətinin üzvü Şahin Həsənli martın 31-də həbs edilib. Onun həbsinin Ictimai Palatanın 2 aprel mitinqilə əlaqəli olması əksəriyyətdə şühbə doğurmur.

http://azadliq.info/index.php?option=com_content&view=article&id=6659:mni-siyasi-faliyytim-goer-tutublar&catid=358:ust-manset

MÜSAVATÇINI ÖLKƏDƏN GETMƏYƏ MƏCBUR ETDİLƏR

2011-06-26T04:21:00.001-07:00

Məryəm Qarayeva: “Oğlumu Cabbar Savalanlı kimi cibinə nəşə atıb tutacaqları ilə hədələyirdilər”

Sumqayıtda İctimai Palatanın (İP) mitinqlərində iştirak edən müxalifətçilərə qarşı təqib və təzyiqlər davam etdirilir. Təzyiq və həbs təhdidi o həddə çatıb ki, artıq bəzi müxalifətçilər ölkəni tərk etməkdən başqa çıxış yolunun olmadığı qənaətinə gəliblər. Sumqayıt şəhər sakini Məryəm Qarayeva dünən redaksiyamıza zəng edərək məlumat verib ki, onun oğlu Əli Qarayev Müsavat Partiyası Sumqayıt şəhər təşkilatının üzvüdür və İP-in 2 aprel mitinqində iştirak etdiyi üçün sutkalıq həbs edilibmiş.

Lakin Əli Qarayev buraxıldıqdan sonra da yerli hakimiyyət strukturları, xüsusən də polis ondan əl çəkməyib: “Oğlum Əli Qarayevi hədələyirdilər ki, səni bir bəhanə tapıb uzun müddətə həbs atacağıq. Deyirdilər, mitinqlərə getmə, partiyadan çıx. Əli isə heç bir qanun pozuntusuna yol vermədiyini konstitusion hüquqlarından istifadə etdiyini əsas gətirərək həmin tələbləri yerinə yetirməyəcəyini deyirdi. 19 iyun mitinqindən bir neçə gün əvvəl evə Sumqayıt Şəhər Polis İdarəsi 3-cü polis bölməsinin əməkdaşları evimizə gələrək Əli Qarayevi axtardıqlarını dedilər. Oğlum evdə yox idi və mən Əlini nə üçün axtardıqlarını soruşdum. Dedilər ki, oğlunu mitinqə getməməsi üçün axtarırıq, mitinqə getsə və bizim istədiyimizin əksinə hərəkət etsə, Əlinin də aqibəti cəbhəçi Cabbar Savalanlının aqibəti kimi olacaq, cibindən nəşə çıxacaq. Polislər gedəndən sonra oğluma xəbər etdim və mitinqə qədər evə gəlməməsini tapşırdım. Oğlum mitinq gününədək başqa yerdə gizləndi. Mitinqdə iştirak etdi. Bundan sonra da polislər ondan əl çəkmədilər. Demək olar ki, hər gün xəbər göndərirlər ki, Əlini Cabbarı həbs etdikləri kimi həbs edəcəklər”.
M.Qarayevanın dediyinə görə, oğlu təhdidlərdən, xəbərdarlıqlardan bezib və ailəsi ilə birlikdə ölkəni tərk etmək məcburiyyətində qalıb: “Əli Cabbar kimi şərlənib həbsə atılmaq təhlükəsinin real olduğunu gördü və mənim də təkidlərimi eşidərək Azərbaycandan çıxmalı oldu. Belə də zülm olar? Biz ziyalı ailəyik. Nə etmişik ki, bizi ölkədən didərgin salırlar? 70 yaşında müəlliməyəm. Elə vəziyyət yaratdılar ki, oğlumdan ayrı düşdüm”.

E.SEYİDAĞA

http://www.musavat.com/new/Siyasət/103103-MÜSAVATÇINI_ÖLKƏDƏN_GETMƏYƏ_MƏCBUR_ETDİLƏR

Paytaxtın 12 nöqtəsində aksiya keçirildi

2011-06-20T10:40:00.001-07:00

Gündəm
İP BAKINI VƏ İQTİDARI SİLKƏLƏDİ

Paytaxtın 12 nöqtəsində aksiya keçirildi
Rejimin əlindən həbsdən başqa heç nə gəlmədi; hakimiyyət İP-in üstünə “odun” yığa bilmədi; demokratiya mücahidləri dünyanı yenidən Azərbaycana boylandırdı

Dünən İctimai Palata (İP) Bakıda növbəti mitinq keçirdi. İP bu dəfə ötən aksiyalardan fərqli olaraq bir ərazidə deyil, 10-dan çox müxtəlif ərazilərdə etiraz göstəriləri keçirdi. Əməkdaşlarımız İP rəhbərliyi ilə söhbət edərkən onlar bildirdilər ki, müxtəlif məkanlarda aksiya keçirilməsi taktika olmaqla yanaşı, həm də bu, müxtəlif müstəqil, bitərəf şəxslərdən, xüsusi ilə gənclərdən ibarət qrupların özünütəşkil prosesidir. Belə ki, dünən İP üzvləri olmayan müxtəlif qruplar Sumqayıtda, Yeni Günəşlidə, Şanxay adlanan ərazidə, “Sovetski”də və digər yerlərdə lokal aksiyalar təşkil ediblər. İP rəhbərliyi bunu xalqın İctimai Palatanın çağırışlarına qoşulması kimi dəyərləndirir.

Əməkdaşlarımız dünən aksiyaların keçirildiyi məkanlardan reportajlar hazırlayıblar.

***

Öncədən elan edilən yerdə - «Nərimanov» metro stansiyasının ətrafında olarkən burada xeyli polis əməkdaşının ərazini üzük qaşı kimi dövrəyə almasının şahidi olduq. Təxminən saat 16:00 radələrindən Nərimanov parkına giriş qadağan edilmişdi, eyni zamanda metrodan «28 May» metro stansiyası istiqamətində gediş-gəliş tam məhdudlaşdırılmışdı.

Təxminən saat 17:00 radələrində müxalifətçilər Nərimanov stansiyası istiqamətində görünməyə başladılar. Onların mitinqçi olduğunu bilən polis əməkdaşları bu şəxsləri ərazidən qovmağa çalışdı. Bu zaman həmin şəxslər “Azadlıq” şüarları ucaltmağa, polis isə həbslərə başladı. İlk həbs etdikləri gənc isə Orxan Carçıyev oldu. Təxminən 10 polis əməkdaşı ona hücum edərək yerə yıxdı və sürüyə-sürüyə polis maşınına doğru apardı. Carçıyevin həbsindən sonra bir qrup qadın “Azadlıq”, “İstefa”, “Siyasi dustaqlara azadlıq” şüarları səsləndirməyə başladılar. Polislər qadınları da sanki cani tuturmuş kimi, qollarını buraraq, maşına mindirib ərazidən uzaqlaşdırdı. İctimai Palatanın üzvləri olan Lətafət Məlikova, Dünyaxanım Cərullayeva, Arifə Hüseynli, Sevda Laçınlı və Rüxsarə Mehtiyevanın 18-ci polis bölməsinə aparıldıqları bəlli oldu.

Qeyd edək ki, polis bu dəfə də jurnalistlərə qarşı zorakılıq etdi. Belə ki, mülki geyimli və polislərə komanda verən bir polis əməkdaşı Orxan Carçıyevin şəkillərini çəkərkən RATİ-nin əməkdaşının fotokamerasına yumruqla vurdu. Lətafət Məlikova zorakılıqla maşına mindirilib aparılarkən onun fotosunu çəkmək istəyən Elşad Məmmədlinin (“Yeni Müsavat” ) əlindəki fotoaparatı da həmin mülki geyimli şəxs vurub yerə saldı və aparat yararsız vəziyyətə düşüb. Fotoaparatlara qənim kəsilən həmin şəxsin fotosunu ayrıca yazıda dərc edəcəyik.

Təxminən 20 dəqiqə sonra ərazidə dayanan iki nəfər - bir kişi və bir qadın jurnalistlərə açıqlama verərək, ölkədəki vəziyyətə, Qarabağ probleminin həll olunmamasına etiraz edərək mitinqə çıxdıqlarını dedilər. Onlar müsahibə verdikləri yerdə polis hücumuna məruz qaldılar və həbs edildilər.

Aksiya davam edən zaman ərazidə YAP funksioneri - Siyavuş Novruzov və Kərim Kərimov peyda oldular. Onlar “CİP” markalı avtomobildə əyləşərək ərazini müşahidə edirdilər. Jurnalistlər onlara yaxınlaşmaq istəyəndə YAP-çı deputatlar avtomobili sürdürüb getdilər.
Bir qədər sonra “Günəbaxan Turan” kimi tanınan Samir İbrahimov da ərazidə bir neçə dəqiqəlik görünüb yoxa çıxdı.

Polisin burada keçirdiyi əməliyyat zamanı təxminən 10-dan çox adam həbs edildi. Təxminən 1 saat ərzində «Nərimanov»u silkələyən vətəndaşların bir qismi həbs edildi, bir qismi isə zorakılıqla ərazidən uzaqlaşdırıldı. Ərazidən uzaqlaşıb gedən və digər yerdə aksiya keçirməyi planlaşdıran dəstənin içərisində olan Müsavat Partiyasının başqanı İsa Qəmbərin oğlu Turqut Qəmbər isə «Nərimanov» məhkəməsinin yaxınlığında həbs edildi. Onu öncə iki nəfər mülki geyimli şəxs izlədi, sonra onlar polis maşını çağırıb Turqutu həbs etdilər. Axşam saatlarında isə xəbərdarlıq edərək onu sərbəst buraxıblar.

***

Saat 16:00 radələrində Müsavat fəalları həmçinin Tofiq Bəhramov adına respublika stadionunun qarşısından yürüşə başladılar. Flaşmob tipli bu etiraz aksiyası beş dəqiqə çəkdi. Etirazçılar 5 dəqiqə içində “Azadlıq”, “Azad seçki”, “Həbsdə olanlara azadlıq” kimi şüarlar yazılmış plakatları qaldırdılar. Əraziyə polis qüvvələri gətirilənədək aksiyaçılar dağılışdılar. Bu vaxt polislər Müsavat Gənclər Təşkilatının üzvü Ramin Baxışı həbs etdilər.
Saat 18:00 radələrində Müsavat fəalları Ayna Sultanovanın heykəlinin arxasından park boyunca “İstefa”, “Azadlıq” şüarları qışqıraraq 8-ci mikrorayona tərəf yürüş təşkil etdilər.

***

AXCP fəalları isə “Kukla” teatrının qarşısında - bulvarda aksiya keçirdilər. Əksəri qadınlar olmaqla çoxsaylı aksiya iştirakçısı “İstefa”, “Azadlıq” şüarları ilə yürüş etməyə başladılar. Onların əllərində Azərbaycanın bayraqları var idi. Bu zaman polislər həmin şəxslərə hücum edib həbslərə başladı. Bu zaman bayraqlar ayaq altda qaldı. İnsanlar buna etiraz etdikdə polislər daha da aqressivləşdilər. Aksiya iştirakçılarının təxminən 15 nəfərini əraziyə çağırılan polis maşınlarına doldurub Səbayel Rayon Polis İdarəsinə apardılar.

Cəbhəçilərin daha bir aksiyası isə “İnşaatçılar” metro stansiyası yaxınlığında baş tutub. Burada da 50 nəfərdən artıq şəxs “Azadlıq”, “İstefa” şüarları ilə “Qələbə” kinoteatrı istiqamətində yürüş etdi. Polis onları qovmağa və aksiyanın qarşısını almağa çalışarkən zorakılıqlar oldu. Burada da bir neçə nəfər saxlanıldı.

***

İP üzvlərinin növbəti aksiya cəhdi “Elmlər Akademiyası” metro stansiyası qarşısında oldu. Polis buranı da ciddi nəzarətə götürmüşdü. Aksiya iştirakçılarının bir neçəsi metrodan çıxarkən, bəziləri də elə metronun içərisində həbs edildi. Bu səbəbdən həmin yerdəki aksiya çox qısa müddətdə yekunlaşdırıldı.

***

Dünən polis, ümumiyyətlə, Bakı şəhərini tam nəzarətə almışdı. O cümlədən, “Neftçilər” metro stansiyasının ətrafı da güclü polis nəzarətində idi. Burada da AXCP üzvləri aksiya keçirdilər. Onların lokal aksiyası dərhal polis hücumuna məruz qaldı. Polis zorla aksiyaçıları ərazidən uzaqlaşdırıb.

Həmçinin, ötən gün saat 16:00 radələrindən etibarən Müsavat Partiyasının qərargahı polis mühasirəsinə alınıb. Qərargahın ətrafında 2 avtobus polis yerləşdirilib. Bu vəziyyət təxminən 18:30 radələrinədək davam edib.

Dünən KXCP-nin Sumqayıt şəhər təşkilatının sədri Şakir Məmmədov və partiya üzvü Məmmədiyyə Məmmədov saat 14:00-da Saray postunda saxlanılıblar. Sonra onlar Sumqayıt şəhər 1 saylı polis bölməsinə aparılıblar. Müsavat Partiyasının Sumqayıt şəhər təşkilatının sədri Fəxrəddin Abbaslının yaşadığı ev polis mühasirəsində olub.

***

Ötən gün xaricdə yaşayan azərbaycanlılar Stokholmda İctimai Palatanın 19 iyun aksiyasına dəstək aksiyası keçiriblər. Yüzə qədər aksiyaçı əllərində Azərbaycanın dövlət bayraqlarını və üzərində “Siyasi dustaqlara azadlıq”, “Monarxiya istəmirik”, “Demokratik seçki”, “Söz azadlığı”, “Korrupsiyaya yox”, “Xalqla dialoq”, “Demokratik seçki” və s. şüarlar yazılmış transparantlar tutub, şüarlar səsləndiriblər.

***

İctimai Palatanın dünənki fərqli taktika ilə həyata keçirilən aksiyasının qarşısını polis faktiki olaraq ala bilmədi. Hüquq mühafizə orqanlarının əməkdaşları bütün heyətlə aksiyanın qarşısını almağa səfərbər olsa da, onlar yalnız aksiya baş tutduqdan sonra zorakı həbslərlə kifayətlənə bildilər. İctimai Palatanın Koordinasiya Şurasının 19 iyun etiraz aksiyaları ilə bağlı bəyanatda deyilir ki, 19 iyun kütləvi etiraz hərəkatının yeni mərhələsidir: “İlk dəfə Bakı şəhərinin 12 müxtəlif məntəqəsində eyni vaxtda etiraz aksiyaları həyata keçirilib. Aksiyalar Yeni Günəşlidən başlayaraq Yeni Yasamal yaşayış sahələrinə qədər, bütün şəhəri əhatə edib. Onların bir çoxunun İctimai Palatanın üzvü olmayan gənclərin təşkil etdiyi könüllü etiraz hərəkətləri olması diqqət çəkir. İctimai Palata vətəndaşların bu fəallığını yüksək qiymətləndirir, eyni zamanda bildirir ki, demokratik hərəkat dinc, idarə olunan və mütəşəkkil formalarda davam etdirilməlidir. İctimai Palatanın növbəti sessiyası yaranmış yeni vəziyyəti müzakirə edəcək və növbəti aksiyalar, növbəti addımlar barədə müvafiq qərarlar qəbul edərək ictimaiyyətin diqqətinə çatdıracaq”.

***

Müsavat başqanı İsa Qəmbər İP-in aksiyasını baş tutmuş hesab edir: “İctimai Palatanın yüzlərlə üzvü və tərəfdarı, gənclər bu gün fədakarlıq nümayiş etdirdilər. Nərimanov kinoteartı, Gənclik metrostansiyası, eləcə də şəhərin bir çox məkanlarında vahid şüarlarla lokal etiraz aksiyaları keçirildi. Hakimiyyət yenə sərbəst toplaşmaq azadlığı haqda qanunu pozdu. Onlarla İctimai Palata üzvü polis məntəqələrində və məhkəmələrdədir. Bu aksiya bir daha sübut etdi ki, azadlıq istəyinin qarşısını almaq mümkün deyil. Hakimiyyətin İctimai Palatanın mitinqlərinin qarşısını almaq niyyəti bu tədbirlərin daha da böyüməsinə gətirib çıxaracaq. Bu, Azərbaycanda azadlıq hərəkatının yayılacağının ilkin göstəricisidir”.

AXCP sədri Əli Kərimli isə bildirdi ki, Azərbaycan hökuməti beynəlxalq təşkilatların ATƏT-in, Avropa Birliyi parlamentinin çağırışlarını qulaqardına vurub: “Rejim sərbəst toplaşmaq azadlığını məhdudlaşdırmağa çalışdı. Nəzərdə tutduğumuz məkanda mitinq keçirməyimizə mane oldular. Polislə qarşıdurmadan yayınmaq, üçün fəallarımıza çağırış etdik. Fəallarımız İnşaatçılar və Neftçilər metro stansiyaları da daxil olmaqla, ondan artıq məkanda etiraz aksiyası keçiriblər. Azadlıq, yeni parlament seçkiləri, rüşvətə son qoyulması, təqaüdlərin artırılması ilə bağlı tələblərimiz səsləndirildi. İctimai Palata tərəfdarları ölkədə köklü dəyişiklik, siyasi məhbuslara azadlıq, korrupsiya qarşı ciddi mübarizə, növbədənkənar parlament seçkilərinin keçirilməsini, maaşların və müavinətlərin artırılmasını tələb edirlər İctimai Palatanın fəaliyyəti bundan sonra da davamlı olacaq. Aksiyanı baş tutmuş hesab edirik”.

İP-in Koordinasiya Şurasının üzvü Pənah Hüseyn bildirdi ki, ötən gün Bakının əksər istiqamətlərində - Yeni Günəşlidə, Şanxay deyilən ərazidən Yeni Yasamala qədər, aksiyalar təşkil olunub: “Aksiyalar göstərdi ki, hakimiyyət sərbəst toplaşmaq azadlığını bundan sonra da pozsa, etirazlar bütün şəhərə yayılacaq”.

Aydınlar Partiyası İP-in dünənki göstərilərinə amansızlıqla müdaxiləni pisləyən bəyanat yayıb. Partiya bunu hakimiyyətin sərbəst toplaşmaq hüququnun növbəti dəfə boğması kimi qiymətləndirib: “Bu, bir daha onu göstərir ki, dünyada gedən qlobal demokratikləşmə tendensiyaları fonunda hakimiyyət hələ də islah olunmaq niyyətində deyil”.
Aksiyanı ATƏT-in nümayəndələri, hüquq müdafiəçiləri, xarici jurnalistlər də izlədilər.

***

Dünən axşam saatlarında İctimai Palatanın 19 iyun 2011-ci il mitinqində həbs olunanların siyahısı açıqlanıb. Tam olmayan siyahı aşağıdakı kimidir:
İctimai Palatanın 19 iyuna elan etdiyi etiraz aksiyası zamanı saxlanılanların siyahısı:

Müsavat

Kənan Hacıəkbəroğlu,
Vahid Abbasov,
Mətin Nağıyev
Sənani Hüseynli
Lətafət Məlikova,
Dünyaxanım Cərullayeva,
Arifə Hüseynli,
Sevda Laçınlı
Rüxsarə Mehtiyeva,
Ramin Baxış
Həqiqət Əlizadə
Yaşar Türk Azər
Tural Hacıbəyli
AXCP

Gözəl Bayramlı
Asəf Quliyev
Asif Yusifli
Məmməd İbrahim
Aydın Əliyev
Kəmalə Xəlilova
Afina Əliyeva
Şirinxanım
Nüşabə Qafarova
Şəkər İsgəndərli
Seymur Həziyev
Mənsur Cəbrayılzadə
Elçin Dəmirov
Elçin Əhmədov
İntiqam Mövlanov
Hidayət Süleymanov
Vaqif Xalıqov
Vüqar Qədirov
Elburus Məmmədov
Ramiz Əhədov
İltifat Mehdiyev
Şakir Abbasov
Akif Ellazov
Xanlar Zülfüqarov
İxtiyar Hüseynov
Şirəli Şirəliyev
Əlizadə Əhmədov
Cavanşir Hüseynov
Hacı Abbasov
İlham Rəsulzadə
Viya Zöhrabov
Fərhad Əliyev
Əli Abdullayev
Şaiq Abdullayev
İnqilab Kərimov
Təranə Cumayeva
Mübariz Kərimov
Qafqaz Məmmədov
KXCP

Orxan Çarçıyev
Başqa

Yeganə Əmiraslanova (İP üzvü)
Turqut Qəmbər (“Nida” Gənclər Təşkilatı)
19 iyun aksiyası qabağı saxlanılanlar:

Müsavat

Elçin Səlimov
Rövşən Muradov
İsa Məmmədli
AXCP

Mahir Qulubəyli
Sətdar Şahlarov
Tofiq Zeynalov
Sahib Rüstəmli
Əflatun Ağayev
Rövşən Sadıqlı
Həbs olunanların bir qismi azadlığa buraxılıb, onlarla şəxs isə polis bölmələrində saxlanılır. Onları inzibati cəzalandırmaq üçün məhkəməyə aparsalar da, proses bugünə saxlanılıb. O cümlədən, Nərimanov polisində saxlanılan Ramil Baxış, Ağasif Şakiroğlu, Orxan Carçıyev və Vahid Abbasovun da məhkəməsi bugün baş tutacaq.
Tutulanlardan AXCP-nin İmişli təşkilatının üzvü Vüqar Qədirov 50 manat, Müsavat Partiyasının Səbayel təşkilatının sədri Hüseyn Məlik 51 manat cərimələnib.
Növbəti sayımızda və musavat.com onlayın saytımızda yeniliklər barədə məlumat veriləcək.

***

İctimai Palatanın 19 iyun mitinqinin qətnaməsi:

Xalq köklü islahatlar tələb edir!

Mitinq iştirakçıları İctimai Palatanın 26 fevral tarixli Bəyanatı, 2 aprel və 17 aprel mitinqlərinin qətnamələri, İctimai Palatanın 4-cü (9 aprel) sessiyasının “İctimai siyasi vəziyyət və demokratik qüvvələrin vəzifələri haqqında” qətnaməsinin müddəa və tələblərini və İctimai Palatanın 6-cı (27 may) sessiyasının qərarlarını müdafiə etdiklərini bildirərək, o cümlədən:

Ölkədə real siyasi, sosial, iqtisadi islahatlar aparılması, növbədənkənar parlament seçkiləri keçirilməsi, Yeni Konstitusiya hazırlanması, proporsional seçki sisteminin bərpa olunması, əsas insan hüquq və azadlıqlarına, o cümlədən sərbəst toplaşma azadlığına, ifadə azadlığına, dini etiqad və vicdan azadlığına qoyulmuş hüquqi və icra xarakterli məhdudiyyətlərin ləğv edilməsini zəruri sayaraq,
Korrupsiyaya qarşı mübarizənin təminatı olaraq nazir və digər mərkəzi icra hakimiyyəti orqanlarının rəhbərlərinin korrupsiya fəaliyyətlərində iştirakı məsələləri şəffaf şəkildə təhqiq edilməsini, təhqiqat başa çatana qədər onların dövlət qulluğu vəzifələrində çalışmalarının qadağan edilməsini məqsədəuyğun hesab edərək,
Neft gəlirlərinin və digər milli sərvətlərin ədalətli bölgüsü istiqamətində konkret addımlar atılmasını, bu məqsədlə əmək haqqı, pensiyalar və digər sosial ödənişlərin minimum hədlərinin iki dəfə artırılmasını, ana və uşaqların sosial imtiyazlarının bərpa edilməsini, kredit borcları və digər borcların ödənməsi möhlətlərinin artırılmasını, SSRİ dövrü əmanətlərinin qaytarılmasını və sosial ədalətin təmin olunması naminə digər təcili tədbirlərin həyata keçirilməsini irəli sürərək
tələb edirlər:

2 aprel aksiyası zamanı mitinq iştirakçılarının gözyaşardıcı qaz, dəyənəklərdən istifadə olunmaqla zorakılığa məruz qalmaları, xüsusi ilə saxlandıqdan sonra qandallanaraq nəqliyyat vasitələrində, polis idarələrində və təcridxanalarında döyülməsi və işgəncəyə məruz qalmaları qətiyyətlə pislənsin, bu halların təşkilatçı və icraçılarının aşkarlanması və məsuliyyətə cəlb edilmələri tələb olunsun. 2 aprel aksiyası ilə əlaqədar həbs olunmuş və artıq “Amnesty İnternational” tərəfindən vicdan məhbusu elan edilmiş Arif Hacılı, Tural Abbaslı, Məcid Məmmədli, Şahin Həsənli, Əhəd Məmmədli, Vidadi İskəndərli və digər şəxslər dərhal azad olunsunlar.
Köklü islahatlar və demokratik dəyişikliklər şüarı ilə kütləvi dinc etiraz aksiyaları davam etdirilsin.
Azərbaycan Konstitusiyasının 49-cu maddəsinə və “Sərbəst toplaşma azadlığı haqqında” qanuna müvafiq olaraq ölkədə vətəndaşların dinc kütləvi tədbirlərinə şərait yaradılsın.
Mitinq və aksiyalar zamanı hər hansı vəziyyətdən asılı olmayaraq mübarizənin dinc şəkildə aparılmasına qeydsiz-şərtsiz əməl edilsin. Rəsmi qurumlar, təhrikçilər və təxribatçılar zor işlətsə, saldırsa belə qarşılığında zora və saldırıya yol verilməsin.
“Yeni Müsavat”ın Reportyor Qrupu

http://www.musavat.com/new/Son_xəbər/102729-BULVARDA_PULSUZ,_AMMA_DAVA-DALAŞLI_ƏYLƏNCƏ

19-12-11
1 USD		0.7864
1 EUR		1.0218
1 RUR		0.0246
1 GBP		1.2176

Bakı		+8C/+11C
Gəncə		+2C/+9C
Naxçıvan		-2C/+7C
Şuşa		-4C/+5C
Lənkəran		+7C/+13C
Salyan		+8C/+12C
Ağdam		+2C/+9C
Şəki		0C/+6C
Quba		+2C/+7C